گه‌مه قورسه‌كه نزیك بۆته‌وه -١- ….. سه‌ردار جاف
( به‌شی یه‌كه‌م / به‌رایی )
ئه‌و ره‌وشه سیاسییه ئاڵۆز و چڕوپڕ و ته‌ونی جاڵجاڵۆكییه رووی له خۆرهه‌ڵاتی ناوین كردووه، و كوردیش یاریزانێكی باش یان خراپی نێو ئه‌و گه‌مه قورس و قووڵ و گه‌وره‌یه‌یه، كه رۆژ دوای سه‌ختتر و ئاڵۆزتر ده‌بێت، ئاخۆ سه‌ره‌تای كۆتایی هاتنی سایكس _ پیكۆی سه‌ده‌یه‌ك له‌مه‌وبه‌ره ، یا نه‌خشه رێگایه‌كی تازه‌یه به پێی سیسته‌ماتیكی گونجاو له ته‌ك بیرو دیده جیاوازه‌كانی وڵاتانی زلهێز و هێنانه كایه‌ی رێكه‌وتنێكی دیكه‌یه له باره‌ی ده‌ڤه‌ره‌كه‌وه یان ده‌سكاریكردنی چه‌ند به‌ندێكی سایكس _ پیكۆ ده‌بێت، به هه‌ر حاڵ گۆڕانێك روو ده‌دات و هه‌موو جگه له وڵاتانی هه‌رێمایه‌تی پێ ده‌چێت هه‌موو كۆك بن، ئیره بۆته جمه‌ی ته‌واوی جڵه‌و كێش و له‌شكركێشی وڵاتانی دونیا، سه‌ره‌رای ئه‌وه هه‌ره‌شه گه‌وره‌كه له‌م سنووره‌وه وا نیشانی ده‌ده‌ن دوور بێت و به‌رده‌وامیش باس له ته‌نگژه و قه‌یرانێكی سه‌ربازی و سیاسی گه‌وره‌ی وه‌ك هه‌ره‌شه‌كانی سه‌رۆكی كوریای باكووری هه‌رزه و گه‌نج ده‌بێته مانشێتی هه‌واڵه پڕ قه‌یراناوییه‌كان، كه‌چی پێ ده‌چێت ئه‌وه‌یش له نێو گه‌مه‌كه‌دا یاریزانێكی دیكه‌ی سه‌رنج راكێشی په‌یگیرانی ره‌وشی سیاسی جیهانی بن ….
ماوه‌یه‌كیش سه‌رنجی دونیا به‌لای قه‌یرانی قه‌ته‌ر و وڵاتانی كه‌نداو ته‌نگژه‌ی لاگیری ئه‌م وڵاته له گروپه توندئاژۆكانی ناوچه‌كه نیشان دا، گه‌مارۆكان و گه‌یشتنه ئاستی به‌كارهێنانی هێزی سه‌ربازی وای كرد، ئیران ده‌رگای ئابلّوقه‌ی ئابووری له رێی ده‌ریاوه به رووی قه‌ته‌را بكاته‌وه و توركیایش له رێی ئاسمانه‌وه هه‌م ده‌رگای گه‌مارۆی ئابووری بكاته‌وه هه‌م هێزی سه‌ربازیش، له هه‌موو حاڵه‌ته‌كانیش ئه‌وه مه‌به‌ست بووه توركیا و ئێران له‌و چوارچێوه‌یه بئاڵێنن، تاوه‌كو ئالۆسكاوی ناوچه‌كه ئه‌و دوو وڵاته زیاتر بگرێته‌وه وه‌لێ وا هه‌ست ده‌كرێ پێویسته قه‌باره‌یان بچوك بكرێته‌وه و په‌لهاویشتنیان بۆ ناوچه‌كه به‌رته‌سك و نه‌مان بكرێته‌وه، بنه‌مایه‌كیش له سیستماتیكی جیهانیدا هه‌یه هه‌ر شه‌ڕێكی گه‌وره بۆته مایه‌ی بچوك كردنه‌وه و بڕینی ده‌ستی چه‌ندین وڵات له داگیركردنی وڵاتان و قورخكردن و به‌رته‌سك كردنه‌وه‌ی له چوارچێوه‌ی دوو یا نسێ ده‌وڵه‌تێكی زلهێز و دواجار و له كۆتاییشدا له یه‌ك وڵاتدا په‌نگ بخواته‌وه، رێك ئه‌و گوته‌یه جێبه‌جێ ده‌كرێ كه ده‌لێ (( په‌رت بكه سوود وه‌رگره )) بۆیه په‌رتكردنی وڵاتانی ناوچه‌كه پێده‌چێ مه‌حاڵ نه‌بێت هه‌نگاوه‌كان ده‌ستی پێكرد بێت.
