Skip to Content

مانای ڕووداو و کارەساتەکانی کوردستان.. تاهیر عیسا

مانای ڕووداو و کارەساتەکانی کوردستان.. تاهیر عیسا

Closed
by كانونی یه‌كه‌م 21, 2021 General

زمانی ڕووداو و کارەساتەکانی کوردستان ڕوونتر لەزمان و لێدوانی هەرکەس، چیی پەیامێک دەگەیەنن؟!

ئەم ڕووداو و کارەساتانەی ڕۆژانە لەکوردستانی هەردوو دەسەڵاتی فیرعەونئاسای زۆنی زەردو و سەوزدا ڕوودەدەن، بەزمانێکی سادە و ڕوون و ڕاشکاو، گوزارشت لە کۆتایی دەورەی سی ساڵەی دەسەڵاتێگەلکی میلیشیایی مافیایی و پاشاگەردانی لەکوردستاندا، دەکەن!
ئەوان، ئەمڕۆکە لە سەر ئاستانە و لەسەر لێواری داڕمانێکی یەکجاری نزیکبوونەتەوە!
پەیوەندییە سیاسیی و ئابوری وکۆمەڵایەتیەکانی ناو ئەم سیستەمی فەرمانڕەوایەتییە گەندەڵ و دژە ئازادی و یەکسانییە، بەتەواوی کەندو کۆسپی گەورەی لەسەر گەشەو نمای هێزە بەرهەمهێنەرەکانی کۆمەڵگاو ژێرخانی کۆمەڵگادا پێکهێناوە. لەهەر سات و زەمەنێکی مێژووی کۆمەڵگا جۆراوجۆرەکاندا پێشمەرجی داڕوخانی دەسەڵاتە سەرەڕۆ و چەوسێنەرەکان و هاتنە پێشەوەی زەمینەی شۆڕش وئاڵ وگۆڕ، ناکۆکی و ململانێی ناو کاراکتەرەکانی سەرەوەی هێزە دەسەڵاتدارەکان بووەو سیستەمی بەرەو داڕوخان وداڕمانی یەکجاریی بردووە.
هەردوو دەسەڵاتی زۆنی زەردو سەوزیش، کە لە ئەنجامی ناکۆکیە قووڵەکانی نێوانیان، لەسەر دزی وفزی و تاڵانی، بەجێگایەک گەیشتوووە، کە هەر زۆنەو بەشە بەناو حکومەتە کارتۆنیەکەی، داهاتی ناوخۆو باج و ڕسومات وگومورگی ناوخۆ و سەرسنورەکانیش بۆ خۆیان گلدەدەنەوەو چارەنوسی مووچەی فەرمانبەران و مامۆستاو کارمەندانیشیان، لەدۆخێکی نادیاری پڕ لەدڵەڕاوکێدا ڕاگرتووە، هەر ئێستا بەشێکی زۆریان بۆ زیاتر لەچل ڕۆژ دەچێت مووچەکانیان پێنەدراوە.
ئەم دەسەڵاتە دژە خەڵکییە، لەچوار چێوەی عێڕاقێکی داتەپیوی گەندەڵ وفاسیدی ناجێگیری سیاسیی و ئابووری کۆمەڵایەتیدا، کە لەهەر لەحزەیەکدا، لەلایەک چاوەڕوانی تەقینەوەیەکی گەورەی جەماوەریی کرێکارو زەحمەکێشی لێدەکرێت، لەلایەکی دیکەش، چاوەڕوانی پێکدادانی هێزە میلیشیا ناکۆک ودژبەیەکەکان، لەسەروبەندی کشانەوەی هێزە بەناو شەڕکەرەکانی ئەمریکاو هاوپەیمانەکانی دژی بەناو داعش، ئەوانیی خستۆتە ناو گێژاو و تەنگژەو بێ ئاسۆییەکی قووڵ و بەرفراوانەوە، کە بەبێشک چارەنووسیان لە ئەشڕەف غەنی سەرۆکی ئەفغانستان و دارو دەستەکەی باشتر نابێت.
ئەم ترس ونیگەرانیەی هێزە سیاسییە دینی و ناسیۆنالیستی و تایەفیەکان لە عێڕاق وکوردستاندا، لەبایکۆتی بێ ئەندازە گەورە و بەرفراوانی هەڵبژاردنەکانی پەڕلەمانی عێڕاقدا زیاتر دەرکەوتن و شەبەحی هێزێکی کۆمەڵایەتی بەرفراوانی تووڕەو ناڕازی لەپشتی پەردەی هەڵبژاردنەکان لەبەرامبەر خۆیاندا، دەبینیەوەو ئەوانی دووچاری هیستریاو فۆبیای تێداچوونی یەکجاری خۆیان کردۆتەوە !
شەڕوناکۆکی وململانێی نێوان باڵە جۆراو جۆرەکانی زۆنی سەوزو بەتایبەتیش ناکۆکی نێوان ئامۆزاکان لەناو بنەماڵەی تاڵەبانی و ناکۆکی و ململانێی نێوان سەرانیان لەحیزبەکەیاندا، کە هەر یەکەی بۆ خۆی وەک کۆمپانیای دزی و قاچاخچێتی و تاڵانی بۆ پارێزگاری لەسەرمایەو بەرژەوەندیەکانی، هێزی میلیشیای تایبەت بەخۆی هەیەو خەڵکی شارنشینی سلێمانی و دەورو بەریان لەناو کەش وهەوایەکی پڕ لە فەوزاو دڵەڕاوکێی شەڕو پێکدادانی خوێناویدا ڕاگرتووە و هاوکاتیش لەناو ئەم کەش وهەوایەی ململانێی سەرانی حیزب و دەسەڵاتی گەندەڵ ودژە ئازادییاندا، ڕێژەی تاوان و کوشتن و تەقەکردن، لەئاستی کۆمەڵایەتیدا، ڕۆژ بەڕۆژ لەفراوانبووندایەو داڵدەدرانی تاوانباران و بکوژانیش لەپاڵ هێزە میلیشیاکاندا، بووە بەکارێکی ڕۆتین وئاسایی و مەعنایەک بۆ یاساو ڕێساو دادو داوەریی لەم کۆمەڵگایەدا نەماوەتەوە.
تێکچوونی باری سایکۆلۆجی تاکەکان و پەنابردنە بەر چەک و تاوان، بووە بەدیاردەیەک کە لەسەر دەمەتەقێیەکی زۆر ئاسایی، لەسەر فوول لایت و سەڕەی لەفەو سەڕەی نانەواخانەو لەسەر پارکینگ و لە یانەی شەوانەکاندا، یەکتر خەڵتانی خوێن دەکەن!
هاوڕێ و ڕەفیقی یەکترن، بۆمۆبایلێک یەکتر دەکوژن، بۆ چەند سەد دۆلارێک دەستی دەچێتە کوشتنی داماوێک و لەژیاندا دەیسڕێتەوە، ڕۆژ نییە کەسێک کۆتایی بەژیانی خۆی نەهێنێت!
چوونە سەری بێئەندازەی قاچاخچێتی بە دەرمانی بێهۆشکەرو چوونە سەری ڕێژەی بەکاربەرانی، کۆمەڵگای بەرەو دۆخێکی خراپ وناهەموار بردووە.
لەپاڵ ئەمانەشدا پێکداپژانی هاوینی ڕابردووی نێوان ئاسایش و پۆلیسی شارو چەکدارەکانی شێخ جەعفەری جێگری سەرۆکی هەرێم، کە گوایا ئەمانە پارێزەری ئاسایش و ئارامی شارو هاوڵاتیانن، ئاربێجی وبیکەیسیان لەناو جەرگەی شاری سلێمانی قوباد تاڵەبانیدا خستە گەڕ کە لە دەورەی پیشووی هەڵبژاردنەکانی پەڕلەمانی کوردستاندا، وەک سەرۆکی لیستی یەکیەتی بەڵێنی ئارامی و هەلی کاری بەدەنگدەرانیدابوو، کوژران و بریندار بوونی چەند کەسی داماوی ناو هێزەکانیانی لێکەوتەوە، دوو بارەبوونەوەی هەمان ڕووداو ئەمجارەیان لەسیناریۆی دوای هەشتی تەموزو وەکەنار خستنی لاهوری شێخ جەنگیدا، شەڕی تازەی نێوان باڵی بافڵ و میلیشیاکانی شێخ جەعفەرە کە دووبارە کوژراو و برینداری لێکەوتەوە و کەش و هەوای شارنشینانی شاری بەتەواوی تێکداوە!
بافڵ، وەک دەرکەوتەی دوای وەکەنار خستنی لاهورو ئیدیعای یەکیەتی تازەو درۆی چاکسازی، تەنیا هەوڵێکە بۆ یەکدەستکردنەوەی خۆی وەک گەورە مافیای قاچاخچێتی و دزی و تاڵانی، داهاتەکانی زۆنی سەوزو وەڵامدانەوەش یەکدەستانەتر، لەبەرامبەر ئاڵ وگۆڕەسیاسیی وئابوریەکانی جیهان و ناوچەکە و هێزەکانی دیکەی بانسەری خۆی، کە ئەمەش بەمانای قووڵبونەوەی ناکۆکیەکانی نێوان کۆمپانیاو بەرژەوەندە جیاوازەکانە لەو زۆنەدا کە پێشتر لەژێر ناوی مەکتەب سیاسییەکانیدا، بەرگی سیاسییان بەخۆدا دابوو، ئەمڕۆ گومانێک لەو مافیاچێتییە و ململانێی بازرگانی وقاچاخچێتیەدا نەماوە، ناتوانێت بەبێ سەرکێشان بۆ پێکدادانی خوێناوی بڕواتە پێشەوە، هەر کۆمپانیایەک بۆ ئەوەی درێژە بەسەرمایەگوزاری لەدزی و تاڵانیەکانیدا بدات، پێویستی بەهێزی میلشیاو چەکدارە، کۆکردنەوەی هەموو ئەم بەرژەوەندە جۆراو جۆرانەش، لەدوای دۆخی هەڵبژاردنەکان و بایکۆت و ململانێی ناو بنەماڵەو چوونە سەری ناڕەزایەتیەکان و دواترینیان هاتنە مەیدانی خوێندکاران لەپاڵ خواستی دەرماڵەداو خراپبوونی چاوەڕوانکراوی دۆخی هەڵبژاردنی داهاتووشیان، ناتوانێت هەنگاوێکی تر بەمجۆرە بڕواتە پێشەوە.
زۆنی زەردو دەسەڵاتی بنەماڵەیی بارزانیش، ئەگەر لەبنەماڵەی تاڵەبانی لەناوخۆیاندا خراپتر نەبن باشتر نین و بەڵام بەدوو هۆکار، یەکەمیان:-بنەماڵەی بارزانی وەک هێزێکی خێڵەکی کۆنەپارێز، زۆر حەزەریان لەسەر دەرخستنی ناکۆکیەکانی نێوان خۆیان ڕووبەکۆمەڵگادا هەیە، دووەمیان:- مەسعود بارزانی، وەک ناوەندێکی كاریزمایی ناو بنەماڵەکەی بۆتە چەترێک بۆ داپۆشینی هەر ململانێ و ناکۆکییەکی ناوبنەماڵەیی، کە دوای مردنی بێشک چارەنوسیان لە بنەماڵەی تاڵەبانی، کە بەمردنی جەلال تاڵەبانی ئاسەوارەکانی دەرکەوتن و ناکۆکیەکانیان تەقییەوە، باشترنابێت.
دوای ڕاپۆرتی زاک کۆپلین، لە میامی ئەمریکاداو گەندەڵیە بێ شک و بێگومانییە هەژدە ملیۆنیەکەی مەسرور بارزانی، کە مشتێکە لەخەروارێکی دزی وتاڵانیەکانیان، کارەساتی لافاوی شاری هەولێرو ئەو وێرانەیەی بەدوای خۆیدا لەو شارەی هێناو لێدوانەکانی مەسروریش لەپەیوەند بەو ڕووداوەدا، کە گووتی:– مرۆڤ جگە لەوەی سوپاسگوزاری خودا بکات، هیچی تری پێناکرێت، نەفرەت وتووڕەیی خەڵکی حاشیەی شاری هەولێر و جەماوەری هەژارو نەدارو زەحمەتکێشی کوردستانی لەدژیان بردۆتە لووتکەوە!؟
هاوکات مەسرورو دارو دەستەو پێوەندەکانی، دەڵێن، کەمتەرخەمی لەکابینەکانی پێشوودا، کراوە، بەڵێ، بەڵام لەکابینەی پێشوودا، ئامۆزاکەی سەرۆکی حکومەت و باوکیشی سەرۆکی هەرێم بووە، تفێک هەڵدەداتە ئاسمانی ژوور سەری خۆی و هەر بەچڕو چاوی خۆی دەکەوێتەوە!
بەڵام هێشتاش ناتوانێت، ئەو سێسەد ملیۆن دۆلارەی لەلایەن ئاژانسی جایکای یابانی کە لە مانگی دووی ئەمساڵدا لەلایەن جێگرو بەڕێوەبەری ئاژانسەکەوە ، هەر یەکە لە ئۆڕاڕای نوێنەری ئاژانسەکە لەعێڕاق و جێگرەکەی کۆڕۆنومای نوێنەریەوە لەکوردستان بڕیاری لەسەردرا بۆ جێبەجێکردنی پڕۆژەی ئاوی قورس و ئاو و ئاوەڕۆی شاری هەولێر و دەوروو بەری، کە لەناو پڕۆژەکەدا بەتەوای کێشەی ئاوەڕۆی هەولێرو لافاوی شارەکەی بەتەوای چارەسەردەکرد، بەڵام پارەکە وەرگیراو دارێکیش لەو پڕۆژەیەدا نەخرایە سەر بەردێک و نازاندرێت چارەنووسی پڕۆژەکە بەکوێ گەیشت و بەکوێش دەگات، بشارێتەوە؟
پێش لافاوەکەش، هێرشەکانی داعش و کوژرانی چەندین پێشمەرگەی هەژاری داماو لە بارەگاکانیان، کە گومان دەکرا هەوڵێک بێت بۆ نیشاندانی مەترسیەکان لەسەر هەرێمی کوردستان و دەستی پارتی لەپشت بێت لەجوڵاندنی ئەو بەشە داعشیەی کە ئەمان لەپشتیانن، هەتا بەئەمریکاو هاوپەیمانەکانی بڵێن، کە کوردستان هێشتا مەترسی داعشی لەسەرەو عێڕاق وکوردستان جێنەهێڵن! بەمەش کۆمەڵێک کوڕی هەژارو نەداری خەڵکی زەحمەتکێشیان کرد بە قوڕگی ئەژدیهای داعشدا، چونکە ئەمانە فێرن لەسەر تڕاژیدیاو نەهامەتیەکانی خەڵکدا بەهرەبەرداریی بکەن و دەستکەوت وبەرهەمی خۆیان بچننەوە، هەروەک لەشەنگالدا کردیان و بەهەزاران کەسی شارنشینی شەنگالیان خستە ناو چەمبێڵی دڕندانەی داعشەوەو هەتا ئێستاش ئاسەوارە تڕاژیدیائاساکانی بەردەوامن و نەبڕاونەتەوە!
ئەم هەل ومەرجەی ژیان لەکوردستاندا، ناتوانێت بەمجۆرە لەناو تڕاژیدیا بەردەوام و دووبارەو چەندبارەکانی خۆیدا، بەردەوام بێت و لەدوو سیناریۆی چاوەڕوانکراودا بەدەرنابێت، یان تڕاژیدی لەشێوەی ئەفغانستان و هێنانە پێشەوەی هێزێکی داعشئاسا لەناو ململانێی قوتبە جۆراوجۆرە ئابووریی وسیاسییە جیهانیەکان و هێزە ناکۆکانی ناوچەکەدا، یان سیناریۆی هاتنە پێشەوەی بزوتنەوەیەکی کۆمەڵایەتی لە خەڵکی کرێکارو زەحمەتکێش و ئازادیخوازو یەکسانیخوازی کۆمەڵگادا، کە دەتوانێت بەر بەهەر چەشنە سیناریۆیەکی دزێوی دیکەی چاوەڕوانکراو بگرێت، ئەم دۆخەش زیاتر لەهەر کاتێک ئەرکی خەڵکی چەپ وکۆمۆنیست و ئازادیخوازی کوردستان و ڕێکخراوە چەپ و سۆسیالیست و ئازادیخوازەکانی دیکەی کۆمەڵگا بۆ ڕووبەڕووبوونەوەی ئەم دۆخەی قورسترو سەختتر کردۆتەوە!

لەم لینەکەی خوارەوەدا، پڕۆژەی ئاوی قورسی هەولێر لەلایەن خودی میدیای پارتی خۆیەوە، لەمانگی دووی ئەمساڵدا بڵاوکرایەوە:-
[بەڕێوەبەری ئاو و ئاوەڕۆی ھەرێمی کوردستان: دەست بە جێبەجێکردنی پڕۆژەی ئاوی قورس دەکرێت
https://kurdistantv.net/ku/2021/02/17/kurdistan/%D8%A8%DB%95%DA%95%DB%8E%D9%88%DB%95%D8%A8%DB%95%D8%B1%DB%8C-%D8%A6%D8%A7%D9%88-%D9%88-%D8%A6%D8%A7%D9%88%DB%95%DA%95%DB%86%DB%8C-%DA%BE%DB%95%D8%B1%DB%8E%D9%85%DB%8C-%DA%A9%D9%88%D8%B1%D8%AF%D8%B3%D8%AA%D8%A7%D9%86-%D8%AF%DB%95%D8%B3%D8%AA-%D8%A8%DB%95-%D8%AC%DB%8E%D8%A8%DB%95%D8%AC%DB%8E%DA%A9%D8%B1%D8%AF%D9%86%DB%8C-%D9%BE%DA%95%DB%86%DA%98%DB%95%DB%8C-%D8%A6%D8%A7%D9%88%DB%8C-%D9%82%D9%88%D8%B1%D8%B3]

تاهیر عیسا/ 20.12.2021

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish