عال کوڵیوە شوقە.. نەوزاد بەندی
خەباتی شاخ بوو به خەباتی شوقە ..
شاخ تەخت کرا بۆ شوقە ..
باخ تەخت کرا ..
ڕێڕەوی باران بوو بە شوقە ..
ماڵی زیکزیکە ..
زێراب ..
شانۆ ..
هاوینە هەوار ..
سینەما ..
کۆڵوانە ..
گۆڕەپانی فتبۆڵێن ..
زانکۆ ..
دەرپێی سەرخەرمان ..
تەسبیحی قەزوان ..
مەرکانە ..
ڕێی مەکتەب ..
ئاودەستخانە ..
مێژوو ..
جوگرافیا ..
زمان و ئەدەبی کوردی ..
عەرەبانەی شێلم ..
کانی و کارێزەکان ..
ماڵە باجێنەی کچۆڵان ..
درانە دەمی شۆڤڵ و دەنوکی دەقاق و
کران بە شوقە ..
خەستەخانە تەخت ئەکەن بۆ شوقە ..
گۆڕەپانی گواستنەوەی هاووڵاتیان ..
تێرمیناڵ ..
باخچەی ساوایان ..
سایلۆی دانەوێڵە ..
بازاڕی کەوفرۆشان ..
کۆڵانەکانی مناڵیی ..
جێی نانەوەی مریشک ..
ناوساجی ..
کەلانە ..
بەڕوو ..
تەنووری نەنە ئافتاو ..
فەقیانەکەی ڕەشۆڵ
هەموو تەخت ئەکەن بۆ شوقە ..
٭ ٭ ٭
مەردی خوا بن ، لێیان مەکڕن ..
کار وا بڕوا ، ئەلف و بێی نوێی ئیبراهیم ئەمین باڵدار و ..
بنکەی تەندروستی عەلی کەمال و عەلی ناجی و ..
سمێڵی شێخ مەحمویش ئەکەن بە شوقە ..
مەردی خوا بن لێیان مەکڕن ،
ئەگینا گەرمتر ئەبن .. حەیرانەکانی سێوە و
دارئەرخەوانەکانی گردی سەیوان ،
تەخت ئەکەن ..ئەیکەن بە شوقە ..
٭ ٭ ٭
پێویستمان بە پاڵەوانێکی کەس نەزانە ،
پەلی ئەو شوقە فرۆشانە بگرێ و
بیانبا بۆ لای پزیشکی دەروونیی ..
یان بیانبا بۆ لای مەلا عەلی
بزانین ئەم شوقە فرۆشییە ،
شێتێتیە یان نەخۆشیی دەروونیی ..
عەشقە یان بازرگانیی ..
بزانین پێش ئەوەی گۆڕی شەهیدەکانیش تێکدەن و بیکەن بە شوقە..
پێش ئەوەی پێنج هەزار ڕۆحی هەڵەبجە وهەشتا و یەک هەزار ڕۆحی ئەنفال ،
بکەن به شوقە ..
پێش ئەوەی مزگەوتەکان تەخت کەن و بیکەن بە شوقە ..
پێش ئەوەی ئەو نیوەی نیشتمان کە ماوە ، کەبەرماوەی سفرەی حەسەن پلایسە ، بیگۆڕنەوە بە شوقە ..
بەڵکو حەبێ ..
ڤاکسینێ ..
چل پەنجا دار حەیزەرانی مەلا عەلی ..
یان ئەنتی بایۆتیکێکی دژ بە شوقە وەرگرن ..
ئەترسم کوردستانی باشوور ،
بکەن بە شوقەیەکی گەوره و
یەک دوو عەرەب لێیان بکڕن ..
ئینجا بڕوخێن یان
بمرن ..
دەلالۆ .. دەلالۆ ..
دەلالێ .. دەلالێ ..
ـــنەوزاد بەندی ــــــــــــــــ
