Skip to Content

ئۆپۆزسیۆنی شارستانی، بەرپاکردنی کۆمەڵگەیەکی زیندوو … ئاسۆ جەبار

ئۆپۆزسیۆنی شارستانی، بەرپاکردنی کۆمەڵگەیەکی زیندوو … ئاسۆ جەبار

Closed
by تشرینی یه‌كه‌م 24, 2017 General

“جیهانبینی، فشار، هەڵوەشاندنەوە”

زیاد لە 7 ساڵ لەمەوبەر لەوتارێکدا باسم لە ئۆپۆزسیۆنی شارستانی کرد..ئێستا کاتی دروستکردنی بزوتنەوەیەکی شارستانی گەورەیە دژی نادپەروەری، گەندەڵی، خیانەتی گەورە، تاڵانی، مافیاگەری، بێدەنگی، سەرشۆڕی، دادگاییکردنی بەرپرس و سەرکردە دز و گەندەڵ و پیاوکوژەکان و خیانەتکارەکان، دروستکردنی فشاری شارستانی بۆ راپێچکردنی نادادپەروەری بۆ ناو زبڵخانە..
ئۆپۆزسیۆنبوون مانای ئەوە نیە بزوتنەوەیەک دروستبکەیت و قسەی زل بکەیت و کۆمەڵێک لاکەوتەو خانەنشینی حیزبی گرد بکەیتەوە لەسەر مێزێک و بەیاننامە دەربکەیت، ئۆپۆزسیۆن واتە ئەکادیمیبوون و فشاری کرداری و شارستانی. وەک چۆن ئۆپۆزسیۆن مانای ئەوە نیە تەلەفیزیۆنەکانت پڕبکەیت لەدەنگەدەنگ و شەقامەکان خاڵیبکەیتەوە لە ناڕەزایی، ئاوەهاش پڕۆژەی شارستانی فشاری ئۆپۆزسیۆنی حەقیقی بەرپاکردنی روانین و دنیابینییەکی ئەکادیمی و هاوچەرخە لە دیدگاو هەڵوێست و هەنگاوی گەورە. ئەوانەی پێنوایە ئۆپۆزسیۆنبوون واتە هەڵبژاردنی بێدەنگی و سەلامەتی یان بەیاننامەو تەشریفات، تێکنەدانی بارودۆخەکەو رێزگرتن لە پاشاگەردانی و رازیبوون بەو قەدەری هەموانی تێکەوتووە زۆر کاڵفامن، بێئەندازە فاشیلن لەڕووی ئەکادیمی و شارستانی و هاوچەرخبوونەوە.

ئۆپۆزسیۆنی شارستانی سەرباری ئەوەی ھەوڵێکی شارستانی ھاوچەرخ و مۆدێرنە بۆ بەرپاکردنی ناوەندێکی رەخنەئامێزو فشارهێن، پێکڕا پڕۆژەگەلێکی رۆشنبیری و مەعریفی و شارستانییە بۆ خولقاندنی دنیابینییەکی پراکتیکی و روانینگەلێکی پەیوەندیامێز بۆ بەرھەمھێنانی بەرپرسیارێتی شارستانی و گەڕانەوەی ئیعتیبار بۆ پڕۆژەی رژد و مرۆیی و هاوچەرخ، بۆ جیاکردنەوەی مەعریفە لەجەھل، روناکبیری لەتاریکبیری، کۆنخوازی لەنوێخوازی و جیاکردنەوەی گەندەڵی لە دەستپاکی، بەدڕەوشتی لە مرۆڤدۆستی، ژیاندۆستی لە مەرگدۆستی، جیاکردنەوەی نادادپەروەری لە لەدادپەروەری.

رەنگە ئۆپۆزسیۆنی سیاسی بتوانێت ئەو ململانێ سیاسی و دەسەڵاتگەراییە بگەیەنێتە ئاستێکی پێشکەوتوی دبلۆماسی و گۆڕان و وەچەرخانی زیندوو دروستبکات، بەڵام ئۆپۆزسیۆنی شارستانی و فەرھەنگی دەبێتە خولقێنەری دنیابینییەکی جیاوازو دروستکاری روانینگەلێکی ھەمەڕەنگ و پەیوەندیامێز و رەخنەئامێزو بەرپاکردنی فەزایەکی بەرپرسیارامێزو توێژینەوەو لێپێچینەوەی مەعریفی و رۆشنبیری لەئاستێکی شارستانی مۆدێرن و ھاوچەرخدا.
کۆمەڵگە بەرپرسیارە بەرامبەر درێژبوونەوەی تەمەنی دیکتاتۆرەکان، ھاوڵاتی بەرپرسیارە بەرامبەر تێکشکانی ناعەدالەتی و بەرپاکردنی ھێزێکی شارستانی دژی نائینسانیەت و گەندەڵی و راوڕوت و مافیاگەری، وەکچۆن بەرپرسیارە بەرامبەر لێپرسینەوە لەبەرپرس و دەرەبەگە حیزبی و ھارونە رەشیدەکانی دەسەڵات، ھاوکات بەرپرسیارە بەرامبەر خولقاندنی ھێزێکی شارستانی و رۆشنبیری و کولتوری لەپێناو ژیانێکی شایستەو گەڕانەوەی بەھا ئەخلاقی و ئینسانییەکان بۆ نێو ئەو رووبەرە کۆمەڵایەتی و رۆشنبیرییەی کە ئەوڕۆکە سەرلەبەری بەھا ئینسانییەکان لەژێر پێی ستەمکاری و نادادپەروەریی کۆمەڵایەتی و زەبروزەنگی ئابوری و سیاسی و سایکۆلۆژی و کۆمەڵایەتیدا کاڵبوونەتەوە.

کۆمەڵگە بەرپرسیارە بەرامبەر گەورەکردنی رووبەرەکانی ئازادی و بچوکردنەوەی رووبەرەکانی حیزب و ستەمکاری و ناعەدالەتی و نائینسانیەت.
دەرەنجام کۆمەڵگە بەرپرسیارێکی راستەقینە و زیندووە بەرامبەر گۆڕانکاریی سیاسی و کولتوری و کۆمەڵایەتی و ئابوری، ئەو نائینسانیەتەی کە دەسەڵاتە دیکتاتۆرو ستەمکارەکان تاسەرئێسقان بەرگری لێدەکەن، کۆمەڵگە دەتوانێت لەیەک چرکەی شارستانی و ئیسانپەروەریدا تێکیبشکێنێت، بەڵام ئەم پڕۆسەیە بێئەندازە وەستاوە لەسەر ئەو بەرپرسیارێتییە شارستانی و ئەخلاقی و کولتورییەی کە ھەڵگری کایەیەکی مەعریفی زیندووە بۆ پراکتیزەکردنی ئینساندۆستی لەرووبەرێکی زیندووی شارستانیدا.
جیھانبینی نوێ ھێزێکە بۆ ھەڵوەشاندنەوەی دنیای داخراو و روانینی داخراو، ھاوکات کۆنخوازیش ھێزێکی نەریتپارێزە بۆ داخستنی روانین و داگیرکردنی جیاوازییەکان، جیھانبینی مۆدێرن ھێزێکە بۆ گۆڕان و بەرپاکردنی جیاوازی و خولقاندنی فەزایەکی کراوە، بەڵام کۆنخوازی ھێزێکە بۆ بەرپاکردنی دوبارەبونەوەو رەنگڕێژکردنی نەریت و نائەخلاقیاتی مۆنوپۆلیزەکردن. ئەم شێوازە لەجیھانبینی دیاردەیەکی نوێ و تەوژمێکی کاریگەرترە، بۆ بەرھەمھێنانی ھزرێکی دیکە و خەیاڵدانێکی دیکە، مرۆڤێک بەرھەمدەھێنێت کە دەکەوێتە دەرەوەی حیکایەتە بچوکەکان و دەرەوەی ئەو دنیا داخراوەی کە دنیابینییەکان و روانینەکان بچوکدەکەنەوە، واتە ھزرێکی رەخنەئامێزی پاش حیکایەتە گەورەکانە.

جیھانبینی نوێ وەک ھێزێکی رۆشنبیری و شارستانی و کولتوریی و کۆمەڵایەتی، جەستەیەک نییە بکوژرێت و بەدەسترێژی مەرگ خامۆشی بکەن، ھیچ ھێزێکی میلیشیایی و ھەمەجی ناتوانێن و خەیاڵ و خەونی زیندووی گۆڕانکاریی و روانین و دنیابینییە نوێکان خەڵتانی خوێن بکەن، دەتوانن بەندیخانەکانیان پڕ بکەن لەجەستە و رۆحی زیندوو، بەڵام ناتوانن خەیاڵ و خەونی ئینسانەکان بەند بکەن، دەتوانن بە ناشیرنترین و قێزەوەنترین کردەی نائەخلاقی ئەشکەنجەی خەڵک بدەن، بەڵام ناتوانن ئیرادەی روانین و جیھانبینی ئینسانەکان لەناوبەرن، دەتوانن شەقامەکان پڕبکەن لەچەکدارو پیاوکوژو چەک و تفاقی مەرگ، بەڵام ناتوانن شەقامەکان خاڵیبکەنەوە لەجیاوازی و ناڕەزایی و رەخنەو دنیابینی نوێ، دەتوانن نیشتیمان پڕبکەن لەسەدان دەزگای پاراستن و ئیستیخباراتی و حیزبی، بەڵام ناتوانن تا قیامەت ئینسان بکوژن و وەک جەلادی زیندوو تا ئەبەد بمێننەوە.
ئەوە جیھانبینی و روانین و فیکری نوێیە کۆتایی بە دەسەڵاتە ھەمەجی و ئینسانکوژو جەلادەکان دێنێت، ھەرگیز میلیشیاکان و دیکتاتۆرەکان نەیانتوانیوە کۆتایی بە نیشتیمان و کۆمەڵگە بھێنن.

فشار

بەرلەدروستکردنی فشار پێویستمان بە دروستکردنی ستراکچەرێکی زیندووی کۆمەڵایەتی و فەرهەنگی و شارستانی زیندوو هەیە لەڕووی دامەزراوەیی و عەقڵیەت و دنیابینییەوە، بەر لەبەرپاکردنی هێزێکی سیاسی یان کڵێشەسازییەکی شارستانی پێوستمان بە عەقڵییەتییەکی حەکیمانەی هاوچەرخە، پێستمان بە سڕکردن و تێکشکاندنی عەقڵیەتی حیزب و خێڵ و بنەماڵەگەرایی و مەزهەبگەرایی و ئاینگەراییە بەسەر کایە شارستانی و فەرهەنگی و جومگە و کۆڵەکە زیندووەکانی کۆمەڵگە، رزگارکردنی ئابورییە لەژێر دەسەڵاتی حیزب و هەیمەنەی خێڵ و بنماڵە نەخۆش و بەڵتەگی و هەلفوتەکاندا، فشار لەیەکەم هەنگاوی گۆڕانخوازی و هاوچەرخوازییەوە دەستپێدەکات، درۆیەکی گەورەیە دامەزراندنی دەمەزراوەگەلێکی مۆۆدرێن و هاوچەرخ بەبێ هەڵوەشاندنەوەی و هەڵتەکاندنی سیستمی کۆن و پاوانخوازی و ستەمی شارستانی و ئەخلاقی و ئابوریی. لەناو ستەمێکی ئاوەها وەحشیگەریی و ترسناکدا لەڕووی ئابوری و حیزبی و خێلەکییدا دەستبردن بۆ سازکردنی هەر دامەزراوەیەکی مۆدرێن و زیندوو و شارستانی دەستبردنە بۆ شکستێکی گەورە و دووبارەکردنەوە و درێژەدانە بە هەمەجییەت و ستەم و هەژموونی تاڵانکردنی کۆمەڵگە لەڕووی رۆحی و ئەخلاقی و شارستانییەوە.
فشار لە قوتابخنەیەکەوە لە زانکۆیەکەوە، لە ئەکادیمیستەکانەوە لە لەدامەزراوە ئابوری و سیاسی و شارستانییەکانەوە دەستپێدەکات، فشار بەبێ سازکردنی فەزایەکی شارستانی زیندووی بەهێز درۆیەکی گەورەیە…
ئۆپۆزسیۆنی شارستانی واتە بەرگریکردن و جەنگ دژی تێکدانی ئاسایشی کۆمەڵایەتی، ناداپەروەریی، خراپبەکارهێنانی دەسەڵات، شکستی گەورە، خیانەتی گەورە، ئاشبەتاڵی نەتەوەیی و شەڕ دژی شکاندنی شکۆی خەڵک و نەتەوەو نیشتیمان و شارستانیبوون….

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish