خۆشم دەوێی.. شەماڵ بارەوانی

خۆشم دەوێی
خۆشەویستی ئازادیخوازێک
بۆ سەورەکەی
پابەندم پێتەوه
پابەندی بارانێک بۆ هەورەکەی

خۆشم دەوێی
خۆشەویستی نازیزمێک بۆ فیکرەکەی
لەوێردی عیشقدام و
پابەندم پێتەوە
پابەندی دەروێشێک بۆ زیکرەکەی

خۆشم دەوێی
خۆشەویستی دیلێک بۆ سەربەستی
بێزارم لە دووریت
بێزاری گرتییەک لەو زنجیرەی هەردوو دەستی

خۆشم دەوێی
خۆشەویستی شاعیرێک بۆ چامەکەی
پابەندم پێتەوە
پابەندی نووسەرێک بە خامەکەی

خۆشم دەوێی
خۆشەویستی ستالین بۆ ستەمەکەی
پابەندم بێتەوە
پابەندی یاریزانێک بە گەمەکەی

بێزارم لە دووریت
بێزاری خەمبارێک لە خەمەکەی
ڕقم لە ڕقتە
بەقەد ڕقی
کازیوەی سپێدەیەک لە تەمەکەی

خۆشم دەوێی
خۆشەویستی لۆکە بۆ نەرمییەکەی
بێزارم لە نەهاتنت
بێزاری مانگی تەممووز لە گەرمییەکەی

خۆشەم دەوێی
خۆشەویستی کۆترێک بۆ هێڵانەکەی
بێزارم لە بێزاریت
بێزاری عاشقێک لە ناپاکی و جێهێڵانەکەی
پابەندم پێتەوە

پابەندی جووتیارێک بە زەویکێڵانەکەی

خۆشم دەوێی
خۆشەویستی ماسییەک بۆ ئاو
پابەندم پێتەوە
پابەندی گوڵبەڕۆژەیەک بۆ هەتاو
بێزارم لە بێزاریت
بێزاری کەپیتاڵیستێک
لە مارکس و لەنین و ماو

خۆشم دەوێی و پابەندم پێتەوە
وەک پابەند بە مــرۆڤبوونەکەی بـودا
خۆشم دەوێی خۆشم دەوێی بەقەد خــودا

شەماڵ بارەوانی