دەسەڵاتی ویلایەتی فەقیهی ئێران هەوڵی مانەوە دەدات!.. عەبدولڕەحمان گەورکی

چاوخشاندنێک بەسەر رۆڵی سوپای پاسداران لە سەرکوتکردن، شەڕخوازی و تیرۆریزمی رێژیمی ئێراندا
عەبدولڕەحمان گەورکی، نووسەر و شرۆڤەکاری سیاسی

کۆمەڵگای نێودەوڵەتی زیاتر لەو راستییە نزیک دەبێتەوە کە “سەری ماری ویلایەت لە تارانە”. ئەمە ناونیشانێکی وردە کە بۆ دیکتاتۆرییەت لە ئێران و سیاسەتی سازان لەگەڵ دیکتاتۆرییەتی دەسەڵاتی ئایینی جێی خۆشحاڵی نییە. بەڵام راستییەکان بە تاڵی و سەرسەختییەوە خۆیان دەردەخەن!
ڕۆڵی ماڵوێرانکەری “ماری ویلایەتی فەقیهی” لە شەڕی ئەمدواییەی رۆژهەڵاتی ناوەڕاستدا بە جۆرێک دیارە کە نەک هەر نکۆڵی لێناکرێت، بەڵکو رۆژ بە رۆژ زیاتر دەرکەوتووە. بەڵام بۆچی خۆیان لە بەئامانجکردنی سەری “مار” و بە “بەرد” پانکردنەوەی سەری مارەکە بە دوور رادەگرن؟!
لێرەدا سیاسەتی سازان لەگەڵ دیکتاتۆرییەت جێ دەهێڵین. دەسەڵاتی دیکتاتۆرییەتی ئایینی لە ئێران لە قۆناغی کۆتاییدا “هار”ە و بە “هیستریا” هەوڵی مانەوەی خۆی دەدات. بە تایبەت کە تێکەڵ بە “جەنگ سازکردن لە رۆژهەڵاتی ناوەڕاست” کراوە! خامنەیی کە دەبینێت لە ژێر گوشار و گەمارۆی “راپەڕینی گەل”دایە و هەستی بە شەپۆلی “ڕوخاندنی رژێمەکەی” کردووە، چارەسەرەکەی لە “هەڵایسانی شەڕ” لە رۆژهەڵاتی ناوەڕاست و “تیرۆریزم” دۆزیوەتەوە” و جگە لە ناوچەی رۆژهەڵاتی ناوەڕاست، دەستی بۆ ئەوروپا و ئەوروپییەکانیش برددوە. هەربۆیە لە پێناو مانەوەی رژێمە ناشەرعیەکەی، هاوتەریب لەگەڵ ئەم کردەوە تیرۆریستی و نامرۆڤانەی دەرەوەی سنوورەکانی ئێران، زیادبوونی ئێعدامەکانیشی لە ناوخۆی ئێراندا خستووەتە کارنامەکەیەوە. بەڵام ئایا رێژیمی ئێران بەم شتانە دەتوانێت لە سەرکار بمێنێتەوە؟
خامنەیی لە کۆتایی ئەمساڵدا (واتە ٢٠٢٣) هەموو دەزگا سەربازی و هەواڵگری و تیرۆریستییەکانی خۆی خستۆتە گەڕ بۆ دامرکاندنی راپەڕینی خەڵکی ئێران و لادانی راپەڕین لە رێبازە راستەقینەکەی، واتە رووخاندنی دەسەڵاتی دیکتاتۆریی ئایینی و بە لاڕێدابردنی راپەڕین و دڵساردکردنەوەی گەل و بیرورای گشتی لە جیهان، هەتا سەرنج بخرێتە سەر شتیتر. بۆ ئەوەی رەنگە کاریگەری هەبێت و لە ژێر رۆشناییدا، بتوانێت دەسەڵاتەکەی لەسەر پێ بهێڵێتەوە!
بەڵام خامنەیی “حیسابێکی هەڵەی مێژوویی” هەیە کە “دۆخی ئێران و ناوچەکە و جیهان گۆڕاوە و هەرگیز ناگەڕێتەوە بۆ رابردوو”. چونکە خەڵکی ئێران بە هیچ شتێکی کەمتر لە رووخاندنی دەسەڵاتی دیکتاتۆری لە وڵاتەکەیان رازی نابن.
پەرەپێدانی شەپۆلی سەرکوت و ئێعدام لە ئێران!
ڕۆژ نییە “ئیعدام” بە شێوەی جیاواز لە لایەن رێژیمی ئێرانەوە ئەنجام نەدرێت. مەبەست لە ئیعدام و سیدارە، جگە لە چاوترسێنکردن و تۆقاندن لە کۆمەڵگادا هیچیتر نییە. لەسێدارەدانەکە لەسەر ئەو کەسانە چڕ بووەتەوە کە هەنگاویان ناوە بۆ راپەڕین لە پێناو رووخاندنی دەسەڵات. رەهەندەکانی “لە سێدارەدراوان” زۆربەیان سیاسییە و بۆ ئەوەیە کە دژایەتیی دەسەڵاتی ویلایەتی فەقیهی دەکرێت و هەموو چین و توێژەکانی ئێران دەگرێتەوە. لێرەوە دەتوانین پێشبینی ئەوە بکەین کە رێژیمی ئێران تا چەند لە “روخاندن” تۆقاوە و تا چ رادەیەک لە دۆخێکی “ناسک”دایە. هەموو شتێک ئاماژە بە کۆتاییهاتنی دیکتاتۆرییەت لە ئێران دەکات. ئێران و ئێرانییەکان چیتر ملکەچی دیکتاتۆرییەت نابن. گەلی ئێران لە پەرەپێدانی هەنگاوەکانی پێشوویاندا گەیشتوونەتە خاڵێکی باش. ئێستا سەرەتای سەردەمی دیموکراتیەت و کۆماری و دامەزراندنی دەسەڵاتێکی نەتەوەیی و جەماوەری گەیشتووە. ئەم راستییە بە تەواوی لەگەڵ ستراتیژی هێزی رووخێنەری دیکتاتۆرییەت بە سەرۆکایەتی خانمی مریەم رەجەوی گونجاوە.
تیرۆرکردنی ئالیخۆ ڤیدال کوادراس لە ئیسپانیا!
تیرۆرکردنی ئالێخۆ ڤیدال کوادراس، جێگری پێشووی سەرۆکی پەرلەمانی ئەوروپا لە ئیسپانیاوە لە رۆژی ٩ی نۆڤەمبەری ٢٠٢٣، یەکێکە لە کردەوە تیرۆریستییەکانی رژێمی ئێران کە بۆ رێگریکردن لە رووخاندنی ئەنجامی داوە. رەنگە سەیر بێت بۆچی رێژیمی ئێران لە خاکی ئەوروپادا ئەوەندە تووڕە و هیستریایە و لەم دۆخە هەستیارەدا، کردەوەیەکی گەورەی تیرۆریزم ئەنجام دەدات! بەڵام کردەوەی تیرۆریستی بەرامبەر ئەم کەسە ناودارە و یەکێک لە دۆستانی نزیکی موقاومەتی ئێران، پێش هەموو شتێک یەکێکە لە نیشانەکانی سەردەمی کۆتاییهاتنی رژێمی مەزهەبیی ئێران! لەم رووەوە دوودڵ مەبن!
چاوێک لە دوا نیشانەکانی دیکتاتۆرییەت لە ئێراندا!
لە ئێران شەپۆلی سەرکوتکردن و لەسێدارەدانی نەیاران توندتر بووە. نزیک بە دوو مانگە شەڕی رۆژهەڵاتی ناوەڕاست لە لایەن هێزە نیابەتییەکانی دەسەڵاتی ویلایەتی فەقیهیەوە چووەتە قۆناغێکی نوێوە و گرێدراوی سوپای پاسدارانی ئێرانە و هەنگاوێکی مەیدانییە. پەرەسەندنی شەڕەکە بەرەو وڵاتانیتری ناوچەکە، بە “ئەگەرێکی بەهێز” لە بازنەی سیاسی و سەربازی جیهان دادەنرێت. تیرۆر و کردەوە تیرۆریستییە بێ سنوورەکانی رژێمی ئیران لە دەرەوەی سنوورەکانی ئێران و بە تایبەتی لە ئەوروپا، بە تاکتیکی “لێدان و راکردن” دەستی پێکردووە. شاراوە نییە کە ئامانجی سەرەکی ئەم هێرشکردنە ناسک و ترسنۆکانە، هەوڵی خامنەییە بۆ رزگارکردنی رژێمەکەی لە نەمان!
ئێستا لە ناوەندی کێشەکانی کۆمەڵگەی نێودەوڵەتیدا، “دۆخی سیاسەتی سازان لەگەڵ دیکتاتۆرییەتی ئایینی” باسێکی گەرمی رۆژە. ئایا ئەم سیاسەتە بەردەوام دەبێت، یان دەبێت جێگەی خۆی بداتە بژاردەیەکیتر! بە پێی زانیارییەکانی بەردەست و بازنەی سیاسی ناوچەیی و جیهانی، “شەڕی سەرەکی” لە نێوان خەڵکی ئێران و دەسەڵاتی دیکتاتۆریی ئێراندایە. ئێستا ئەم کۆدەنگییە لە بیروڕای گشتی لە جیهان لە ئاڕادایە کە “تا ئەو شەڕە سەرەکییە یەکلایی نەکرێتەوە، شەڕەکانی هاوشێوەی ئەوەی لە رۆژهەڵاتی ناوەڕاستدا دەگوزەرێت دووبارە دەبنەوە” و زیان و زیانەکانی کۆمەڵگەی جیهانیش زۆر زیاتر دەبێت! چاوخشاندنێک بە بارودۆخی وڵاتانی ناوچەی رۆژهەڵاتی ناوەڕاست، لەوانە عێراق، سوریا، لوبنان، فەلەستین، یەمەن و هتد، ئەم راستییە بە باشی دەردەخات!
لێدوانەکانی خامنەیی و کەسە نزیکەکەکانی نیشان دەدات کە خامنەیی و رژێمەکەی لە پەرەسەندنی شەڕ بە تەواوی تۆقاون. ئەوان بە تەواوی تۆقاون لە (لێدانی سەری مارەکە لە تاران). چونکە زیاتر لەوانیتر هەست بە لاوازی و ناسکبوونی خۆی دەکەن. خامنەیی تامی ئەو راستییە تاڵەی کردووە کە “هەرچەندە شەڕی ئەمدواییەی دەستپێکردووە”، بەڵام ناتوانێت “تەواوکەر”ی شەڕەکە بێت بە سەرکەوتوویی! چونکە خەڵکی ئێران لە ناوخۆی وڵات، چەند ساڵێکە بە راپەڕین و ناڕەزایەتیەکانیان رێژیمی ویلایەتی فەقیهیان خستووەتە دۆخی لاوازبوون و دیفاعی و، ئێستا بەدوای دەرفەتێکدا دەگەڕێن بۆ ئەوەی راپەڕینەکانی پێشوویان بکەنە “شۆڕشێکی بناغەیی” و رووخاندنی دیکتاتۆرییەت.
خەڵکی ئێران دژی هەر جۆرە دیکتاتۆرییەتێکن لە وڵاتەکەیاندا. دیکتاتۆرییەتی پاشایەتییان رووخاندووە و ئێستاش بڕیاریان داوە دیکتاتۆرییەتی ئایینی بڕووخێنن و تێچوویەکی زۆریان بۆ داوە. به تایبەت کە ئێستا، خەڵکی ئێران لە پێوەند لەگەڵ موقاومەتی ئێران و بە بەهرەمەندبوونیان لە (دەزگای سەرکردایەتیکردنی راپەڕین) و (شانەکانی شۆڕش لە ناوخۆی ئێران)، هەست بە بە هێزبوونی خۆیان دەکەن و هەتا رادەیەکی زۆریش چەکیان دەست کەوتووە! کە رژێمی سەرکوتکەری ئێران لێی تۆقاوە.
موقاومەتی ئێران لە پێناو سەرکردایەتیکردنی راپەڕینی گەل لەدژی دەسەڵاتی دیکتاتۆریی مەزهەبی، جگە لە فراوانکردن و چڕکردنەوەی چالاکییەکانی لە ناوخۆی وڵات، لەسەر ئاستی کۆمەڵگەی نێودەوڵەتیشدا، لەسەر ناوزەدکردنی تیرۆریستیی دەزگای سەرکوتکردن و شەڕخوازییەکانی رژێم، واته سوپای پاسداران کار دەکات. موقاومەتی ئێران بانگەوازی کۆمەڵگەی نێودەوڵەتی کردووە کە ئەم هێز و دەزگا ترسناکەی سەرکوت و کوشتن بە تیرۆریست ناوزەد بکرێت. لەخۆڕا نییە کە کاربەدەستان و میدیاکانی حکومەتی تاران هەمیشە و لە هەموو بۆنەیەکدا موجاهیدینی خەلق بە (فاکتەری سەرەکی) لە پێشخستنی رەوتی ناوزەدکردنی سوپای پاسداران دەزانن و سنووردارکردنی موجاهیدین بە مەرجێک بۆ هەر پەیوەندییەکی رژێم لەگەڵ وڵاتان دەزانن!

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.