لە جیاتی سیستمی تەکنۆکرات ، سیستمی تەنکەرۆکرات.. نەوزاد بەندی
له هیچ ووڵاتێکا ، له هیچ هەرێم و شار و گوندێکی ئەم دنیا و ئەو دنیایشدا ، نییە و نەبووە و نابێ بە شەو و ڕۆژ ، لەیل و نەهار ، تەنکەرە پتڕۆڵ و نەفسا ، شەقامەکان داگیر بکەن و بەرەو دەروازە سنوورییەکان مل بنێن ..بێ ماندوو بوون ، بێ تێرخواردن ، بێ کۆتایی ،هەتاهەتایی ، بە دوکەڵی شین و ڕەشی خەستەوە ، بە هۆڕنی بێزار کەرەوە ، ئەم تەنکەرە ساحێب نادیارانە ، دێن و دەڕۆن ..جارێک تەنکەر وەردەگەڕێت و دوو سێ ئوتومبیلی داماو لەگەڵ خۆیدا گڕ دەگرێ .. جارێ تەنکەر لەناو تونێلەکاندا دەتەقێتەوە و بۆ چەندین ڕۆژ ڕێگای نێوان شارەکان دادەخرێت ..جارێک تەنکەر تلۆر دەبێتەوە و پتڕۆڵەکەی دەڕژێتە ناو ڕووباری ئاوی خواردنەوەی شار و هەتا چەند ڕۆژێک ئاوی خواردنەوە له هاووڵاتیان قەدەغە دەکرێ .. جارێ ئوتومبیلی مامۆستایەک ئەچێ بە ژێر تەنکەرێکا . . جارێ تەنکەرێک ستۆپی دەپچڕێ ، ڕیزێک ئوتومبیل وێران دەکا . . ئەمانە ڕووداوی ڕۆژانەن و هیچ لایەن و کەسێک خۆی ناکات بە خاوەنی و ..بووە بە شتێکی ئاسایی ..لە کاتێکدا دەیان و سەدان ڕۆژنامە و کەناڵی ئازاد و نائازاد و سێبەر هەن و .. چەندین فەوج پەیامنێر ، پزیشکێ هەڵەیەک بکا ، پەنجا مایکی ڕەنگا و ڕەنگ وەکو ئایسکرێم لەبەردەم نەخۆشەکەدا قوت دەکرێنەوە .. تەماتە لە بازاڕدا گران بێ ، لافاوی ئایسکرێمەکان دوکانە و دوکان دەکەن ..موچە لە بەغدادەوە تا دەگاتە کوردستان ، گێژەڵوکەی مایکە ڕەنگاوڕەنگەکان وەک گەلەگورگ بە دوایەوەن ..
ئەرێ بۆچی حەکیمێک چارەسەرێکی ئەم تەنکەرانە نادۆزێتەوە ؟ کۆرۆنا و ئەنفلۆنزای مریشک و سارس و بەراز گوزەشتن و .. پەتای تەنکەر لە زیاد بووندایە ، ئەرێ ڤاکسینێ ، ئەنتی بایۆتیکێ ، تیشکێ ، MRIیەک نییە بۆ چارەسەری ئەم تەنکەرانە ؟
ئەرێ ئەم تەنکەرانە کەی باڵیان بۆ دروست ئەبێ و شەقام و گیانی هاووڵاتیان ڕزگاریان ئەبێ لە دەستیان ؟ کەی وەک دیناسۆرەکان ئینقیراز ئەکەن و وەک چاخی دیناسۆرەکان ، چاخی تەنکەرەکان ئەبێ به مێژوو ؟ کەی مەکینەیان هەڵئەسێ ؟ کەی شۆفێرەکانیان ڕائەکەن بۆ هەندەران ؟ ئەرێ کەی خێرخوایەکی سکەندەنافیی دەرگای مافی پەناهاندەیی بۆ تەنکەر و شۆفێرەکانیان دەکاتەوە ؟ ئەرێ کەی ئەم پتڕۆڵە نەفرەتییە تەواو دەبێ ؟ کەی نەفسا ئێکسپایەر دەبێ ؟ ئەرێ کەی ئەم خاوەنە نەناسراوانە تێر دەخۆن ؟
شەقامەکان هەموو وەک هەویری پیتزا ، چاڵ و چۆڵ و وێران بوون لە ژێر پێچکەی هەزاران تەنکەری 36000 لیتریدا .. هەوا و ئاو و ژیانی هاووڵاتیان وەک تونی حەمام ڕەش و قێزەون و تاڵ بوون ..
لەدوای ئەوەی خەڵکەکە ، لە سیستمی میلیتاریی دۆنکیشۆتیی بەعس ڕزگاریان بوو ، خەونیان ئەوەبوو سیستمی تەکنۆکراتی بێتە ئاراوە ، کەچی سیستمی میلیشیاگەری تەنکەرۆکرات هاتە ئاراوە …
تەنکەرە نەفسا ، نە ئەوەڵیان هەیە و نە ئەخیر ..
هەر ئەوەیە و .. کەس بۆی نییە بڵێ لەل .. ڕۆژانە قوربانییەکانی تەنکەر ئەکرێن بە ژێر خۆڵەوە و ئەڵێن قەزا و قەدەرە …قەزا و قەدەر ..
پێشنیار ئەکەم لەمەودوا هەر وەفدێ بێتە کوردستان ، لە جیاتی گوڵ ، چەپکێ دۆلاری خوێناویی لەسەر گۆڕی شۆفێری تەنکەری وون ، تەنکەری ساحێب نادیار ، دانێ … پێشنیار ئەکەم مۆنۆمێنتی تەنکەری وون دروست بکرێ و تیایدا وێنەی قوربانیانی تەنکەر هەڵواسرێ ، کە لە قوربانییەکانی کیمیاوی و ئەنفال نزیک بۆتەوە .. لە قوربانییەکانی تاوەری بەهێزکردنی تۆڕی مۆبایلی ناوشارەکان نزیک بۆتەوە …
(( هەتا ڕۆژی قیامەت دێت و نایێ
لە دووری نامە شەرحی ماجەرایێ
لە ئاهـ و ناڵەیی پەروانە خەوفێ
کە تۆ بگرێ خودا ئەی شەم بە بایێ
دەمت دەرمان، تەبیب تۆ، من بریندار
دەسا بۆ حاڵی من تەدبیر و ڕایێ )) – وەفایی –
نەوزاد بەندی
