دیدارێک لەگەڵ هونەرمەند جەبار سابیر.. سازدانی: بانیژەی ئەدەب و کلتوور

زۆرجار تابلۆیەکی هونەریی، یان کاریکاتێرێکی هونەرمەند جەبار سابیرم بەرچاو کەوتووە. هەموو جارێکیش چاوێکم لەکارە هونەرییەکە کردووە. بەڵام لەمڕۆژانە کاریکاتێرێکی جەبار سابیر (جوایەزیی چینایەتی) لەماڵپەڕی(ئەمڕۆ) ڕای وەستاندم و بۆ ماوەیەک بەدیار کارە هونەرییەکەوە ڕامام. ئەوسا چوومە سەر لاپەڕەی هونەرمەند و گەشتێکم بەنێو کاریکاتێر و تابلۆ هونەرییەکانیدا کرد، کە بەڕاستی جیهانێکی جوان و سەراسیمە، پر لە پەیامی کۆمەڵایەتی و ئینسانیی، لێوڕێژ لە سەلیقە و جوانیی بوو. منیش پەیوەندیم پێوە کرد تا ئەم دیدارەی لەگەڵدا ساز بکەم و ئەویش بە خۆشحاڵییەوە داواکەی قەبووڵ کردم.
بانیژەی ئەدەب و کلتوور : سەرەتا زۆر سوپاست دەکەم بۆ قەبووڵ کردنی ئەم دیدارە. با لەو گۆشەنیگایەی جۆرج بلیخانۆفەوە کە دەڵێت( هونەر ئاوێنەی ژیانی کۆمەڵایەتییە) دەست پێبکەم و بپرسم کە ئایا هونەری کاریکاتێر پێویستە لەکوێی ژیان و کۆمەڵگەوە بێت؟ واتا پەویەندی نێوان ژیانی کۆمەڵایەتی و هونەری کاریکاتێر چۆن دەبینن؟

جەبار سابیر:سەرەتا دەست خۆشیتان لێ دەکەم بۆ ئەم دیدارە کە دەربارەی هونەری کاریکاتێرە. کاریکاتێر کە بەشێکی گرنگی ڕۆژنامەوانییە و لە هەمان کاتدا بەشێکی گرنگی هونەری شێوەکارییە، کە ڕاستەوخۆ کاریگەری دەکاتە سەرخوێنەر و بینەری وێنە کاریکاتێرییەکان کە لە شێوەی دەڕبڕینیان وێنا کردنیان سەرنجڕاکێشن و بە بێ دەنگی هاوار دەکات و کۆمەڵگە بەئاگا دێنێت لەو دیاردە شاراوانەی کە کەسانی تر لێیان ونە کە ڕاستەو خۆ پەیوەندی بە ژیانی ڕۆژانەو هەمیشەیی کۆمەڵگەوە هەیە وە کاریکاتێرست وا بەرجەستەی دەکات بە جۆرێک لە گۆشەنیگایەکی سەرنجڕاکێش وێنەیان دەکێشێ کاریگەری لەسەر بینەر دروست دەکات .

بانیژەی ئەدەب و کلتوور : بەبۆچوونی ئێوە کاریکاتێریستی داهێنەر و سەرکەوتوو بەچی دەناسرێتەوە و تایبەتمەندییەکانی کاریکاتێریستی داهێنەر چین؟
جەبار سابیر: هونەرمەندی کاریکاتێرستی بە توانا و داهێنەر و سەرکەوتوو دەبێت کەسێکی زۆر بە ئاگاو هۆشیار و بوێر بێت لە بەرامبەر دیاردە ناڕێکەکانی کۆمەڵگە بەگشتی، وە بتوانێت بە ئازادی هێڵە گەرمەکانی کاریکاتێرەکە وێنا بکات و بیانکێشێ وە هەروەها لەگەڵ ئێش و ئازاری گۆمەڵگە بژێت بابەتە گەرماوگەرمەکان بوروژێنێ بۆ ئەوەی بەدووا داچوون و چارەسەریان بۆ دەستەبەر بکرێ.

بانیژەی ئەدەب و کلتوور : تەکنەلۆژیا و جیهانی دیجیتاڵ چ کاریگەرییەکیان لەسەر هونەری کاریکاتێر داناوە؟ ئایا دنیای دیجیتاڵ ئەم هونەرەی لە ڕۆژنامەکان سەندووەتەوە؟
جەبار سابیر: تەکنەلۆژیا و جیهانی دیجیتاڵی سوودێکی زۆری هەیە بۆ کاریکاتێرست لەڕووی وێنەکێشان و بڵاوکردنەوەی کاریکاتێرەکان و بەجیهانی کردنیان بە ئاسانی و زووتر بڵاوکردنەوەیان بۆ بەرچاوی هەموو جیهان لە ڕێی ماڵپەڕو تۆڕەکانی پەیوەندییە کۆمەڵایەتییەکان، وە بە ئاسانی توانیویەتی ببێتە پردی پەیوەندی نێوان دام و دەزگا ڕاگەیاندن و میدیا و ماڵپەڕ و تۆڕە کۆمەڵایەتییەکانی جیهان و ناو خۆ وە توانیویەتی پەیوەندی گرنگ لە نێوان هونەرمەندان و ناوەندەکانی هونەری درووست بکات و سوود لە هەموو نوێکاری و داهێنانێکی نوێ وەربگیرێ. هەروەها هونەرمەند ئاگاداری هەموو پێشبڕکێ و پێشانگا جیهانییەکان بێت و بتوانێت بەشدارییان بکات. هەروەها لایەنی نەرێنی هەیە لە کاتێک بە نادرووستی بەکار بهێنرێت. بەڵام تەکنەلۆژیاو جیهانی دیجیتاڵی کاریگەری لەسەر تەواوی ڕۆژنامەگەری(چاپ کراو)هەیە نەک کاریکاتێر بەتەنیا، جیهانی دیجیتاڵ ئەو هونەرەی لە ڕؤژنامەکان نەسەندۆتەوە، تا ئێستاش زۆربەی زۆری ڕۆژنامە و گۆڤارە جیهانییەکان گۆشەی کاریکاتێریان هەیە و گرنگییەکی زۆری پێ دەدەن و یا گۆڤاری تایبەت بەکاریکاتێریان هەیە ، بەڵام بەداخەوە ڕۆژنامەکان و گۆڤارەکانی کوردستان زۆر گرنگی نادەن بە کاریکاتێر کە بەشێکی گرنگی ڕٶژنامەیە کە خوێنەر لەدوایی ماندووبوونی خوێندنەوە لە گۆشەی کاریکاتێر بتوانێت پشوویەک بدات .
بانیژەی ئەدەب و کلتوور : هونەر وەک دیاردەیەکی کۆمەڵایەتی ناکەوێتە دەرەوەی ململانێی چینایەتییەوە. بەبۆچوونی ئێوە هونەر لەنێو ململانێی چینایەتی چۆن دەتوانێت گرەوی شۆڕشگێڕبوون بباتەوە؟
جەبار سابیر: هونەر بە هەموو جۆرەکانییەوە بەشێکی گرنگی ژیانی ڕۆژانەی کۆمەڵگەیە و ڕەنگدانەوەی کلتوور و خۆشی و ناخۆشییەکانی تاک و کۆمەڵگە بەرجەستە دەکات و لە شێوەی دراما یان شانۆگەری یان دەڕبڕینی بە مۆسیقاو گۆرانی و هەڵپەڕکێ و لاواندنەوە وەیان لەشێوەی تابلۆیەک یان کاریکاتێرێک یا هەر بواراێکی تری هونەر. حەتمەن کاریگەرییەکانی چینایەتی لە کۆمەڵگە زۆر بە زەقی ڕەنگی داوەتەوە لە هونەری بەرەنگاری و جیاکاری و شۆڕشگێڕی وە توانیوەیەتی کێبڕكێ بکات بۆ بەدەست هێنانی گرەوی ململانێی چینایەتی و ستەمی جیهانی سەرمایەداری و زولم و زۆرداری ، وە بەردەوام کار لەسەر هۆشداری و بە ئاگایی کۆمەڵگە دەکات و بێ لایەن نییە لە کێشەو گرفەکانی کۆمەڵگە.

بانیژەی ئەدەب و کلتوور : چ خوێندنەوەیەکتان بۆ گرفت و ئاستەنگەکانی بەردەم هونەری کاریکاتێر هەیە و چۆن دەتوانرێت چارەسەر بکرێن؟
جەبار سابیر: گرفتی هەرە گەورەی بەردەم هونەری کاریکاتێر لە چەند خاڵێک خۆی دەبینێتەوە:

• نەبوونی پانتایەکی ئازادی ڕەها کە هونەرمەند بتوانێت تەواوی کێشەو گرفتەکانی ناو کۆمەڵگە بڕوژێنێ .
• نەبوونی ( پیشەی ) کاریکاتێرستی ،بۆ ئەوەی ببێتە سەرچاوەیەک بۆ دابین کردنی ژیانی ڕؤژانەی هونەرمەند تابتوانێت درێژە بەو هونەرە بدات و داهێنانی تێدا بکات .
• گرنگی نەدانی ڕۆژنامەو گۆڤارەکان و میدیا بەو بەشە گرنگەی ڕۆژنامەگەری و هونەر .
• نەبوونی بەشێکی خوێندن لە کۆلێج و پەیمانگا هونەرییەکان بۆ بە ئەکادیمی کردنی ئەم هونەرە .
• نەبوونی یارمەتی بۆ کردنەوەی پێشانگا و بە چاپ گەیاندنی بەرهەمەکانی هونەرمەند .
  بۆ چارەسەری ئەم کێشەو گرفتانە، پێویستە ئەو هونەرە گرنگی زیاتری پێ بدرێ و ئاشنا بکرێ بە کۆمەڵگە لە ڕێی گۆڤار و ڕؤژنامەکان و میدیا و سۆشیال میدیا وەگرنگییەکی زۆری پێ بدرێ لە لایەن دەسەڵاتەوە وە دەست خۆشی لە هونەرمەند بکرێ بۆ ووروژاندنی بابەتە نەرێنییەکانی دام و دەزگاکان و دیاردە ناڕێکەکانی کۆمەڵگە وە هەروەها بە ئەکادیمی کردنی ئەو هونەرە لە کۆلێج و پەیمانگاکان، بکرێتە پیشەیەک بۆ ئەوەی هونەرمەند بتوانێت داهاتی هەبێت و تایبەتمەند پێت بەو هونەرە گەشەی پێبدات.

بانیژەی ئەدەب و کلتوور : زۆر سوپاس و دەستەکانت خۆش بن. من پرسیاری ترم نییە و ئەگەر خۆت حەز بکەیت شتێک بڵێیت، فەرموو.
جەبار سابیر: زۆر سوپاس بۆ ئەم دیدارە ، گرنگیدانتان بە هونەری کاریکاتێر دەبێتە هاندەرێک و پاڵپشتێک بۆ هونەرمەند لەوەی کە درێژە بە کارەکانی بدات و هەوڵی بەرەو پێشچوونیان بدات.

بانیژەی ئەدەب و کلتوور : جارێکی تر سوپاس بۆ بەڕێزتان و هیوادارم هەر لەدا‌هێنان بەردەوام بن.
جەبار سابیر: سوپاس و دەست خۆشیتان لێ دەکەم بۆ ئەم دیدارە ، هەر سەرکەوتوو بن.

https://www.facebook.com/jabar64.saber/ ماڵپەڕی جەبار سابیر لە فەیس بووک