Skip to Content

پێی پەتی و فەرشی دڕک.. نەوزاد بەندی

پێی پەتی و فەرشی دڕک.. نەوزاد بەندی

Closed
by August 17, 2021 General, Poems

من ئەبم بە جوتیارێکی کێڵگەی چا .. ئێوارە بە خۆم و بەرچنەیەک تەماتە و گێلاسەوە دێمەوە ..
تۆیش لەبەردەرگا ،
سەماوەرێک لە ئاوی کانی گەرم کە ..
تا بەیانی چای سەوز ئەخۆینەوە

٭ ٭ ٭

چاوت داخە و..
بە دوو پاسپۆرتی تەزویرەوە ،
ئەچین بۆ مالیزیا ..
لەوێوە بۆ ئیتاڵیا..!

٭ ٭ ٭

لەسەر لمی کەناری دەریای ناوەڕاست ،
شیعرێک ئەنووسم ، شیعرێکی بریندار
هەموو پۆلیسی کەناراوەکان ئەهێنمە گریان ..
نەورەسەکان وا لێئەکەم ، به پەڕو باڵ ،
کەپرێکی سپیمان بۆ دروست کەن ..
تۆ بڕۆ بۆ ڕاوە ماسی

٭ ٭ ٭

منیش ئەڕۆم دامە و سێ ڕسکێن،
لەگەڵ شەپۆلەکان ئەکەم ..
سەیرە ..
ئەم دنیایه جێی من و تۆی تیا نابێتەوە..
خەو بەشی من و تۆی تیا نییە…

٭ ٭ ٭
لە شەقامێکی قەڵەباڵغی ئیسپانیا ،
بۆ شیعرەکانی لۆرکا ئەگەڕێیین ..
ئێ ئاخر گەمژە هەر گەمژەیە ،
لێرە بێ یان لە مەدرید …
واز لە شیعر بێنە ، مەعز بۆ خوا ..
حەفتا ساڵ پێش ئێستا بێکەس ووتی :
ڕەواجی کوانێ لای خەڵکی ووتار و شیعر و پڕ مەعنا ؟
گەلێ کەس پێکەنینی دێ به گوفتار و دەم و لەوسم

٭ ٭ ٭

ئێمە بارانمان بە خەویش نەبینیوە ..
قوڕاو ، کەی بارانە ؟
لافاو ، کەی بارانە ؟

٭ ٭ ٭
شەوێک لە ژێر پەیکەرێکا ئەخەوین ..
وەک پەڕەسێلکەکەی ئۆسکار وایڵد ..
نیوەشەو وا ئەزانین بارانە ،
کەچی پەیکەری شای بەختەوەر ،
فرمێسکمان بۆ ئەڕێژێ …

٭ ٭ ٭

ڕاکردن ، دوو جۆری هەیە ،
یان هەزار جۆر …
ًبەڵام هەموویان ڕاکردنن ..
هەیە لە هیچەوە ڕا ئەکا بۆ هیچ ..
هەیە لە شتەوە ڕا ئەکا بۆ هیچ ..
هەیە لە هیچەوە ڕا ئەکا بۆ شت ..
هەیە لە شتەوە ڕا ئەکا بۆ شت ..
بەڵام هەموویان هەر جوانن..
ناوازەن ..
من هەموویانم خۆش ئەوێ ..
لەگەڵیانا خەو ئەبینم ..
چونکە ئەتبەن بۆ شەقامێ ،
یەکەمجارە یەک بناسن ..
ڕووبارێک بە سەرسامییەوە سەیرت ئەکا ..
چۆلەکەیەک لە پشت گەڵایەکەوە ،
بە شەرمەوە بۆت ئەڕوانێ ..
بازاڕێک تەماشایەکت ئەکات و ..
هەوڵ ئەدا ناوت بزانێ

Previous
Next