دوو جیهان.. شیعری\ نەوزاد بەندی
کە بە پاتەی دڕاوەوە ،
هاتنە خوارێ ..
بە سپۆنسەری چەند داگیرکەر و
زۆردارێ ..
دوو جیهانتان لە هەرێمێکا دروست کرد ..
جیهانێکیان تاریک ،
بێ ئاو و کارەبا ..
وێران ..قەڵەباڵغ ..داڕوخاو ..
پڕ لە سواڵکەر و بێ لانە ..
بە هاوین گەرم
بە زستان سارد ..
کە بێجگە لە نرخی مرۆڤ ،
هەر چی کاڵایە گرانە
پڕ لە بێ ئیش
پڕ دەسگێڕ و عەرەبانە ..
پڕ لە پاشەکەوتی موچە و موچە بڕین
زیندانێکی پڕ زیندانە ..
لە ژێر باری قورسی کرێ و دوکەڵ و کاڵای بەسەرچوو .. پۆلیس و
باج و بێگاری و ڕێگری و
چندەها جۆری سەرانە ..
خاڵی لە ژیان و لە جوانیی ..
ئەم جیهانەتان دا بە خەڵک ..
جیهانێکی تر ، ڕوناک و پڕ لە کۆشک و
لە تاوەر و باڵەخانە ..
سیکیوریتی ..خزمەتگوزاریی شاهانە
پڕ لە گەشت و خوێندنگا و زانکۆی مۆدێرن و
ملیارەها ملیار دۆلار و
ئاهەنگی ڕۆژ و ئێوارە و شەوانە ،
پڕ لەکەنیزەکی جوانی دڵبەری
ناوخۆ و بێگانە ..
ئەمە تایبەت بە خۆتانە …
٭ ٭ ٭
بەڵێ جیهان سێ دانەیە ..
دانەیەکیان ئەوەی هەبوو،
دووانەکەی تر ،
فەرموو ، لەم کوردستانەیە ..
