قسەکەری بزوتنەوەی گۆڕان بەرپرسە حکومیەکانیەتی نەک پەرلەمانتارەکانی .. ئاسۆ کمال
هەموو حزبێک لە دەسەڵاتدا کردەوەکانی دەردەکەوێ. بزوتنەوەی گۆڕان لە دوو ڕۆژی ڕابردوودا لەشاری سلیمانی نیشانی دا کە هاوبەشی میلیشیاکانی یەکێتیە لە سەرکوتی خۆپیشاندەرانی موچەدا. ئەمە هەموو پڕوپاگەندە و بەیانەکانی ئەم حزبە و ئەندام پەرلەمانتارەکانی سەبارەت بە مافی هاوڵاتیان و پشتیوانی داوای موچەیان بە درۆ دەخاتەوە..
دروشمی ” نا بۆدەسەڵاتێکی ستەمکار، نابۆپەڕلەمانی کارتۆنی، نابۆ ئۆپۆزسێۆنی ساختە” پڕاوپڕ ڕوو بە قاڵبی بزوتنەوەی گۆڕانە و ئەبێت بەرامبەر بە گردی گۆڕان و پارێزگاری سلێمانی بەرزبکرێتەوە، چونکە گۆڕان هەم لە دەسەڵاتدا ستەمکارە و هەم کۆڵەکەیەکی پەرلەمانێکی کارتۆنیە و هەم ئۆپۆزسیۆنێکی ساختەشە.
گۆڕان لە دەسەڵاتدا ئەندازیاری بڕینی موچەیە وەک وەزیری داراییەکەیان، لە پەرلەماندا کارتی فشارێکن بۆ بەشی حزبەکەیان لە ئیدارە و داهات شەڕ دەکا و بونەتە بەشێک لە سیستمی دەسەڵاتدارێتی و پۆستی حکومیان پێ وەرگرتوە. لە ئۆپۆزسیۆنیشدا خەریکی هەڵخەڵەتاندنی خەڵکن بەوەی دزیەکانی دەسەڵات ئاشکرا دەکەن وەک عەلی حەمە ساڵح و بەڵام لەپاڵ یەکێتیشدا فەرمانی سەرکوتی خۆپیشاندەران دەردەکەن و لە پاڵ پارتیشدا لە شیرینی نەوت موچەی پلەباڵاکانیان دابین دەکەن.
ئەم ڕاستیانە زیانباری ئەو خۆشخەیاڵیە دیموکراسیانەی ڕۆشنبیرەکانی گۆڕانی ،وەک مەریوان وریا قانع، دەرخست ، کە ئەگەر لە جیاتی بنەماڵە حزبێکی مەدەنی و لە جیاتی وەزیرە حزبیەکان تەکنۆکراتەکان حکومەت بەڕیوە بەرن هیچ لە بەرنامەی حکومەت و چۆنیەتی دابەشکردنی موچە و خزمەتگوزارە گشتیەکان ناگۆڕێ و هەموویان لەسەر ئەو بەرنامە نیولیبرالیەی هەژارترکردنی هەژارەکان کۆکن و بە کردەوە پیادەیان کردوە لە کاتێکدا بەشێک بوون لە دەسەڵات یان ئەگەر ببنە بەشێک لەو دەسەڵاتە. هەرچۆن بینیمان کە وەزیرەکانی گۆڕان و ئیسلامیەکان لە پیش یەکێتی و پارتیەوە بوون بۆ سەپاندنی پاشەکەوتی موچە.
لێرەدا خەڵک گەیشتۆتە ئەو جێگایەی کە بەدوای بەدیلێکی تردا دەگەڕێ لەدەرەوەی ئۆپۆزسیۆنی بورژوازی و پەرلەمان..
ئاسۆ کمال
