چیتر لەمنداڵدانی یەسناکانم هیچ گاتایەکی تر لەدایک نابێت… شەماڵ بارەوانی
کەحەرفەکانم
چوونەوە سەر نەسلی کڕوزانەوە
و
کچێنی ڕستەکانم
ڕەنگی بێوەژنیان گرت
کە نیشتمانی خەونەکانم
پڕبوو لەترپەی ئاوارەیی
و
ڕێزمانی چاوەڕوانیم
ئیعرابی کوێری لێ ڕوا
کەنزاکانم بە فەتوای نائومێدی
پێچرایەوە
و
مەزهەبی
عیشق بە چەقۆی خوڕافە
نەزیفکرا
مەیە
قەراربوو
بەرلەوەی دەستنووسی خەمەکانم
پێ بگرێت
و
لەهجەی گریانم پاراوبێت
بەرلەوەی
حەلاجی وشەکانم
تەریقەتی دەهریبوون بپۆشن
و
بەرماڵی ئنتیمام
لە هەرتەقەی بێ هیوایی
سیخناخ بێ
بەرلەوەی
کفری ڕەشبینی
لە میحرابی وشەکانم
داگیرسێت
و
فەسڵی کاڵبوونەوە
لە ترۆپکی تەمەنم
چرۆبکات
بەرلەوەی
تۆبەی سنعانی
پیتەکانم
بەتاڵ بێتەوە
و
ڕەهێڵەی بارانی بێ تاقەتی
لە دەروازەی دەروونم دابکات
بەرلەوەی
گەڵای دیدەم
هەڵبوەرێت و
باهۆزی عەبەس
لە سردابی ڕۆحم
هەڵبکات
تۆبێیتەوە
درەنگە،و کات بەسەرچوو
من ئیتر نە حەوسەڵەی
کۆپی کردنی دوو ڕکات پێکەنین
و
نەیش مەزاجی
خواردنەوەی کوپێک
خەندەم ماوە
تازە فانۆزی بیناییم
چووە وەرزی کزی
و
سورەتی گەنجیم
مەحکوم بوو
بە ئایەتی پیری
ئاڤێستای ئەمەلم
کوژایەوە
و
چیتر لەمنداڵدانی یەسناکانم
هیچ گاتایەکی تر لەدایک نابێت
ئیدی گوڵی سەمایەکیتر
لەباڵی زۆربام شکۆفەناکات
و
درەختی ئشتیام
هیچ هێشووە ئامێزێکی تری
لێ ناروێت
من لەمێژە گۆزەی قاقام هاڕەیکردووە
و
خەونی فڕینم بەشکان مەحکوم بووە
لە مێژە ئینجیلی ئاواتەکانم
لەمانا بەتاڵ بووەتەوە و
وەرزی مەسیحم خاچی پایزی
گرتووە
ئیدی
تەرمی خەونەکانم
بە تابووتی ماڵئاوایی دەسپێرم
پاشماوەی کاتژمێرەکانی تەمەنم
دەپێچمەوە و
دەچمەوە سەر کۆتا چرکەکانی
هەڵوەرین
دەڕۆمەوە
بۆ نیشتمانی فرمێسک
بۆ کەناری عەدەم
بۆ باوەشی سەراب و
تاراوگەی دڵشگوشین
