سۆناتای شاعیر.. ستیڤان شەمزینی
لەسەر دیوارێکی کۆنی شاری بابل
بە خەتێکی بزماریی نوسرابوو:
خۆشەویستی خۆی بە شیعر دادەپۆشێ
چاو دەبڕێتە کەشتی عاتیفە
بەسەر کێوی ئارەزوودا سەردەکەوێ
دێوانەیەک لەولاوە پەیدا بوو
بە قوڵنگی دەستی
دێڕێکی تازەی ھەڵکۆڵی:
عەشق مۆمێکە
لەو کاتەی بەناو تونێلی نوتەکی ژیاندا
رەت دەبین
شاعیرەکە عاشق ببوو
مەرکانەی بەتاڵی ھەستی پڕ دەکرد
لە گوڵە ھێرۆی خۆشەویستی
ئاگری لە لەشی شیعر بەرئەدا
لەسەر شوشەی شکاوی دڵ
سەمای ئەکرد
بۆنی کەزی ژنێک لە رۆحی ئەھات
بەدزی عەقڵەوە خەونی ئەبینی
نوکی قەڵەمەکەی تۆفانێک بوو
لافاوی ماچی لەگەڵ خۆی ئەھێنا
ئەمەش حکایەتی خۆم نییە
پێدەچێت مردن سامناک نەبێت
ژیانیش ھێندە زەحمەت نییە
ھەموو شەوێک
مردن تاقی دەکەینەوە
ھەموو رۆژێکیش ئەژین
خۆشەویستی ترسناکە
ئەوە نییە بە کۆمەڵ لێی ھەڵدێین!
ئەم چەرخە سیخنانە بە دڵڕەقی
دڵڕەقی پێستێکی جادوویی ھەیە
فیشەکی خۆشەویستی نایبرێ
ئاگری شیعر نایسووتێنێ
چەقۆی فرمێسک نایدڕێت
ژنەکان ھەموو رووناکن
ژنەکان ھەموو سپین
چەند سەیرە چارەنووسیان رەشە!!
ژیان لەنێو رەحمیاندا ھەڵدەگرن
دەستیان نییە لە پەلاماردانی باخدا
فوو لە مۆمی خۆشەویستی ناکەن
ژنەکان ھەموو جوانن
شاعیر حەیران بۆ ئەو جوانییە ئەچڕێ
پیاوان بە بڵێسەی ئەو جوانییە سووتاون
لەناو مەحشەری ھەموو ژناندا
شۆخە ژنێکی زۆر بێ ئۆقرە
لە فارگۆنی ھەرە دواوەی
شەمەندەفەری تەمەندا
بە چاوە تاوسییەکانی
بە دوای مندا دەگەڕێ
٢٥-١٢-٢٠١٨
ئەڵمانیا – بیلەفێلد
