Skip to Content

شیعر/ دەيجوری لە دايک بوون.. سەردار جاف

شیعر/ دەيجوری لە دايک بوون.. سەردار جاف

Closed
by December 21, 2021 General, Poems

ئەم گريانە
گەڵا وەريوەکانی پاييز گڕ دەدەن
ئازارەکان
پانتایی شەوی دەيجوريش
کپ و مەحوو دەکەنەوە
ئەم هەوارە ڕژاوەی شيلەی تاموبۆ
ئافاتێکی بەربڵاوە
بە بەر پەرژينی خاپوورا ڕادەماڵن
لە ڕووباری مەيلەکانم
دەپەڕنەوە
کاتێ کە کاڤاری تەمەن
بە بێژنگی گەوجی و گێلی
سيخناغدراو
تەمتومانی سەر ڕەژووە پێست
دەشێ لە قوڵفدرابێ و
بە ژوانی ئەتک و ڕيسوا هۆگر بووبێ
ياخود نيشتيمانێکی قوڕمسواغدراو
لێوەکانت
بێنە با فوو لە مۆمەکانی من بکەن
کات لە هەشتی بەيانيدا
دەمم بە ماچی سەفەرت سپاردووە
بە بارتەقای
ترپەی ساڵانی هەناسە
لە سەر شەختەئاوی زرێ
دەنک دەنک
خەجاڵەتيم ژماردووە
ژوورێ مينای کاوڵاشی خەم
بن گڵۆپێ کز و تاريک
دەفتەری بيرەوەرييەکان
پەڕپەڕ دەکەم
نازانم لە کام بن ميچی حەرفەکانا
گومەتی مزگەوتی باڵات
دەشێوێنم
بە سێڵاوی ئەشکاويما
تەڕتەڕ دەکەم
کە تۆيش لێم بووی
بە سەرابە سەر شێتەکەی دراوسێمان
قەت پێت ناگەم
پيتەکەنت بوونە فيلمی ورووژێنەر
ديقەت دەدەم
چوارپەلێکی تێکشکاو و کۆست کەوتووم و
لێت تێ ناگەم
تۆ دەزانی
زۆر دەمێکە من شەوارەی
ئاوازی پڕ گەرووتم و
بە بێ سەماو لەنجەی پرچت
لەم يەڵدايە
پەرشم دەکەی
خۆ لە خاڵی بوونی خۆما
دەخولێمەوە
قەت خۆم بۆ پر نابێتەوە
کە تۆ هاتی
لە نێو فنجانی چاوتدا
بۆ هەواری عەرشم دەبەی

بە بۆنەی ساڵڕۆژی لە دايکبوونم نوسرا .

ئەڵمانيا
١٩ . ١٢ . ٢٠٢١

Previous
Next