ببەخشە، من بە سەرۆکت نازانم.. شیعری/ نەوزاد بەندی
لە شارێکایت ،
کارەبای تیا نییە و
لە هەموو جێیەکیش زیاتر ،
خەڵکی بە کارەبا ئەمرن..
شەقامێکی تێدا نیە لە سەد لاوە
بڕبڕەی پشتی نەشکابێ و
لە هەموو جێیەکیش زیاتر
خەڵکی ئۆتۆمبیل لێ ئەخوڕن ..
تۆیش هەر ڕۆژەی ،
بە کەتنێکی تازەوە دەردەکەویت و ..
ئەیشتەوێ پێت بڵێم سەرۆک ؟
کەی لە پۆستی سەرۆکایەتیی تێر ئەخۆی ؟
ئێمە دەمێکە لە پۆستی
هاووڵاتیبوون تێر بووین و ..
ڕەحمەت ئەنێرین بۆ ئەوەی
کە زوو سەری خۆی
هەڵگرت و ڕۆی ..
کەی لە چاکەت و بۆینباخ
پەست ئەبیت و
لە تی شێرتێکا ، نەفەسێ
بە هەردوو بن باڵت ئەدەی ؟
بە غەبغەبەی سوور هەڵگەڕاو
بە هەردوو بنڕانت ئەدەی ؟
ئێمە دەمێکە چاکەت و
بۆینباخمان سەد جار بە نەفرەت کردووە ..
ئێمە دەمێکە هەر کەسێ بەم هاوینە ،
لە قات و بۆینباخایە ،
لەلامان وەکو دارتووە
لەلامان وەکو مردووە ..
٭ ٭ ٭
بێزار نەبووی
لە دەرکەوتنی ڕۆژانەت
لەسەر شاشەی ڕۆژنامە و
لاپەڕەی تی ڤی ؟
بێزار نەبووی لە هەڵەی گەورەی سیاسی و ..
ڕێزمانی و ..
هەڵوەراندنی
پەڕ و باڵ و
موچە و ماڵ و
وەزع و حاڵی هاووڵاتیی ؟
بێزار نەبووی لە هەزار جار
کوشتن و
دیسان کوشتن و
کوشتن و دیسان کوشتنەوەی
مێگەلێ بێجگە لە لاتیی
نەیدیوە ساڵێکی هاتیی ؟
بێزار نەبووی ،
لە ملیۆنەها کۆمێنتی پڕ لە جنێو ؟
لە هەزارەها پەتپەتێن ..
لە هەزارەها خەتخەتێن ؟
٭ ٭ ٭
بێزار نابن ..
سەد ساڵی تر ، بێزار نابن ..
نە لە زێرابی نەوت و غاز ..
نە به دۆنم خاک فڕاندن ..
نە لە لاسایی دیکتاتۆرەکانی مێژوو ..
کە ووشک بوونەوە و با بردنی وەکو مێروو ،
هیچ فێر نابن …
بێزار نابن ..
هەزار ساڵی تر هەڵمژن ،
داهاتووی میللەتێکی خێر نەدیو ..
بیکوژن ڕۆڵەی گەلێکی
لەوەتەی هەیە دڵتەزیو ..
بێزار نابن ،
ملیۆنێ ساڵی تریش ،
لە تێکدانی گوزەران و
ئەدەب و هونەر و جوانی ..
تێرنابن و ..بێزارنابن ..لە وێرانکردنی ئاوەدانیی ..
تێر نابن و بێزار نابن ،
لە سەرهەڵگرتنی سەدان هەزار گەنجی خەمبار و دڵشکاو ..
لە خنکانی سەدەهایان ..
له خۆ کوشتنی سەدان لاو ..
٭ ٭ ٭
بەڵام ئێمە زۆر بێزار بووین ..
بێزار بووین لە زاراوەکانی دەسەڵات ..دەستە ..ئەنجومەن ..کۆمپانیا .. حیزب .. تاوەری چۆڵ و هۆڵ ..
شانە ..خانە .. بزووتنەوە ..
ڕێکخەر ..ڕابەر ..
بێزار بووین لە ناوەکانی حوکمەت ..کابینە .. بودجە .. سروود ..پڕۆژە ..
هەواڵی قۆڕی بە پەلە ..
لە ناوی سەرۆک ..
لە پێشگری فەخامەت ..
لە پاشگری خوا بیهێڵێ ..
لە کادر و .. لە ئەندام و ..
چالاکوان و پەرلەمانتار ..
لە کەناڵ و بێژەر و ڕاگەیاندن ..
لە گومرک و لە نەوت..لە غاز ..
لە ووشەی خاڵی سنووریی ..
سەرکردایەتی.. لە وەزیر ..
لە هەڵبژاردن ..
لە دروشمی بریقەدار ..
بێزاربووین و ئەڕشێینەوە ،
بە بینینی لاندکرۆزەر ..
ڤێلا ..لەگزس ..
تاوەر ..مۆڵ .. ملیۆنان دۆلار ..
لە شەڕی پارتی و یەکێتی
لە شەڕی سۆفی و سەلەفی ..
لە شەڕە باڵ ..
بێزار بووین لە هەموو شتێ ..
هەمووی هەڵگرن بۆخۆتان ..
بەڵام توخوا کەی تێر ئەبن ؟
چ ساڵێ ئینتەلا ئەکەن ؟
کەی ئەڕۆنە هەوای خۆتان و ڕا ئەکەن ؟
بەڵام
هەرچی سەروەتی دنیایە ،
هی ئێوە بێ ،
نە تێر ئەبن
نە بە سەرۆکتان ئەزانین ..
گەر ڕۆژانە پەنجا نووسەریش تیرۆر کەن ..
شەق لە سەری خوێندکار هەڵدەن ..
مامۆستا بکەن بە فتبۆڵ ..
هەر بە سەرۆکتان نازانین ..
هەرچی ئەڵماسی دنیایە ،
بە گەردنی مێینەکانتانەوە بێ،
کەسمان پێیان ناڵێین خاتوون ..
هەرچی سوپای دنیا هەیە ،
لە چوار دەورتان ئێشکگر بن ،
شەوێ بە ئارامیی نانوون ..
چونکە ئەزانن ..
چاک ئەزانن ،
نەک هەر میللەت ،
درەخت و بەردیش
بێزار بوون ..
ناچارم دیسان پرسیار کەم ،
کەی بێزار ئەبن ،
لە سەفتە دۆلاری دزراو
لە ڕشتنی خوێنی دیل ..
دزینی موچەی فەرمانبەر ..
ڕاگرتنی ڕەوڕەوەی ئەدەب و هونەر ..
فرۆشتنی ڕەوشت و دین ..
خاک ..
هیوا ..
ئاوات ..
زانست ..
ئاڵا ..
کورد ..
ڕێزمان ..
شەرەف ..
کەرامەت ..
