وڵات و یارییە باجێنە.. نەوزاد بەندی
( بە دوادا چونێک بۆ وەڵامێکی مەسعود عبدالخالق لەسەر بابەتێکی کاوە مەحمود ، دەربارەی جیاکردنەوەی دین لە دەوڵەتی کوردیی !)
لێرە نە ئاینێکی کرداریمان هەیە ..نە ووڵات و دەسەڵاتێکی نێو دەوڵەتیشمان هەیە .. ئیتر کام ئایین لە کام دەسەڵات جیا دەکەنەوە ؟؟؟
کاتی خۆی پیاوانی کەڵێسا فەرمانڕەوای ڕەهای ئەوروپا بوون ..بزووتنەوەی ڕێنیسانس واتا هەڵسانەوە و نوێبوونەوە سەری هەڵدا ، کە بزووتنەوەیەکی سەدا سەد ئەوروپیی بوو ،دەهۆڵ و زوڕنای هاوردە وداگیرکەران نەبوو ،
ئەم ڕێنیسانسە ، دەسەڵاتی تەکنۆکراتی لە ئەوروپا خستە جێی دەسەڵاتی پیاوانی کەڵێسا .. دەسەڵاتی لە پیاوانی کەڵێسا سەندەوە و پێی ووتن : ئێوە بڕۆنەوە ناو کەڵێساکانتان و خواپەرستیی خۆتان بکەن ،بۆتان نییە لچ لە سیاسەتەوە بدەن ..
ئەمە ناونرا عەلمانیەت ، جیاکرنەوەی دەسەڵاتێکی ئاینیی کەڵێسایی فەرمانڕەوا ، لە ئیدارەی ووڵات و گەڕاندنەوەی بۆ قەوارەی خۆی کە ناو کەڵێسا بوو ..
بۆچی ئەمەیان کرد ؟ چونکە پیاوانی کەڵێسا کە فەرمانڕەوایی ووڵاتیان ئەکرد ، کەوتنە ڕوتاندنەوەی میللەت و بە چەندین شێوازی جیا جیا پارە و ماڵ و موڵکیان لێ دەسەندنەوە تەنانەت کار گەیشتە ئەوەی کەسێک بمردایە پسوڵەی لێخۆشبوونیان لە دۆزەخ بۆ مۆرئەکرد بە رامبەر پارە و پولێکی زۆر .. هەر ئەو دەسەڵاتە ناشیرینە ، دژایەتی زانستی دەکرد و چەندین زانای وەک کۆپەرنیکۆس و گالیلۆی کوشت و ئەشکەنجە وزیندان کرد .
بەڵام زۆر پێم سەیرە و تەنانەت پێکەنییشم دێ ، کە دەسەڵاتۆکەیەکی هەرێمایەتی وەک ئەمەی خۆمان کە ڕاستەوخۆ ئەمەریکا و ئێران و تورکیا بڕیاری لێ دەدەن و نەوتەکەی دیزە بە دەرخۆنە دەکەن و بۆردومانی دەکەن و دینارەکەی ڕیسوا ئەکەن و کردوویانە بە بازاڕی تایبەتی خۆیان ، ئەبێ چ بنەمایەکی دەسەڵاتی تێدا بێ هەتا ناو بنرێ دەسەڵات ؟؟؟
ئینجا ئەگەر وەک گریمانەیەک ئەم دەسەڵاتۆکەیە ناو بنرێ دەسەڵات ، ئایینی ئیسلام چ جومگەیەکی بەڕێوە ئەبات هەتا ئاینی لێ جیا بکرێتەوە وبکرێتە سیکیولار ؟؟؟ لە ڕاستیدا لەم ٣٣ ساڵەدا دوو هێزی دژ بە یەک و ڕکابەر حوکمی هەرێمەکەیان کردووە کە زیاتر دەرەبەگن و هیچ بنەمایەکی ئاینییان نەخستۆتە یاساکانیانەوە ، و چەندین جار دژایەتیی ئاینیان کردووە و لە کۆمەڵە و دەستە ئاینییەکانیان داوە و لە زیندان توندیان کردوون ..
پاشان ، گریمان ئاین حوکم ئەکا ..باشە ئێمە وەک محمەد نوری ئەڵێ ، ئەگەر ئیسلام و پیاوانی مزگەوت و حوجرەکان لە مێژووەکەمان دەر بکەین ، مێژوومان هیچی تیا نامێنێتەوە . بە واتایەکی تر لە قازی محەمەدەوە بۆ شێخ سەعیدی پیران ..بۆ پیاوانی تەریقەت و شاعیر و بیریار و فەیلەسوف و مامۆستایان ، سەرجەمیان پەروەردەی قورئان و ئیسلام بوون ..
واتا سەربەرزییەک کە لە مێژووماندا هەبێ ، ئاینی ئیسلام سەرچاوەکەی بووە ..پیاوێک شانازیی پێوە بکەین ، قورئان مامۆستاکەی بووە ..
ئایا تاوان و گەمژەییەکی گەورە نییە ، ئەم ئاینەی کە هەموو پیاو و سەرکردە و شانازییەکانی پێداوین ، وەک ئاینێکی کەڵێسایی لەڕێلادراوی ئەوروپای سەدە تاریکەکان حیسابی بۆ بکەین و ..بڵێین ئەبێ لە دەسەڵات جیای بکەینەوە ؟؟؟!!!!
نە دەسەڵاتیش ئەسڵەن وجودێکی هەبێ و .. نە ئاینی ئیسلامیش بە هیچ جۆرێ بەشداری ئەو دەسەڵاتەی کردبێ ؟؟؟
بە ڕاستی جێی پێکەنینە ..
ــنەوزاد بەندی ـــ
