Skip to Content

چەچەکانی خوای پەپوولە.. فازیل شــەوڕۆ

چەچەکانی خوای پەپوولە.. فازیل شــەوڕۆ

Closed
by ئه‌یلول 30, 2022 General, Poems

نەک هەر خۆی

هەسارەکەشی

٦ی ڕەزبەری ٢٧٢٢

کەڕ و لاڵ بوون،

بەرد زمانی کەرت ببوو

گەڵای درەخت و جەنگەڵ

ورشە ورشیان بیر چووبۆوە

باڵندەکان  دنووکیان هەڵوەری بوو

ئاسمان ئایەتێکی بێ زمان بوو

هەشت ملیار ڕۆح

بێ زمان

بێ چاو

بێ گوێ

دەهات و دەچوون

سەرجێیان دەکرد

خوێنی منیان فڕ دەکرد

سەمایان دەکرد.

خەلیفە کەڕ بوو

شمشێر کەڕ بوو

مزگەوت کەڕ بوو

کلێسا کەڕ بوو

ئاسمان کەڕ بوو

جیهان کەڕ بوو

تەنها

گوێچکەی

ئەو منداڵە ڕۆحسووکەڵەی دیموکرات نەبێ

کە  دوو چەچە ناسکۆڵەکانی

خستبووە سەر گویچکەکانی و

وەکو خودا

گوێی لە قیژەی مەرگ و

هاواری ستەم و

سەدای خوێنم بوو

بە چەچەکانی گوێی خۆی گرتبوو

لێ چاوەکانی

هاواریان دەکرد:

نەفرەت لە درۆنی ئبابیل

نەفرەت لە مووشەکی فاتیح

نەفرەت لە ئیڕانی ئیسلامی

٢٩/٩/٢٠٢٢ دوبلن

Facebook: fazil Shawrow

Previous
Next