Skip to Content

حەوتەمین دیداری شانۆی کوردی “یۆتۆبۆری” به یادی “دڵشاد ئەحمەد” لە سوید به‌ڕێوه‌چوو

حەوتەمین دیداری شانۆی کوردی “یۆتۆبۆری” به یادی “دڵشاد ئەحمەد” لە سوید به‌ڕێوه‌چوو

Closed
by August 31, 2021 General, Theatre

مەنسوور جیهانی ـ

حەوتەمین دیداری شانۆی کوردی “یۆتۆبۆری” به یادی “دڵشاد ئەحمەد” ئەکتەر و دەرهێنەری ناوداری شانۆی کوردستان له شاری یۆتۆبۆری لە سوید به‌ڕێوه‌چوو.

حەوتەمین دیداری شانۆی کوردی “یۆتۆبۆری” به یادی ڕه‌وانشاد “دڵشاد ئەحمەد” ئەکتەر و دەرهێنەری ناوداری شانۆی کوردستان و سەرۆکی پێشووی کۆمەڵەی هونەرە جوانەکانی نێوده‌وڵه‌تی یۆتۆبۆری Internationella Sköna Konster، به دروشمی “شانۆ نوێبوونەوەی ژیانە” و به به‌شداریی دوو گرووپی شانۆیی له شانۆکارانی کورد و هه‌روه‌ها دوو سیمیناری پسپۆڕانه‌ی شانۆیی لە کاتژمێر 4ی دوانیوه‌ڕۆی ڕۆژانی 27 و 28 و 29ی ئۆگۆستی 202١ بە شێوەی ئۆنلاین له شاری یۆتۆبۆری لە وڵاتی سوید به‌ڕێوه‌چوو.

له رۆژی یەکەمی حەوتەمین دیداری شانۆی کوردی “یۆتۆبۆری” واته ڕۆژی هه‌ینی 27ی ئۆگۆستی 202١ شانۆگەری “هیچم نییە بیشارمەوە” لە دەرهێنانی “ڕێژەن جەمال” بە شێوەی ئۆنلاین نمایشکرا و دیدارێکی کورت لەگەڵ ئه‌م‌ شانۆکاره کورده سازکرا و له رۆژی دووهەم واته ڕۆژی شه‌مه 2٨ی ئۆگۆستی 202١ شانۆگەری “کچە سەتڵییەکە” لە دەرهێنانی “فاتیح بادپەروا” بە شێوەی ئۆنلاین نمایشکرا و دیدارێکی کورت لەگەڵ ئه‌م شانۆکاره مه‌ریوانییه سازکرا و له رۆژی سێهەمیشدا واته ڕۆژی یه‌کشه‌مه 29ی ئۆگۆستی 202١ سیمیناری پسپۆڕانه‌ی شانۆکار و نووسەر “دانا عەلی سەعید” و هەروەها سیمیناری پسپۆڕانه‌ی شانۆکار و نووسەر “زاهیر عەبە ڕەش” بە شێوەی ئۆنلاین به‌ڕێوه‌چوو.

دیداریی ئەمساڵی شانۆی کوردی “یۆتۆبۆری” به هه‌وڵی کۆمەڵەی هونەرە جوانەکانی نێوده‌وڵه‌تی یۆتۆبۆری، به سه‌رۆکایه‌تی “عیزه‌ت ڕه‌ئووف” و هەروەها به سه‌رپه‌‌ڕه‌شتی به‌شی ته‌کنیکی له لایه‌ن “نه‌وزاد باهیر” بە شێوەی ئۆنلاین به‌ڕێوه‌چوو، چونکه دۆخی پەتای کۆرۆنا تاکوو ئیستا له سوید ئاسایی نەبۆتەوە و بەپێی رێنماییەکانی تەندروستی لە‌م وڵاته کۆبوونەوە بەشیوە ئاسیاییەکەی رێگەپێدراو نییە.

بۆ زانیاریی زیاتر:
https://www.facebook.com/kurdiskafilmtraffen

بەڕێوەبەرایەتی راگەیاندنی گشتیی حەوتەمین دیداری شانۆی کوردی یۆتۆبۆری.

Previous
Next