سێ شیعری شەماڵ بارەوانی
باوەشێک عەبەس
عیشق ماڵی خەیاڵی شیعری لە نەزۆکی پڕکردم
جگە لە هێنانی جانتایەک گریان و دروستکردنی قەفەسێک بۆ ڕۆحم، هیچیتری بۆ نەکردم
عیشق باوەشێک عەبەسی بۆ هێنام و
ژێدەری جۆگەلەی خۆشبەختی وشککردم
عیشق وەرزێکی تر پاییزی بۆ هێنام و
هەرچی هەمبوو لە خەون و خولیا،
هەمووی لێ ونکردم
عیشق ئۆگر بە پارچە پارچەبوون و فێری سترانی فیراق و هاوەڵێتی تەنیایی کردم
جا عیشق چی لێنەکردم
خەڵکی تەنها جارێک دەمرێت
من بەهۆی عیشقەوە ڕۆژی سەد جار دەمردم
……………………………
سەربوردەی وەهم
ئازیزەکەم،
ئێمە نەسەبمان دەچێتەوە سەر دیباجەی هەرزەگومانێک و
لە منداڵدانی دەهریبوونەوە هاتووین
ئێمە لە نەوەی تیۆرەگوناحێکی سەرسەرین و
تا بینەقاقامان نغرۆی پارادۆکس بووین
وەرە با لە پەراوێزی حەکایەتەکانی هەزار و یەک شەوە چیرۆک بدەینە دەم چیرۆکەوە، بەڵکو مەرگی شەهرەزادێکی تر دوا بخەین و
تووڕەیی نێرە شازادەیەک هێوربکەینەوە
لەشێوەی سیزیف گیرمان خواردووە لە نێوان سێوەکەی خوداوەند و تاتەبەردێکی مەزهەب
بەمیان لە بەهەشت دەرکراین و
بەویان دەماننێرنەوە هەمان شوێن!
دەبێ چەند میقاتی تری بوێت تا بۆ خودای بسەلمێنین کە ئێمە پاکیزەین
ئێستاش هەر دەڵێم چی دەبوو گەر خودا لە بری پەراسووی پیاو، لە میهرەبانی خۆی دروستی کردباین؟
دەی با بگەڕێینەوە
بۆ دەرەوەی فەهرەستی مێژوو و
دامێنی یەکەم نوتفەی زەمەن
بڕۆینەوە سەر سنوورەکانی مەنفا و
لە ئاستانەی خورافەدا خۆمان فەنا فەنابکەین
بڕۆینەوە بۆ تخووبەکانی دۆزەخ و دووباره بە سێوێکی تری نەفرەتی خوداوەند تاقی بکەینەوە
ئێرە چیتر بۆ ئێمە دەست نادات
پڕبووە لە چەمکی گوناه و
لە سەربوردەی وەهم
ڕێگاکان هەموویان دەڕۆنەوە ماڵی سمێڵ
——————
پڕ بە میزاجی نێرێک
بێدەنگ بن ژنێک قسەدەکات
بە ڕاسپۆتینەکانی هەوەس بڵێن جەستەی من مۆنالیزایەکی ئێزدانییە، نەک کێڵگەی خۆخاڵیکردنەوە
لەبیرم دێت من حەسرەتەکانی ژنم دەنووسییەوە،
ئەوان وشەکانیان دەخنکاندم
لەبیرم دێت دەیانگوت ئافرەت لە عەورەتەوە هاتووە و مێ زۆینەی دۆزەخ پێکدێنن!
لێرە هێشتا هەمووان دەڵێن دووکەڕەت کچێک، ئینجا دەکات بە نێرێک!
بەرلەوەی بێم بۆئێرە، گوێم لە قیڕەقیڕی منارەی مەعبەدێک بوو بە دیار تەرمی ڕۆمانێکی نەوال سەعداوی و خەمەهەڵکڕووزاوەکانی ژنێکەوە قاقای دەکێشا
دوێنی نێرەنەریتێک و ڕەشەبایەکی زۆر کۆن بە گڤەگڤێکی جاڕسکەر هەڕەشەی زمانی بڕینیان لێکردم
من لە عادەتی ژنبوونمەوە لەنگەرم گرتووە و
هەرگیز ناڕۆمەوە سەر نەسەبی هیچ ڕەنگێکی پیاوانە
لێناگەڕێم کارمامزی خولیاکانم لەناوقەرەباڵغی لوورەلووری هیچ بیابانێک ڕاوبکرێن و لەژێر پۆستاڵی پاتریارکیدا شووشەی خەونەکانم خوڕەیان بێت
بۆچی دەبێ پڕ بە میزاجی نێرێک قەفەس بۆ حەزەکانم بدوورن
بۆچی پیاو ئیعرابی ڕستەی ژنبوون بکات و وەزن و قافییە بۆمدێڕەکانم دابنێت
خودایە، من لەو موعادەلەیه هەرتێنەگەیشتم!
لە هەمووی سەیرتر!
شەو پارچەمەزهەبێکی مێزەربەسەری هەزار و چوارسەتساڵ بەرلە ئێستام لەژێر سەرینەکەی باوکم دوزییەوە،
تێیدا نووسرابوو: ژن لە حزووری پیاودا نابێت بە دەنگی بەرزپێبکەنێت. بۆچی دەبێ پڕ بە میزاجی نێرێک قەفەس بۆ حەزەکانم بدوورن
بۆچی پیاو ئیعرابی ڕستەی ژنبوون بکات و وەزن و قافییە بۆمدێڕەکانم دابنێت
خودایە، من لەو موعادەلەیه هەرتێنەگەیشتم!
