Skip to Content

تراژیدیای چل تاریکستان.. شوان شەفیق

تراژیدیای چل تاریکستان.. شوان شەفیق

Closed
by August 17, 2021 General, Poems

تەمومژە و
سەراپا دنیای ئێمە
تاریکە!
خۆر سەفەری کردووە
چاوەڕێی ھەڵھاتنەوەی مەکەن!
کە ئاسمان غوبار دەیگرێ
ئەوە پەڵە ھەورەکانن
باوەش بەیەکدا ئەکەن،
تا سەمفۆنیای مەرگ بژەنن
کەمانچە گریاوەکان!
چ خەوێکە ھەواڵی كۆچ؟
چ سەفەرێکە مەرگ؟
گەرانەوە لەم تابلۆ شێواوەدا
یەکسانە بە وەستانی نەفەس!
نەیی و نەی ژەن بانگ بکەن
با ئاوازی قورگی پڕ گریان و
چاوی پڕ لە فرمێسک
بە نۆتەیەک بژەنێ
چ ژەنینێک؟
مەپرسن.

سەر سووڕ ئەخوا
لە ڕوومەتی دایکەوە
تەماشایەک بکە
لە ڕیشی براکان بڕوانە
لە چاوی خوێنینی خوشکانەوە
ببینە!
چی ئەبینی وا
نۆتە نووسراوەکان
بە خووڕی ئەم تاڵاوە
ئەشۆیتەوە،
تاڵ و سوێر
یەکییان گرتووە!
بانگیان بکەن.
چۆن
کۆرسی ماتەم
لەو بەروارە نەگریسەدا
ڕووماڵ ئەکرێ!
٥/٧ دنیا خامۆش!

کامە سامفۆنیایە
وا
ئاوازی مردنی باوک ئەژەنێ؟
ئەو نادیارە کێیە ئەی نووسێتەوە؟
نەژەنراوە!
کێ
زامێکی وا قووڵ
بە گەروویدا دەچێتە خوار
خۆی ڕاگرێ!
شیوەن نەکا
یەخەی خۆی
لە پێستەوە دا نەدڕێ!
ناخوێنرێتەوە!

ئەو ھەواڵە
درۆیەکی شاخدارە
مرۆڤێک نییە؟
بە ناڕاست ناوی ببات!
بووێری ئەوێت
وتنی: حەقیقەت،
سوریالیزمە!
دیمەنێکی بەسوێیە
لاواندنەوەی ژنێک
بۆ ھاوسەرێک
کە دەیان وێستگەی نشێو و
سەدان وێستگەی ھەڵکشانی
پێ بە پێ لە گەڵیدا بڕیووە!
سەختی زامێک چۆن
قبووڵ ئەکرێ؟
کە ڕۆژی ڕووناکی
کردۆتە شەوەزەنگ!

خەیاڵێک
بە مێشکدا
گووزەر ئەکا
مەنەفێسی دڵتەنگییە
پێنووس ژان و شیوەن
لە دێڕ بە دێڕی
کتێبەکاندا ئەنووسێ
کێ لە ھەنسک بە ھەنسکی
گریانی دڵ تێ ئەگا؟
ئەی بێ ئاگا!
چاوەکان.

ئەبێ وتنی
ناوی باوکە
بۆ نۆبەرەی ماڵ
چ دەنگێ بێ
وای لەم ئازارەی ئەڤڕۆ و
وای لەو خۆشییەی
ئەوێ ڕۆژێ!
نۆستالۆژیا.

وای بە حاڵی
بەرد و شەختە!
چ شلێرێکە
لەو سەختییەدا ژیاوە
ناسۆر و ژان
شکاندنی ڕێگای
خەیاڵە لە سێبەری
ھێزی ژیان
باوک!

خۆشەویستان کۆببنەوە
وێستگەکانی گەیاندن
بینراو و بیستراوەکان
ھەموو لەسەر دێری یەکەم ھەواڵدا
بە چ ڕەنگێک مەرگ بەیان دەکەن؟
وا ھەموو دۆشداماون
ئاخر ئەوانەی باوکیان مردوو
ئەوانەشی باوکیان زیندوو…
خەمناکن!
چ کۆستێکە؟
ئای لەو کۆستە!
گۆڕستان تاکە جێگایە
ھەمووان یەکسان دەکا بە خاک
چەند زاڵمە!

بیتھۆڤن بە پیانۆکەی
کارل ئۆرف لە ئۆرکێسترای سامفۆنی
(ئۆ فرۆتینا- کارمینا بورانا)
‎محمدرضا لطفی بە تارەکەی
قالە مەڕێ بە شمشاڵەکەی
شوان بە پێنووسەکەی
یەک یەک ئەمانخەنە ژان!
بۆ کۆست و مەرگی ئازیزان.

شوان شەفیق
١٤/٨/٢٠٢١

Previous
Next