مشتێ لە ئازاری ناو پریاسکەکە.. کەنعان مدحەت

چراکە کز بووەتەوە،
یا تانەی ماندوویەتیم لێ ڕواوە؟
هەمو شتێ،
کوێرە لە حەن ئاڵۆزییە سپیکراوەکە
کابرای نمەک حەرام
هەڵبژێری پشت پەردە لۆچدارەکە
خۆی بە باگردێنی سەر ئیسک و پروسکم نازانێ و
بەردەوامە..

ئەم فریشتە نا پەردەیییانە
لە نێردەی خوا ناچن
دوو کزە ئەستێرەی لە پرتە کەوتوویان پێ
لەیەکا ناتوێنرێتەوە

بە دەست تەققەڵە دوورمانەوە داماون
ڕێ کاکێشان تا قوڵایی ئاشتی
لە مین جممەیان دێ
تا تەڵە،
گەلە قۆڵییەکە
هەڵنەوەشێننەوە
(بەردی ئەلحەد)-یان پێ
ڕاناماڵڕیتەوە

بەرنامەکە،
بە پێی بەرژەوەندی و
حەزی داڕێژراوە سەرسپییەکە
لەسەر دوندی سەنگەرما سەروقنگ هەڵواسراوە
ئەزمونەکە هیچی لە شارستانییەت و
پێشکەوتوویی نەکڕاندووە

سەرچۆپیگران،
نەوەی هەر هەمان سەرچۆپیگرانی پێشوون
گۆرانییەکانیش تێکەڵییەک لە فۆلکلۆر و ( هیپ هۆپ )
وەک ئەوە وایە بڵێی لە قورئانیشا هەڵە و
تفت و تاڵی زۆرە..
بە خوێنەوار و نەخوێنەوار لێت کۆببنەوە
شەق و زللە..
چی نەبێ لە چاویا

دێن دێن..
_ بێ پێ بڕینەوە_
براوەکانی لە خێرایی تیشک،
بە پەلەتری خوارەوە
دێن، جێ بە کۆڕەک و سەفین..
تەسک کەنەوە

کەژە ئۆکسجین لێ بڕاوەکە
هەر ژەهرە دوو ئۆکسید و ژەهرە دەرەکی
لێ نوقسانە..
( لۆزان )_ە پەیمانێکی تر
لەو نێوانە
بچێننەوە

پەڕیان بە باڵمەوە نەهێشتووە
شنەش لە خۆم زیاتر
لە هێز خراوە
چاوم بە نیشتنی،
کۆلارە لە فەنەر ڕووتکراوەکە هەڵنایە و
چیشم لە دەست نایە!

سات لە دوای سات لە جێی میزڵدان پفم تیا دەکرێ
لە کەشتییەکی لێقەوماو دەچم
ئاراستەی چارۆکەکەمم
لە دەست دابێ
بە شەپۆل و با ماوە لەنگەرگا و
چارەنووسم

ئێستا، پاسەوانیی،
بازاری زێڕ..
بە جمکانەکە سپێردراوە
گوایە بەڕێزیان لە گورگ بە خزمەتترن
مارکەی کوردیی،
ورگ چەوری دەهۆڵە تەشبین
دز، کەمە، پێیان بوترێ
داک خۆ گێش ناشێ بۆ سەردار

ئەو چراخانانەی، کارەبا،
بە دیقی خستوون و
بە یاری شێر و خەتەوە گلاندوویانیەتی
هۆی دەگەڕێتەوە،
بۆ چاوزەقکردن لە بەرگر و تەمیکردنی قازی..
هەتا هەتایە چێشتیان کوڵ نەدا و
قەت قەتیش خەمیان پێ
تەقەڵ نەکرێ..

دەبێ چەن شەهیدت دابێ
چەند ئەشکەوت و
پاڵەتاوێر..
لە ژەهرەباران پاراستبیتیان
وا ئێستا لە کۆشکا..
کاری چاگێریان پێ ڕاسپاردووی؟
بەچکەکان بە پاسەوانی
کەژاوەی حەبیبە و
کولانە مریشک..
پۆلیسانە ڕابێن
لەسەر حەپە حەپ و
پاراستنی ناوگەڵ و هێلکە مریشک؟

لە دوای هەر بەهارە چەخماخە و هەورەتریشقەیەک
دەیان دەیان دۆمەڵان، خاک، شەقار دەکەن
زنجیر و پاوەن دەبڕن..
پاش ئەو هەمو نەهامەتییەی پیا تێپەڕیوم
ئەوسا و ئێستایش،
لە ترس سەگە دان تیژەکان
تۆڕی دۆزەخە تاراوگەم پێ نابڕێ
دەنگی ناڕەزایەتیم هەڵبڕم

لە هەورازە، بەڕوو لێ توراوەکە
کەلاوەسەنگەر
شوێنەواری ناولێنراوە
پێشمەرگە،
پێشمەرگەی ناو شار
سەرەڕای ئاراستەی پێچەوانە و
بەرپرسیاریەتییەکەی!

تەواوی لەوەڕگایان لە گاوان
قەدەغە کردووە
هەر مانگایە و
کەوتووەتە بۆڕە بۆڕ
گاوان، ئەوەندەی خەمی خۆیەتی
نیو ئەوەندەی خەمی مانگاکانی نییە!

کاوێژکردن وەک مۆدێل و ستایلی هەتاهەتا
جەختی لەسەر دەکرێ!
ئەوە نییە لەسەر داوای بازاری و بندیوار
چەپڵە بۆ ( دۆشین )ی زیاتر لێدەدرێ
حەوسەڵەی دەوێ،
هەر شتێ،
بخرێتە ژیر بەندی فریاکەوتن و
لە دەستورا جێگیرکرێ!