Skip to Content

ژیانم لەوە کورتـترە بەشـی کەسێکی تر بکـات.. موراد عەلی

ژیانم لەوە کورتـترە بەشـی کەسێکی تر بکـات.. موراد عەلی

Closed
by نیسان 2, 2023 General, Poems


ـ لە شاری تەنیایـی ھاتوومەتەوە
دەمەوێ پێت بڵێم ھاوڕێ… ئەوێ ھێندە ترسناک نیـیە! تەنێ ھەندێك بوێری دەوێ

ـ تۆ چی دەربارەی گۆڕانم دەزانیت؟
لۆچی ڕوخسارم
لەرزینی دەستەکانم
ماشوبرنجـی قژم …
نا ،تۆ ھیچ نازانیت
وەرە ببـە بە من
وەرە ناخم ببینە
ئەوکات تێدەگەیـت
کاتێک گەنجێك باس لە پیربوون دەکات
چ ئازارێکە!

ـ
کەمتر لە سەد ساڵ ژیان و
مردنێکی ھەزاران ساڵی ھەموومان بەڵگـەییە
بۆ ئەوەی بڵێین:
ژیان لە مەرگ سەختتـرە
ـ
پیرەگەردوون یاری بە ھەموومان دەکات
تۆ ببـە بە یەکەم کچی
حـەوا یاری بە ئەو بکـە
تکاکارم
ـ
دەگـەم بە ھەر شتێك ماچـی دەکەم
دەستی گەورەکان
گۆنای بچووکەکان
بەرگی کتێبەکان
تۆ چ سیحرێکیت؟ ھەموو شوێنێك
ڕەنگـی لێوتی گرتووە
ـ
ئەوەی کاڵ بووەتەوە نە یادەوەرییەکانـن نە شوێنەکانـی برین … ئەوە تۆیت کاڵبوویتەوە لە
عەشقـی من
ـ
ئەگەر شاعـیر بیزانیایە ئەو دێڕانە
دەبن بە برینم
نەیدەھێشت
ئەو ھونەرمەندە بێویژدانە نووسـینەکانی
بە گوێچکەکانم بچرپێنێ
ـ
ئەم نووسراوانە دوای ڕۆیشتـنی تۆن
سەیر کە
بێھەستـیـت چ یارییەك بە ھەستـم دەکـات
ـــــ
موراد عەلی

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish