نا، ئەو ژولیایە نییە.. نەوزاد بەندی

تۆ بڕوانە ..

ئەم شارە پڕە لە ژولیا ..

ئەنتەرنێت  ئەگەر بڕوخێ بەسەر ژولیادا ئەڕوخێ ..

لە گەڕاندا هەر پیتی (ژ) گەر بنووسی ،

سەدان ژولیا هەروەکو،سەرباز ڕیز ئەبن ..

بەڵام هیچیان وەک تۆ ،

 شیعریان  لێ نابارێ ..

هیچیان وەک تۆ ،

لەناوەختا

  باڵندە  ئاسا ،

 پەنجەرەی ژوورەکەم

ناکەن بە شانۆ ..

پیتەکانیان

 بۆنی شلیکیان لێ نایە ..

شیعرم بۆ ناخوێننەوە ..

بە لاستیکی بۆنخۆشی کاڵ و پەمەیی ،

ترس و فرمێسک و دوو دڵیم 

ناسڕنەوە ..

هیچیان وەک تۆ ،

ناتوانن دڵم  بە پیتی ڕەنگاوڕەنگ بۆ بچننەوە  ..

هیچیان کلیلی قەفەزی

سنگمیان لا دەست ناکەوێ ..

ناتوانن بابلنیزامی قەفەزەکە بکەنەوە ..

دڵ هەڵفڕێ ..ڕزگاری بێ

لە ئەشکەوتی برینەکان..

لە خۆم ..

لە گەل و نەتەوە .. !

هیچیان

ئازایەتی ئەوەیان تیا نیە هیچیان ،

جنێوێ بدەن بە ئاغا ..

چرای کۆشکێکی بشکێنن ..

قێز بکەنەوە لە فیلە پەڕۆینەکانی ناو میدیا ..

لە شاعیرە درۆزنەکان ..

لە مەسینەهەڵگرەکان ..

هیچیان وەک تۆ ،

ئازایەتی ئەوەیان تیا نیە ،

بڵێن :من نەخۆشم ..من نەخۆشم ..من نەخۆش ..

ڕاستگۆیی ئەوەیان نیە ،

دانی پیانێن :

ئەو ژیانە یەک شەق زیاتری قابیل نییە ..

کەسیان ناتوانن ،

 بەرپرسێ

کی گیڤخواردوو ،

 لە ناماقوڵیی

 ڕابگرن و پێی بڵێن :

دەبەسە ..دە بەس ..گوخواردن ..

٭    ٭    ٭

ئیتر بۆت ناگەڕێم .. ژولیا..

هەر خۆی تاوانە لەو شارە پڕ لە دوکەڵ و دکتۆرە ،

پڕ لە دەرمان و نەخۆشە ..

پڕ سواڵکەر و ملیاردێرە ،

سۆراخی ڕوناکیی بکرێ ..

هەر خۆی ناڕەوایە لەسەر  ئەو شەقامە پڕ  لە زبڵ و دروشمانەدا ،

پرسیاری  ئەدرێسێکی

وەک تۆ بکرێ  ..

جۆرێکە لە جۆرەکانی بێ هودەیی ،

لەو  هەموو دەمامکەدا ،

چاو

بۆ ڕوخساری بێ ڕتوش ..

بۆ زمانێکی بێ درۆ ..

بۆ شیعرێکی پڕ لە مرواری

بگەڕێ ..

کارەساتێکی گەورەیە ،

کە ئیتر زامەکانتم بۆ ناخوێنیتەوە ..بە بێ هۆ ..

کە حونجەی ووشە ناکەم و

تاقەتم نیە لەگەڵ شیعر دانیشم

بە بێ تۆ ..

کارەساتێکی گەورەیە ..

زستان ئەڕوا و

نە بەفر دێتە هەیوان و

نە تۆ ئەڕژێیتە سەر شاشەی

مۆبایلەکەم

بە نیوەشەو

بە نیوەڕۆ ..