شیعر/ ئێوارانە- ٤٢.. سەردار جاف
ديسانەوە ئێوارە هات
سيحر دەبێتە ميوان و
چراخانمان فوو لێ دەکرێ
ئەم ئێوارە لە ئامێزی دوێ ئێوارە ئاڵاوە
باوەش بۆ يەکدی دەکەنەوە
خەون بە کراسە رەنگاڵەکەوە دەبينين
هۆدەيەکی ئەفسوناوی
راڕەوێک تاريک و روون
داڵانێ پڕپڕ لە خێو
خێو ختوکەی خەياڵە خەراباتەکان دەدا
لەو لايشەوە
ئەفسانە گرێی لە باخچە و گەڵا رەشەکان داوە
کۆڵانە تەنگەبەرەکە سامناک
قوتووبەندە کريستاڵييەکە
بە خانمێکی شۆڕەبی
پڕ لە خەياڵ
لە نێو جمە و ئاپۆڕادا لەنگەرگرتوو
خانمێ بە سترێسەوە
سەراپا بيری ئاڵۆزە
ترس لە بەيان لە ئەدەب، شنەی شەماڵ
کپ کپ تەم تەم
هەنگاوەکان بە ئاستەم و لە سەرەخۆن
لە بانەرۆژی تەنيشت
حەشاماتێکی خەڵکیيە
ديقەتدانێکی ورد بينين
ئێرەيش جمەی دێ لە خێوان
خێو خەو دەبا
بوون و نەبوون دەڕووخێنێ
رۆحمان دەبا و
خێو لە کڵاورۆژنەوە دێت و
لە دارستانێکی تاريک تووڕمان دەدا
نەبوو جارێ
جنۆکە وەک کيژێکی جوان و ناسک بێ
بۆ من و بيری شەيدا
قەت قەت نەبوو بە کوڕێ شۆخ
يان شۆڕەسواری ميرنشينەکەی شەهلا
ئەمێستا خێو
لە نێوانی پەنجە تووتەی من و ئەوا
پياسەی دابڕان دەکا
لە قۆزاخەی بای ئۆدنا
نووزە خەوی تروسکەمان
بۆ ئەوديوی با و هەناسەی ژيان دەبا
پێکەوە بين
چۆن بێ کەسی چۆن بێکەسم
خۆشم دەوێی خۆشەويسترين کەسم
٢٨ / ٦ / ٢٠٢٣
