Skip to Content

بیابانی ڕۆح.. شەماڵ بارەوانی

بیابانی ڕۆح.. شەماڵ بارەوانی

Closed
by July 9, 2021 General, Poems

وەرزی خەزان دەستی پێکرد
و
پاییز جلی بەهارەی
لەبەر شیعرەکانم داکەنی

ئینجانەی وشەکانم
شەقار شەقار داگەڕا
و
هەڵۆی هەڵوەرین
لەسەر لوتکەی گوڵی خەونەکانم
نیشتەوە

کەتۆ ڕۆیشتی
تەمی ئازار
ئاسمانی خۆزگەکانمی داگرت
و
جادەی چاوەکانم
کوێری لێ ڕوا

زمانی قەڵەمم لاڵ بوو
و
درەختی تەمەنم
هێشووی پیری گرت

کەتۆ ڕۆیشتی
کەس نەما
لاوانەوەم بۆ بڕێسێ
و
کۆرپەی گریانم
ژیرکاتەوە

کەس نەما
حەوشەی فرمێسکم
گەسک دات
و
کۆتری تامەزرۆییم
بۆ هێڵانەی ئامێزی باتەوە

کەس نەما
بیابانی ڕۆحم
پڕکات لە نەمامی ئاوەدانی
و
لەتەنیایی خاڵیم کاتەوە
..
شەماڵ بارەوانی

Previous
Next