هاكا نیشتمانیش كۆچی كرد … زیاد ڕه‌شاد قادر
سه‌ر له ئێواره‌یه‌ك نیشتمانیش دیار نامێنێ
ئه‌ویش ئێره به‌جێدێڵێ
سه‌ر له ئێواره‌یه‌ك نیشتمانیش مشتێ له خۆڵی كه‌ركووك و
پارچه‌یه‌ك له پشدێنه‌كه‌ی عومه‌ر خاوه‌ر و
چه‌ند په‌ڕه‌یه‌كی زه‌ردباوی كتێبی شه‌ره‌فنامه
ده‌ئاخنێته نێو ده‌سرۆكه‌یه‌ك و
سه‌ری خۆ هه‌ڵده‌گرێ بۆ سه‌ر زه‌مین و كیشوه‌رێكی دوور دوور
***
نیشتمان به‌دوای شه‌وی ئارام و
ژیانی سه‌قامگیر و
كاره‌بای هه‌میشه‌یی و
پارك و موچه و مه‌عیشه‌تی خۆیدا ناگه‌ڕێ
نیشتمان له داخی نه‌خۆشكه‌وتنی كوردایه‌تی و
زامداربوونی ئینیتیما و
بیماریی هه‌ست و هه‌ڵوێستی ڕۆڵه‌كانی و
بێ شه‌هامه‌تیی هه‌ندێ له ئاغاكانی سه‌ر هه‌ڵده‌گرێ
ئه‌و له ده‌ستی چه‌ته‌كان هه‌ڵدێ
كه ڕه‌ز و كێڵگه و باخه‌كانی ده‌سووتێنن
ئه‌و له چنگی ئه‌و قومارچییانه ڕاده‌كا
كه ڕۆژ تا ئێواره
جوانییه‌كانی وڵات ئه‌تك ده‌كه‌ن
نیشتمان له خه‌فه‌تی ئه‌و نه‌خوێنده‌وارانه كۆچ ده‌كات
كه زمان و كلتوور و یاسا و ژینگه و سه‌راپای وڵات
وێران ده‌كه‌ن…
***
چه‌ند ڕۆژێ دوای دیار نه‌مانی نیشتمان
هه‌موو سه‌رۆكایه‌تی و ئه‌نجوومه‌ن و ده‌سته و دامه‌زراوه‌كان
دوای ڕاوێژ له‌گه‌ڵ سه‌ندیكا و ڕێكخراوه‌كانی كۆمه‌ڵی مه‌ده‌نی و
خوێندنی باڵای وڵات و یه‌كێتی زانایان و
پاش قسه‌كردن له‌گه‌ڵ دۆستانی ناوخۆ و ئیقلیمی و نێوده‌وڵه‌تی
له مه‌راسیمێكی گه‌وره‌دا
مه‌راسیمێكی زۆر زۆر گه‌وره‌دا
كه هه‌موو میدیای دونیای تێدا بانگهێشت كراوه
واژو له‌سه‌ر خه‌رجكردنی
بودجه‌یه‌كی ته‌رخانكراوی تایبه‌ت ده‌كه‌ن
بۆ ئه‌وه‌ی
بڕیار بده‌ن
له ماوه‌یه‌كی نێزیكدا كۆببنه‌وه و
چه‌ند لیژنه‌یه‌ك پێكبَێنن
سه‌باره‌ت بۆ هۆكار و ده‌ره‌نجامه‌كانی ڕه‌ڤینی نیشتمان
پێده‌چێ ئه‌و لیژنه تایبه‌تانه
تاوتوێی ئه‌وه بكه‌ن
له ئاینده‌دا
ئاینده‌یه‌كی زۆر دوور نا
بڕیاری ئه‌وه بده‌ن
نیشتیمانێكی ئه‌لته‌رناتیف
له ده‌ره‌وه هاورده بكه‌ن
بۆ ئه‌م مه‌به‌سته‌ش
پێده‌چێ كۆمپانیاكانی كه‌رتی تایبه‌ت ڕابسپێرن
زێتر ئه‌و كۆمپانیایانه ده‌گرێته‌وه
كه پله یه‌ك و تایبه‌تن و
ڕابردوویه‌كی سپی سپییان هه‌یه و
ڕۆڵی گه‌وره‌یان دیوه
له وه‌به‌رهێنان و ئاوه‌دانكردنه‌وه‌ی وڵاتدا
تا ئه‌گه‌ر گونجا
نیشتمانێك بۆ خه‌ڵكی به‌شه‌ره‌فی كوردستان بێنن و
پێشبینییش ده‌كرێ
نیشتمانه هاورده‌كراوه‌كه
له جۆری ئۆرگیناڵ بێ و
به‌رگه‌ی ئاهی گه‌رم و هه‌ناسه‌ی سه‌ردی به‌له‌نگازه‌كان بگرێ و
به هه‌ڵكشان و داكشانی دزی و درۆزنی و گه‌نده‌ڵی
دڵی تێكنه‌چێ و ڕه‌نگی هه‌ڵنه‌بزركێ
ئه‌وه‌نده‌ش شه‌رمبه‌خۆ بێ
تا ماوه‌ی گرێبه‌ستی مانه‌وه‌ی ته‌واو ده‌بێ
نه‌ڕوات و خه‌ڵكی به‌هه‌ڵوێست و
مه‌سئوولی پڕ به‌پێست و
دونیای ئۆف و عوتڵه و ڕێست
به‌جێنه‌هێڵێ…
زیاد ڕه‌شاد قادر
هه‌ولێر، پاییزی 2016
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
