Skip to Content

چەند شیعرێکی جۆزێف ستالین (سۆسیلۆ).. و: گۆران عەبدوڵڵا

چەند شیعرێکی جۆزێف ستالین (سۆسیلۆ).. و: گۆران عەبدوڵڵا

Closed
by كانونی دووه‌م 21, 2025 General, Poems

نینیکای پیر..

نینیکای ئێمە پیرە
ئازایەتی بەجێی هێشتووە…
چۆن پیری توانی
هێزە ئاسنینەکەی لێ بستێنێت!
هەرجارەی کە دەتبینی
بە چالاکییەکی خێرا
لە دۆڵەکەدا داسەکەی دەجووڵاند
بە لێهاتوویی و بەهێزەوە
شاخی لەسەر شاخ کەڵەکە دەکرد
لەو گەنمەی کە دەیبڕی،
هەتا ڕووە ئارەقاوییەکەی
سوور هەڵدەگەڕا!..
ئێستا تەنانەت ناتوانێت
قاچە بێهێزەکانی بجووڵێنێت.
بێ جووڵە ڕاکشاوە و زۆر خەون دەبینێت،
یان چیرۆکی ڕابردووی بۆ نەوەکانی دەگێڕێتەوە…
هەندێک جار کاتێک گۆرانییەک دەبیسترێت
لە دۆڵە نزیکەکانەوە،
دڵە ئازاکەی هێشتا
بە خێراتر لێدەدات؛
سەرەڕای لاوازی هەڵدەستێت،
پاڵ بە گۆچانەکەیەوە دەدات،
بە دڵخۆشییەوە سەیر دەکات و
بۆ کوڕەکە پێدەکەنێت…

سۆسیلۆ
کڤالی، تەمموزی ١٨٩٥


وەک سێبەرێک دەسووڕێتەوە
بە جیهاندا
لەم دەرگاوە بۆ ئەودەرگا؛
پاندورێکی* بەڕووی لە دەستدایە
و بە نەرمی دەیژەنێت؛
دەنگەکەی پڕە لەخەون
وەک تیشکی خۆر،
دەتوانی راستی و
خۆشەویستی خودایی ببیستی.
زۆرێک لە دڵە بەردینە بەستووەکان
دەستیان کردەوە بە لێدان،
مێشکە تاریکەکان
جارێکی تر روناکییان بۆ گەڕایەوە.
بەڵام لە جیاتی سوپاسگوزاری
بۆ دەنگە شیرینەکەی وەک خۆشەویستی،
خەڵکەکە بۆ میحرابەکەیان بەکێشکرد
پیاڵەیەکی پڕ لە ژەهریان دایە دەستی
پێیانووت: “بیخۆرەوە ئەی نەفرەت لێکراو
بۆ تەواوبونی چارەنووست!
ئێمە نەپێویستمان بە ڕاستییەکەتە،
نە دەنگە ئاسمانییەکەشت!”

سۆسێلۆ
لە: ئیڤێریا، ٢٥ی کانوونی یەکەمی ١٨٩٥


بۆ مانگ

ماندونەناسانە بڕۆ پێشەوە
سەرت شۆڕ مەکەوە،
هەورە تەماوییەکان بڕەوێنەوە،
فەرمانی پەروەردگار جووانە.
بزەی نەرمت بنێرە بۆ زەوی
کە لەژێر پێتدا ڕاخراوە،
لایەلایە بۆ لووتکە سەهۆڵاوییەکان بچڕە
کە بە ئاسمانەوە هەڵواسراون.
دڵنیابە ڕۆژێک لە رۆژان
تەنانەت بێبەشکراو و چەوساوەکانیش
هێز دەدۆزنەوە بۆ سەرکەوتن
بۆ چیای پیرۆز
هیوا پشتیوانیانە.
بەردەوام بە لە درەوشانەوە ئەی جووان،
لەناو هەورەکاندا وەکوو جاران،
تیشکە دڵڕفێنەکانت بهاوێژە
لە میانەی ئاسمانی شینەوە.
منیش، یەخەی کراسەکەم دەکەمەوە
سنگم بۆ مانگ ڕووت دەکەمەوە،
دەستەکانم درێژ دەکەم و
گۆرانی شکۆمەندی بۆ تیشکی مانگ دەچڕم.

سۆسێلۆ
ئیڤێریا، ١١ی ئۆکتۆبەری ١٨٩٥


کاتێک مانگی درەوشاوە
بەسەر ئاسماندا دەخلیسکێت،
ئاسۆ ڕووناک دەکاتەوە
بە تیشکە پرشنگدارەکەی؛
کاتێک جریوە جریوی چۆلەکەکان
بە نەرمی لە هەوادا دەنگدەداتەوە،
کاتێک دەنگی نەرمی فلووت
دەگاتە لووتکەی چیا؛
کاتێک ڕاکردووی دوورخراوە لە ماڵ
ئازادە بگەڕێتەوە بۆ
وڵاتە بریندارەکەی،
کاتێک نابینایەک
دیسانەوە دەتوانێت مانگ و خۆر ببینێت؛
ئەوسا منی ئازاردراو، خەمم بەجێدێڵم،
لە دڵە هەژارەکەمدا
هیوا دووبارە دەردەکەوێتەوە
بۆ داهاتوویەکی گەشاوە؛
گیانم دڵخۆش دیارە،
دڵ ئارامە،
بەڵام ئایا ئەم هیوایە ڕاست دەردەچێت
کە ئەمڕۆ پڕی کردووم؟!

سۆسێلۆ
ئیڤێریا، ٢٢ی سێپتەمبەری ١٨٩٥


خونچەی گوڵی سوور گەشایەوە
گوڵەوەنەوشە تێکئاڵان،
گوڵە سەوسەن گەشایەوە
سەوزایی بە شنە بەخشی.
کڵاوکوڕە ئاوازی خۆی چڕی
لە بەرزایی هەورەکاندا.
بولبول بەشداری کرد
لە گۆرانی شادمانیدا:
“گەشە بکە، وڵاتە جوانەکەم،
خاکی ئیبێریا، بگەشێوە و سەرکەوتوو بە!
تۆش، جۆرجیا، خوێندەوار و گەشاوە بە
ئەو زانیارییە بەدەست بهێنە کە نیشتمانەکەت پێویستیەتی!”

ئای. جەی-شڤیلی
ئیڤێریا، ١٤ی حوزەیرانی ١٨٩٥

https://www.stalinmuseum.ge/stalin-poems/

  • ئالەتێکی مۆسیقایە

mm

نووسەر و رۆژنامەنووس نەوزاد مدحت ناسراو بە (گۆران عەبدوڵڵا) لە شاری کەرکوک لە دایک بووە خوێندنی لە( ئامادەیی ثورە) تەواو کردووە، دوواتر لە پەیمانگای هونەری موسڵ بەشی موحاسەبە وەرگیراوە. بەهۆکاری نەچوونە جەیشی شەعبی لە دووا قۆناغ فەسڵکرا. وەک کەسێکی سیاسی و ناڕازی درێژەی بە کاری سیاسی خۆی دا، لە پاش ڕاپەڕین لە شاری هەولێر یەکێک بووە لە دامەزرێنەرانی یەکێتی بێکاران و ئەندامی دەستەی نووسەرانی رۆژنامەی( دەنگی بێکاران) بووە تا ناوەڕاستی ساڵی ١٩٩٥. لە ١٩٩٦ ەوە نیشتە جێی وڵاتی کەنەدایە. لە ١ی حوزەیرانی ٢٠٠٢ وە ماڵپەڕی دەنگەکانی(www.dengekan.com) وەک رۆژنامەیەکی ئەلیکترۆنی رۆژانە دامەزراندووە وە تا ئێستاش بەردەوامە. لە ٢٠٠٥ بەشی وێب پەیج دیزاینی لە (Durham computer & Business college) تەواوکردووە.

Previous
Next
Kurdish
Powered by TranslatePress