Skip to Content

لە ئاوێنەی خەیاڵدا.. شیعری: ستیڤان شەمزینی

لە ئاوێنەی خەیاڵدا.. شیعری: ستیڤان شەمزینی

Closed
by January 31, 2021 General, Poems

من
لە قەسیدەیەکی بێ ناونیشان دەچم
رۆژگار ئەمنووسێتەوە
لە ئاوازێکی غەمگین ئەچم
مۆسیقارێکی سەرکەش دەیژەنێ
لە گوڵێکی سوور ئەچم
لە باخچەی عەشقدا سەوز بووە
لە گۆرانییەکی نامراد دەچم
لە قورگی تاساودا نایەتە دەرەوە
لە کۆترێکی تەریک و باڵشکاو ئەچم
هێلانەکەی بۆ ئەبەد لێ ون بووە
لە شاعیرێکی بێ هیوا و شێت ئەچم
تەنیا چیرۆکی نامۆیی خۆی دەنووسێتەوە
لە قەرەجێکی ئەسمەری بێ نیشتمان ئەچم
چوون لەم غەریبییە سەر ئەنێمەوە


ئەم غوربەتە
هەر رۆژەی پارچەیەک لە رۆحم دەوەرێنێ
ئەم غوربەتە
هەموو بەیانییەک گەڵایەک لە باڵام دەکاتەوە
ئەم غوربەتە
هەموو عەسرێ خەندەیەک لە لێوم دەدزێ
ئەم غوربەتە
هەموو ئێوارەیەک شادی لە خەیاڵەکانم دەتۆرێنێ
لەم غوربەتەدا
چاوەڕێم شەوێک تۆ بێی
لە دڵی پەروانەیی خۆتدا
گشت پارچە شکاوەکانی رۆحم کۆبکەیتەوە


هەموو شەوەکانم بێ تۆ یەڵدایە
یەڵدای من هەموو شەوێکە
شەوێک وەرە، کۆتایی بهێنە
بەو شەوە درێژانەی بڕانەوەیان نییە
شەوی یەڵدایە
سەدان شەو لە یەڵدای خۆمدا
بە دیار هاتنی تۆوە
مۆمی رۆحم داگیرساند
شەوی یەڵدایە
سەدان شەو لە تاریکیی بێ تۆیدا
بە کڵپەی پڕ گڕی دڵم
سەراپای جەستەی خۆم سووتاند


گەر تۆ بێی، چراکان خامۆش نابن، ئەستێرەکان کۆچ ناکەن
ئەگەر تۆ بێی دەریاکان لە شەپۆل ناوەستن، دەرگاکان داناخرێن
گەر تۆ بێی، شەو ماڵی بۆ پشتی تیشکی هەتاو دەگوازێتەوە
ئێوارە زەرد هەڵدەگەڕێ و سەری بۆ تاریکی گەردون هەڵدەگرێ
گەر تۆ بێی، من بەر لەوەی کراسی کۆچێکی سوور لەبەر بکەم
وەک مۆم، بۆ رووناکی هەنگاوەکانت هێدی هێدی ئەتوێمەوە


لە پەنجەرەی ژیانەوە سەیری مەرگ ئەکەم
لە نزیکەوە گۆڕی خۆم دەبینم
بە خەتێکی درشت لەسەری نوسراوە
ئەم لە رووبەڕووبوونەوەی مەرگدا ژیا
لە ململانێی ژیاندا مرد
دەمەوێ دوو دێڕی تریش زیاد بکەم
ئای چەند بارێکی قورس بووم لە تابووتی ژیاندا
هەروەک رەشەبا هاتم و بە چەشنی بروسکە تێپەڕیم
چەند سەفەرێکی کورت بوو، ژیان!!

Previous
Next