بیست و قسوور قردێلە چیرۆک.. نەوزاد بەندی
پێنج شەش پەیامنێر
لە پێنج شەش شاری وێرانسەرایەکەوە ،
باسی خۆڵبارینیان ئەکرد
دوای ئەوەی هەواڵی باران و ..
نان و .. چاکسازیی و ..خوێندن، چووبوون بە کۆڵەکەی ئاشا ..
- + +
وازیان لە مرۆڤایەتیی هێنا بوو، نیوەیان بوو بوون بە مەڕە لات و .. نیوەکەی تریان بوو بوون بە گورگ.. مەڕە لاتەکان ئەپاڕانەوە : خوایەگیان چاکی کەیت ..
گورگە تێرەکانیش ئەپاڕانەوە : خوایە گیان ئەم نیعمەتانەمان لەسەر هەڵنەگریت.
- + +
سەرقاڵی ڕێگا و پرد دروستکردن بوون، لە کاتێکدا کۆمەڵگا سەرقاڵی کیسی سواڵ دوورین بوون
- + +
لە نوێژی هەینیدا بەردەم پایەکان چۆڵ و هۆڵ بوون، بەڵام شوێنەکانی تر جمەیان ئەهات، چونکە خەڵکەکە هاتبوون سەیری مامۆستای ووتارخوێن بکەن نەک گوێ لە ووتەکانی بگرن.
- + +
جەماعەتێ بە شەق بەربوو بوونە گیانی کەسێک، ئەوانی تر تەماشای پاشەڵی خۆیان ئەکرد و سوپاسی خوایان ئەکرد کە شەقی بەر نەکەوتووە، ئەوەیش دەسکەوتێکی گەورە بوو و ئەبوو لەزەتی لێ ببینن.
- + +
بازرگانێکی ملیاردێر هەموو ڕۆژێ ئەگەڕایەوە بۆ ماڵەوە، ئەیووت یەک فلسم پەیا نەکردووە، یەک نان چییە، نەیدەکڕی.. ماڵ و مناڵەکەیشی یەک گلەیی چییە لێیان نەدەکرد .. ئیتر وایلێهات کە بازرگانەکە بۆ ماڵ ئەگەڕایەوە، ماڵ و مناڵەکەی ئەڕۆیشتنە دەرەوە بۆ سواڵکردن.
- + +
کابرایەک بە چەپڵە ئەژیا ..وەک مار، ساڵی یەک دوو جار نێچیری چەپڵەی ڕاوکردایه، هیچی تری نەدەویست.. ئەوانەیشی چەپڵەیان لێدەدا، ئەوانە بوون قاچ و دەستیان لێک جیانەدەکردەوە، هەندێ جار بە قاچ و .. هەندێ جار بە دەست، ئەو ئەرکە مرۆڤایەتییەیان جێبەجێ دەکرد
- + +
جەردەیەکی شارەزا، ڕۆژانە بانکێکی ئەبڕی، کە ئێواران ئەهاتەوە، عانەی ئەحمەڕی لە بەڕکا نەبوو، خۆی نەیدەزانی و کەسیش لێی نەدەپرسی بۆچی وا لات و ڕیسوایه .
- + +
شارێک بە ویستی خۆیان دەم و لچی خۆیان ئەبڕی و سلیکۆنیان تێدەکرد، ئیتر بەرە بەرە لە فەرهەنگەکەیاندا ووشەی ئۆپۆزیسیۆنیان کرد بە سلیکۆن ..خەبات بوو بە چات..نیشتمانپەروەریی بوو بە ئوتومبیل لێخوین.
- + +
ناوچەیەکی سەیر لەسەر نەخشەی جیهاندا دۆزرایەوە .. تیایدا گوڵ و گەنمت بڕواندایه، بەرهەمی نەبوو .. نەعل و پێڵاوت بڕواندایه یەک بە هەزاری ئەبڕی ..
- + +
خەڵکێکی زۆر ئەچوون بۆ بازاڕ و فەرمانگاکان، له کاتێکدا نە بازاڕ هەبوو نە فەرمانگە .. ئیتر خوویەک بوو بۆیان تەرک نەئەکرا
- + +
لەسەر کاغەز هەموو شتێ ئەنوسرا و ئیمزا و پەنجە مۆر ئەکرا، بەڵام بە هۆی زۆر خۆرییەوە، توشی سکچوون ئەبوون و .. بەو کاغەزانە خۆیان پاک دەکردەوە.
- + +
گرنگترین شت، قات و بۆینباخی گرانبەها بوو، لە ژێرەوە بۆگەنیان ڕۆژە ڕێیەک ئەڕۆیشت.. هەر کاتێ بۆگەنەکەیان ئەگەیشتە ڕادەی ڕشانەوە، خوێنی چەند سەگێکیان ئەڕشت، بۆ ئەوەی مێشەکان لەخۆیان دوور بخەنەوە و بڕۆن بە خوێنەکەوە بنیشنەوە..بەردەوامیش ئەچوون بۆ ئەوروپا بۆ کڕینی عەتری گرانبەها بۆ خۆیان و چەکی گرانبەها بۆ تۆپاندنی سەگەلەکە.
- + +
لە گۆڕستانێکدا هەمووان سەرقاڵی ژیانی تایبەتیی خۆیان بوون، تەرمی وای تێدا بوو چواردە نەشتەرگەریی جوانکاریی کرد بوو، هێشتا پارەی کۆدەکردەوە بۆ نەشتەرگەریی شانزەهەم، چونکە نەشتەرگەریی پانزەهەمی لە تیر و پشکێکدا بە خۆڕایی بردبۆوە، تا دەهات دزێوتریش ئەبوو.. تیایاندا بوو بیست و پێنج عەمرەی کردبوو، سەرقاڵی عەمرەی بیست و شەشەم بوو بە قیست، تا دەیشچوو خوا زیاتر غەزەبی لێدەگرت..
- + +
هەرچی کاڵای کۆن و زبڵ و خاشاکی دنیایە، لەو شارانەدا ساغ دەکرانەوە.. خەڵکەکە شانازیی بەوەوە ئەکرد، لە ڕێی تیکتۆکەوە، سەعات دووی دوای نیوەشەو، پانتۆڵێکی مارکەیان کڕیوە تەنها تۆزێ بۆیاخی پیا ڕژاوە.. یان پێڵاوێکی مارکەیان کڕیوە هی مردوویەکی بەنگلاندیشیە.
- + +
تەنها ئاودەستخانە و لەفە فرۆش و دەرمانفرۆشەکان ئیشیان باش بوو.. پارووە بۆگەنەکان لە قوڕگیان ئاودیو ئەبوون، لە گەدەیاندا کەڕوویان هەڵئەهێنا و ڕادەوەستان، بە چەند حەب و دەرمانێک ئاویان ئەکردە ژێریان، بە ڕاکردن سکچوونەکەیان ئەگەیاندە ئاودەستخانەی مزگەوتێ ..
- + +
حەرامخۆریی و قۆڵبڕێکەیان لە عەقڵدا نەبوو ، ڕوو بە ڕوو لە شەیتان ئەچوون، لە سەر لا لە شایلۆک ئەچوون، لە پشتەوە لە ئەبو لەهەب ئەچوون.. لە درۆنەوە تەماشات بکردنایە، تۆپەڵێ پاشەڕۆی جوانەگا ئەچوو بە گژتا..
- + +
ئەوەندە قسەیان کرد بوو، نرخی قسەکردن لەبەرامبەر وەڕیندا زۆر دابەزیبوو ..وای لێهاتبوو بە یەک وەڕین، حەفتا هەشتا شانامەت ئەکڕی.
- + +
کۆمەڵێ نیشتمانپەروەر، خاولیان دا بە شانیاندا و .. کۆمەڵێ بێگانەیان داوەت کرد بۆ لاقە کردنی دایکی وەتەن.. دایکی وەتەن فیشەکی زۆر پێوە بوو، بەرگەی نەگرت، لە نێو لنگی بێگانەکاندا گیانی سپارد.
- + +
نازانم، نە شار بوو، نە ووڵات ..بەڵام دەیان هەزار پڕۆژە و کۆمپانیا و ملیاردێر و ملیۆنێری تێدا بوو، کەچی کەری تێدا بکەوتایە، ددانی ئەشکا.
- + +
لە بەرامبەر چوار پێنج تاوەری هەور بڕی 52 نهۆمیدا، کە چۆڵ و هۆڵ بوون و هەر بۆ پۆز دروست کرابوون، شڕ و شیتاڵی خێزانێکی دوو نەفەریی، له خانوویەکی کۆنەوە فڕێدرانە سەر شەقامەکە، چونکە کرێی خانوویان پێ نەدەدرا .. خێزانەکە پێکهاتبوون لە دوو کەس، پیرەژنێکی تەمەن 82 ساڵ، لەگەڵ کوڕە کەمتوانەکەیدا کە تەمەنی 54 ساڵ بوو..
باوکیان، 42 ساڵ پێش ئەو بەروارە، لە شەڕێکدا، گۆڕ بزر بوو بوو.
- + +
دوو کەمتیار بە شەڕ هاتبوون، لە جیاتی قەپ بکەن بە یەکتردا، ئەمیان قەپی ئەکرد به گوێچکەی بەرخێکی ئەودا و دایدەهێنا، ئەویان کەڵبەی لە قوڕقوڕاگەی شەکێکی ئەمیان گیر ئەکرد، هەڵیئەدڕی.. چوار دەوریان سەدان هەزار گیانداری کەلەپاچەکراو کەوتبوون، تەنها دوو کەمتیارەکە زیندوو بوون، بەردەوامبوون لە شەڕێکی چارەنوسساز.
- + +
ئەوەندە ڕووی ڕەش بووبوو، دوای نەمانی ڤایرۆسی کۆڤید بە شەش ساڵ، هێشتا دەمامکەکەی فڕێ نەئەدا..دوایی دەرکەوت دەمامکەکەیشی گولە نەبڕ بوو.
نەوزاد بەندی
