شیعر/ بەربوونەوە.. هۆزان ئیسماعیل کەریم

چوار چێوەیەک
بەبێ وێنە لە چاوەڕوانی شەھیدبوونی
سەربازێکی داماو
تەماشی دایکەکان دەکات

گۆڕێکی بەتاڵ لە چاوەڕوانی
تەرمی پەپولەیەکی کوژراو
گۆرانی نامووس دەچڕێ

پیاوێکی بێ گیرفان و ژنێکی دوودڵ
لەناو خانوویەکی سەد مەتری
لە ناوندی شاری
لەسەر بەرماڵێكی دڕاو
لە خودا دەپاڕێنەوە
یوئێن دادپەروەری بچەسپێنێ

پارکێکی بێناز و بێکەس
بە گەدەیەکی پڕ لە کریستاڵ و سۆمەدرین
لە چاوەڕوانی گەنجێکی بێ دڵ
دڵی خۆی دەداتەوە

ترافیکێکی گەرم وەک جەھەنم
لە چاوەڕوانی منداڵێکی دەستگێڕ
خەو دەیباتەوە

گوڵێکی پلاستک
لە چاوڕوانی عیشقێک
فاتیحا بۆ سبەی دەخوێنێت

زستانێکی گەرم لە چاوەڕوانی
ھاوینێکی سارد
بەرد لە ئەستێران دەگرێت

منیش بەبێ خۆم لە چاوەڕوانی تۆدا
رۆژەکانی کۆتایی تەمەنم دەژمێرم.

ھۆزان ئیسماعیل کەریم

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.