دوو پەخشانە شیعر.. نوسینی: هێدی گەڵاڵی
!! بۆ ئەوڕۆژانێك بوو بارانی چاوەكانم لە پێناو سنەوبەری باڵاتا زرێبارێک لە عەشقی دروست دەکرد..
بۆ هەمیشەش لە دووریتا سیەکانم دەرگا واڵا بوو بۆ میوانداری هەناسەی پەنکخواردو و قەتیسماوی ناخ و دەروونت..
ئاخ دووری و دابڕان بۆچی هێندە ئازار بەخشی بۆ ئەو عیشقەی ساڵانێكە كۆچی كرد .. عیشقێک لەگەڵ ترپەکانی دڵ ئاوێتەی یەكتر دەبوون و بێ یەكتر هەڵیان نەدەكرد..
تۆ ؛ لە دیدی من ئەمێستاكەش بەقەد باڵی پەپوولە ناسكی!
بە قەد عاشق بۆ مەعشوق پڕ هەستی !
بەقەد باڵای دار سنەوبەر شەنگی!
بەقەد دەروێش بۆ تەریقەت مەستی!
ئاخر ئێمەی عاشق بە دوو جەستە تەنیا دڵێکمان هەبوو..
لە دوو باخچەی ئەڤیندا تەنیا گوڵێکمان هەبوو..
لە بری دوو هزر تەنیا یەک هزرو یەک دیدمان هەبوو!
بێدەستەڵاتم لە ئاست هاڵاوی هەناسەم؛چونکە جگە لە هەناسەی ئەوینی تۆ هەناسەی ئاسایی هەڵناکێشێ!!
من چی بکەم شەوان کە سەیری ئاسمان دەکەم دڵم بە بینینی مانگ و ئەستێرەکان خۆشە؛چون دڵنیام کە تۆش وێنەی من لە ژێر هەمان ئاسمانیت و سەیری مانگ و هەسارەکان دەکەیت. هەموو شەو ڕۆژێکیش یەک خۆرو مانگ و ئەستێرە دەبینین هاوکات یەک پڕشنگ و یەک تیشک و یەک ڕۆشنایی!!!!
بەڵام گیانە ؛ دوای ساڵانێک عاشقبوون بووین بەو سەرابەی کە هەرگیز پێی ناگەین …
بووین بەو گوڵەی لە باخچەی تەمەنمان هێدی هێدی زریان بردی!!
بووین بەو وشکە ساڵیەی لە تینوێتیدا عەشق شکاندی!!
لەگەڵ هەموو ئەو دووری و دابڕانە ئەبەدیەی نێوانمان هێشتا عەشق و ئەوینمان بە زیندوویی لە ئەرشیفی دڵدا ماوەتەوە؛ چونکە عەشق ئەو کاتە بە زیندوویی دەمێنێتەوە کە لە پێناویدا ئازار بچێژیت ، بەڵێ ئازار بچێژیت !
ئازاری دووری …..
ئازاری دابڕان…..
یاد نامەپاش دوورکەوتنەوەیەکی مەودا فراوانی من و تۆ ، هێشتا خۆشەویستیم بۆ تۆ بە موتوربەکراوی ماوەتەوە..
هێشتا بیرەوەری ساڵانی تەمەنی بەسەرچوومان وەک درەختێکی هەمیشە سەوز لە کێڵگەی دڵدا ڕەگی داکوتاوە…
هێشتا ڕێی ئەڤینداریمان شوێن پێی تۆی پێوە دیارە لە هەر کوێیەک لە هەر سوچێکی ئەم دنیایە بیت شێوەت دەکەم!!
لە قەد دیواری ژووری دەرووندا وێنەت هەڵواسراوە و هەموو چرکەساتێک سیمات دەبینم …
کە سەیری ئاوێنەی ڕاڕەوی ژووری میوان دەکەم ڕوخساری گەش و کوڵمەی ئاڵی ئەوسات بەدی دەکەم و چاوە گەشەکانت دەبینم..
خەندەی لێو و ددانی ورد و قژی خاو و گۆنای گەشت دەبینم…
ئەو ساتانە نەک هەر هەستەکانم تەنانەت نەست و بێ ئاگایشم بە ئاگا دێتەوە و روح و ناخیشت دەبینم…
ئێستاش دڵخۆشیم بەوە دەدەمەوە کە تۆ لە ژێر هەمان ئەو ئاسمانەی کە لێتەوە نزیکم!
نزیکین هێندەی نێوان روح و جەستە ..
نزیکین هێندەی چاو و سۆمای بینین…
نزیکین هێندەی ترپەکانی دڵ و هەناسەمان…،بەڵام گیانە
لەگەڵ هەڵکشان و ڕۆچونی تەمەندا؛
چیرۆک و دیرۆکی ڕۆژانەی عەشقمان لە پەڕاوی یاد و ساڵنامەی خۆشەویستیماندا نوسراوەتەوە..
یادگاریەکان ، بیرەوەریەکان ، قسە خۆشەکان، ناز و عیشوە و تەنانەت زویربوونەکانیشت لە بیرەوەری یادەکانم ئەلبووم و ئەڕشیف بووەو لە هزر و ئەندێشەم هەڵگیراوە و ڕۆژانەش بە یادی جارانەوە بە چاوی دڵ سەیری ئەو ئەلبوم و ساڵنامەیە دەکەم کە تەواوی ڕۆژ و مانگ و ساڵانی خۆشەویستیمان تێدا تۆمار کراوە…!!
