Skip to Content

شتێك له‌مێژووی ئاوابوون … نه‌ژاد عزیز سورمێ

شتێك له‌مێژووی ئاوابوون … نه‌ژاد عزیز سورمێ

Closed
by تشرینی یه‌كه‌م 19, 2017 General, Poems

• په‌رێز

گیا بڵند بوو ، له‌ كڵاوه‌ی چۆكی ده‌دا..
له‌ وه‌رزی ئاوس بووندا
ڕه‌گه‌كان هاتنه‌وه‌ به‌ر با..

• ڕه‌وڕه‌وه‌ی وه‌ستان

له‌سه‌ر به‌ردی سێڕیانه‌كه‌ دانیشتووه‌
چاوه‌ڕوانی (به‌یان) ده‌كا..
گه‌لێ‌ جار (به‌یان) هاتووه‌
تریفه‌ بارانی كردووه‌ و
تێشتی له‌گه‌ڵدا خواردووه‌..
ئه‌و هه‌ر له‌سه‌ر به‌رده‌كه‌یه‌ و نابزوێ‌ !
وشت بووه‌ !
چاوه‌ڕوانی (به‌یان) ده‌كا..

• ئاڵ بردنه‌وه‌

ئاوێنه‌كان به‌ دیواره‌وه‌ شكاون..
هه‌تاو ڕووته‌ ، سایه‌ پۆشته‌
پێینگانی كچی ئاسمان داری حه‌سره‌تی لێ‌ ڕواوه‌ .

• خوێنكێش

له‌ ناو قه‌ده‌وه‌ پێكراوه‌..
تنۆكێ‌ خوێنی لێ‌ نه‌هاتووه‌
شاڵی پشتی ته‌مه‌نیشی هه‌ڵمشتووه‌ ..

• ته‌نافباز

وه‌كو په‌مۆ :
له‌ قۆزاخه‌ و
له‌ مه‌كینه‌ و
له‌ دارهه‌نه‌یشدا ده‌ژی ..
تا ئه‌وه‌ی له‌ په‌رداخێكیش نقوم ده‌بێ‌
ده‌ریا هه‌ستێ‌ ناگاته‌ گوێزینگانی.

برایه‌تی

ئه‌وان تینی كوره‌ی ده‌فیو ،
ئێمه‌ شه‌خته‌ ..
ئه‌وان گیا ،
ئێمه‌ش به‌رخی دوو باقه‌ گیا …

• زایه‌ڵه‌ی بێ‌ ده‌نگی

له‌و ساته‌وه‌ سوژنی
له‌ بن پیلی شه‌وه‌ی ڕۆژگار ڕاكردووه‌
هاوار ئه‌كا
كه‌س دیار نییه‌
(با) وه‌ستاوه‌ !
ئه‌ویش به‌ ده‌نگه‌ ده‌نگی خۆی ..
نه‌وه‌ك هه‌ر كه‌ڕ ، لاڵیش بووه‌ ..

پانكی مێشك

بیری نایێ بارانی گرتبێتیه‌وه‌
نه‌ی دیوه‌ خوێنی تێ‌ بگه‌رێ‌ !
پانكی سه‌رچاوه‌ی گومڕایی ،
هه‌ر له‌ دوورڕا ماكی كه‌ڕووی پێوه‌ دیاره‌ .

كێلوكه‌
تاك تاك ،
شێوه‌ی جریوه‌ی پاساری ..
تاك تاك ،
شێوه‌ی زه‌بوونی و ناچاری
تاك تاك ،
كه‌ ته‌نیایی هه‌ر بۆ خوایه‌ .

خێزه‌ڵانی سنگه‌كان

ئه‌وه‌ هه‌ناسه‌دان نه‌بوو
ئه‌وه‌ ڕمانی چیا بوو ..
چه‌خماخه‌ی هه‌وره‌ تریشقه‌ و
فڕینی هه‌موو چۆله‌كه‌ و كۆتره‌كانی دونیا بوو ..
ئه‌وه‌ هه‌ناسه‌دان نه‌بوو .

بانگۆش

ئێستا مناڵان
یاری به‌ باگردێنه‌كه‌ی ده‌كه‌ن
ده‌سكه‌كه‌ی كردووه‌ به‌شه‌قه‌ و پێی ده‌ڕوا ..
ده‌رناكه‌وێ‌ ،
چوار وه‌رزی ساڵ له‌ ماڵێیه‌ …
9 /1989

Previous
Next
Kurdish