چاوپیکەوتنەکەی ڤلادیمێر پوتین.. ڕزگار عومەر
هەفتەی ڕابردوو لە جوڵەیەکی زیرەك و بەرچاودا، ڤلادیمێر پوتین، سەرۆکی ڕووسیا بەشداری چاوپێکەوتنێکی لەگەڵ ڕۆژنامەنووسی ئەمریکی تاکەر کارلسۆن کرد، ئەمەش بووە هۆی سەرنج و مشتومڕی نێودەوڵەتی، بەشێك لە میدیای ئەمریکاو سیاسەتمەدارەکان ئەم ڕۆژنامەنوسەیان تەخوین کرد! گفتوگۆکە قووڵ بووەوە بۆ کۆمەڵێک بابەت، تێڕوانینێکی جیاوازی بۆ دیدگاکانی پوتین سەبارەت بە کاروباری جیهانی پێشکەش کرد. چاوپێکەوتنەکە 2 کاتژمێر و 6 خولەکی خایاند. سەرۆکی ڕووسیا نزیکەی 60 پرسیاری وەرگرت تەنیا لە 23 سەعاتی یەکەمدا ڕاستیەکی گەورەی سەلماند کە خەڵك ڕۆژئاوا تەنیا نایەوێ گوێ لە سەرکردەکانی خۆی بگرێت ، بەلکو دەیەوێ گوێ ی لەو بە ” دوژمن” کراوەیش بێت، چونکە چاوپێکەوتنەکە تەنیا لە ماوەی 23 کاتژمێردا زیاتر لە 150 ملیۆن جار بینراوە، پاش ئەوەی لە تۆڕی کۆمەڵایەتی ئێکس بڵاوکراوەتەوەو لەلایەن زیاتر لە860 هەزار کەسەوە “لایک” کرا. 269 هەزار جار دووبارە بڵاوکراوەتەوە.لە کەناڵی یوتیوبی ڕۆژنامەنوسکە زیاتر لە 8.3 ملیۆن جار بینراوە!
تەوقیتی چاوپێکەوتنەکە “گرنگییەکەی” زیاتر کرد، چونکە لە دۆخێکی پڕ لە گرژیی جیۆپۆلیتیکییەکان و نادڵنیاییە جیهانییەکان سازکرا. ئامادەیی پوتین بۆ پەیوەندیکردن لەگەڵ ڕۆژنامەنووسێکی ئەمریکیدا، ڕەنگدانەوەی هەوڵێکی دیپلۆماسییە بۆ پڕکردنەوەی دابەشبوونی نێوان ڕوسیاو نەیارانی. گرنگی ئەم جۆرە گفتوگۆیە ناتوانرێت کەمنرخ بکرێت، بەتایبەتی لە سەردەمێکدا کە زانیاری هەڵە و لە خشتەبردنی بەپلان دەتوانێت ململانێیە خوێناویەکان فراوانتر بکات.
لە ڕووی هەڵسەنگاندنی ئێستای پۆتیندا؛ سوچێکی گرنگی چاوپێکەوتنەکە، دەرك کردنی دووبارەی ڕۆڵی گرنگی میدیا بوو لە داڕشتنی ڕای گشتیدا. جەختکردنەوەی پوتین لەسەر گرنگی زانیاری دروست و ڕاپۆرتکردنی بێلایەن دەنگدانەوەی زۆری هەبوو، چونکە تیشکی خستە سەر پێویستی تێگەیشتنێکی هاوسەنگتر لە ڕووداوە جیهانییەکان بەلای کەمی گرنگی “دەرفەتی یەکسان” بۆ هەموو لایەك کە دەنگی بگات و هەروەهاش چاوپێکەوتنەکە توانی بەرپرسیارێتی ڕۆژنامەنووسان و ژۆرنالیزمی جدی لە دابینکردنی ڕووی دووەمی حەقیقەت بخاتەوە سەر مێزی پیشەگەریی ڕۆژنامەوانی. بەشێك لە نەیارانی پۆتین و سەرکردە سیاسیەکانی ڕۆژئاواو ڕەخنەگران دەڵێن:-
” ڕەنگە ئەو چاوپێکەوتنە خزمەتی بە ئەجێندای سیاسی پوتین کردبێت بە ڕەخساندنی سەکۆیەک بۆ ئەوەی ئەویش گێڕانەوەی خۆی بخاتەڕوو. بە پێچەوانەی ئەمش هەندێکی دیکە پێیان وایە چاوپێکەوتنەکە بەشداری کردووە لە بنیات نانی تێگەیشتنێکی گشتگیرترو نزیکتر لە دیدگای ڕووسیا، کە ڕەنگە ئەم چاوپێکەوتنە ڕێگا خۆش بکات بەلای کەمی لە نێو ڕای گشتی جیهانیدا کە لەبەردەم جەنگی خوێناوی و بەردەوامدا پرسی گەڕانەوە بۆ دیبلۆماسیەت بە هێزتر بکات.
چاوپێکەوتنەکەی پوتین لەگەڵ تاکەر کارلسۆن بێ پەردە دیدێکی جیاوازی ڕەخنەگرانەی لەسەر دۆخی پەیوەندییەکانی ئەمریکا و ڕووسیا و ڕۆڵی میدیا و پرسە جیهانییەکان هێنایە ئاراوە. پرسیارو وەڵامی ڕاشکاوانە لە نێوان سەرۆکی ڕووسیا و ڕۆژنامەنووسە ئەمریکییەکەدا، وردەکارییەکی گرنگی لە ئاڵۆزییەکانی دیپلۆماسی نێودەوڵەتی پێشکەش کرد و لەوێ جەخت لەسەر گرنگی گفتوگۆی کراوە لە ڕووبەڕووبوونەوەی ئەو دۆخانە کردەوە کە جیهانی نقوم بووی ئەمڕۆمان پێناسە دەکەن.ئەم جۆرە چاوپێکەوتنانە ڕۆڵێکی گرنگ دەگێڕن لە کردنەوەی دەرگای داخراوی دیالۆگ، دەرگایەك کە کەم نین ئەو سەرکردە جیهانیانەی دەیانەوێ قفڵەکانی تۆکمەتر بکەن!
