چرۆی پێنووسه‌كانتان مه‌ژاكێنن.. ستار ئه‌حمه‌د
چرایه‌ك داگیرسێنن
تریفه‌ی مانگ
ئاگری شه‌ڕ سووتانی
گولله‌یه‌ك .. له‌گۆڕ نێن
كۆرپه‌یه‌ك ..
رووباری كینه‌و خوێن خنكانی
……………………
نه‌مامێك بچێنن
قه‌ڵه‌مێك له‌پاڵیا چرۆی كردووه
ده‌رگه‌یه‌ك واز كه‌ن
خوێندنگه‌یه‌ك ..
بۆ خه‌نده‌ی مناڵان تینووه
…………………………
دوو ده‌ست ئاشتكه‌نه‌وه
په‌نجه‌یه‌ك
له‌بسكی نیوه شه‌و ئاڵاوه
رێگه‌یه‌ك گوڵ رێژكه‌ن
دێوانه‌یه‌ك
له‌خه‌ڵكی شاره‌كه‌ی جێماوه
……………………………….
سه‌ری مانگ ماچ بكه‌ن
كیژێك ….
قردێله‌ی مۆمێكی جه‌ژنه‌یه
فریشته‌ی خه‌ونی رۆح رامووسن
كه‌ی ئاسمان
ئاته‌شكای ئه‌م شه‌ڕو به‌زمه‌یه …؟
………………………….
تاریكی راماڵن ..
نیشتمان سه‌فه‌ری له‌به‌ره
ترس رێگه‌ی ئاواتی لێنه‌گرێ
گه‌ڵایه‌ك بكه‌نه جۆلانه
هه‌تاكوو زارۆكێك
له‌نێویا پێده‌گرێ
قه‌ڵه‌مێك ….
بخه‌نه گیرفانی هه‌وره‌وه
نه‌وه‌كوو خۆر كوێر بێت
مێژوومان بمرێ .
………………………………..
ستار ئه‌حمه‌د
Dengekan
دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.
