سەفەری دوا باڵندەی شار.. نەوزاد بەندی
ئەم لەو جۆرەیان بوو ، کە قسە خۆش بوو ، بەس گاڵتەجاڕ نەبوو ..قسەکانی توێکڵدار بوون ، بەڵام جنێو نەبوون .. کاری ئەکرد بەڵام پارەی نەدەپەرست ..هونەرمەندێکی خاکی و میللی و مرۆڤپەروەر بوو .. هەرگیز لە میدیاکان و لە بۆنەکاندا بۆ ماڵ و سامان نەکڕوزاوەتەوە .. کەس نەیدەزانی کرێچییە ..ئاسایی بوو بەلایەوە لەسەر شەقامێک سەوزە ومیوە بفرۆشێ ..ئەو لەبەر دەرگای بەرپرسەکاندا ڕانەوەستا و ..ماستاوی بۆ هیچ کەسێ نەکرد ، هەر مایکێکیش ڕێی پێ بگرتایە ، بە سنگێکی فراوان و ..ڕوویەکی خۆشەوە ، هەموو پرسیارەکانیانی وەڵام دەدایەوە و حیسابی ئەوەی نەدەکرد ئەم مایکە هی چ حیزبێکە و چ ئاغایەک خۆی بە خاوەنی دەزانێت ..
بەڵێ ، هونەرمەند دوو جۆرن ، هونەر فرۆش و هونەربیر .. ئەم لەجۆری هونەر بیر بوو ..هونەر و بیرو باوەڕەکەی ئاوێتە بوون ، هەر بۆیە هەمووان خۆشیان ویست ..ڕوخساری هەمووان به ووتەکانی بزە و پێکەنینیان تیا ڕوا ..هەمووان بۆ مەرگی ناکاویی ، فرمێسکیان ڕشت و توشی دڵتوندی و خەمباریی بوون ..ئەو تاکە هونەرمەند و تاکە کەس بوو لەم کوردستانەدا بتوانێ هەموو حیزبەکان وا لێ بکا دوور لە دروشمی حیزبی لە دەوری کۆببنەوە و گوێی لێ بگرن و خۆشیان بوێ ..ئەو تاکە کەس بوو ، بە هونەر و کەسایەتییە جوانەکەی ، جیاوازیی نەهێشت ، دەوڵەمەند پێش فەقیر ، ئەیناسی ..دەسەڵاتدار پێش بێدەسەڵات خۆشی ئەویست ..ئەو بە بێ ڕیکلام و بە بێ کلیل ، دەرگای دڵی هەمووانی کردەوە و ..بۆ هەتاهەتایە ، باخچەی هونەرێکی پاک و ..کەسایەتییەکی سادە و جوانی لە ناخی هەموواندا چاند ..
مەگەر خوا بزانێ چ خەمێکی گشتی ، چ دەردێکی سیاسی ، چ ئازارێکی ئابووریی ، چ داخێکی گەندەڵکاران ، کاتژمێری دڵتی ڕاوەستاندبێ .. مەگەر خوا بزانێ ..
سەفەرت سەلامەت ، هادی گیان ..
خودا پاڵپشت و هاوکارت بێ ،عەریف حەمە تاڵی ئازیز و خۆشەویست ..
نەوزاد بەندی
