Skip to Content

سەفەرێک لەگەڵ خۆم… جەلال عەبدوڵا ساڵح

سەفەرێک لەگەڵ خۆم… جەلال عەبدوڵا ساڵح

Closed
by August 21, 2022 General, Poems

چەمێ ڕوا، جۆگەلە دێ
گەڵا دەمرێ، لق گوڵی گرێ
نازانم سبەی چی دەبێ
ژیان ئێستایە نەک دوێنێ

خۆر لە پەنجەرەی هەورەوە
سەیرم دەکا و لێم ون دەبێ
خەیاڵم وا لەلای خەجێ
تەشی و خوری دەلاوێنێ

چی لە جوانی تاڤگە بکەم؟
چاوم وەک جاران نایبینێ
بە کۆڵانی کۆچ دا دەڕۆم
دڵ لێ ئەدا، قاچ دەترسێ

شەو دەڕوات و تاریک دادێ
کۆڵانی خەم تەواو نابێ
ڕێگای ونی ژیان دەبڕم
ئەمڕۆ لێرە سبەی لەوێ

وەک چۆلەکە دەجریوێنێ
هەستی غەریبیم بۆ ئەوێ
چۆن بگاتە هەتاوی دێ
پێی هیلاکم ، هەنگاوی ڕێ

دەنگی مەل و جوانی گوڵێ
ڕۆحی ماندوم دەلاوێنێ
ئەو قیبلەمە، لەهەرکوێ بێ
ڕووی تێ دەکەم ، خۆشم دەوێ

Previous
Next