Skip to Content

بەدەستم بێ … جەزا شێخانی

بەدەستم بێ … جەزا شێخانی

Closed
by September 7, 2020 General, Poems


بەدەستم بێ
هەرچی وشەی شرین هەیە
بینووسم و بیئاڵێنم
لەگەردنت
دووعای خۆشبەختیت بۆ ئەکەم
ڕەبی نەیبینم
مردنت
بەدەستم بێ
ئەو کیژانەی لەتۆ ئەچن
شاربەدەری شاریان ئەکەم
هەربۆئەوەی خۆت شاجوان بیت
تاجی شکۆت لەسەربکەم
بەدەستم بێ
هەرچی دەرد و بەڵا هەیە
کەبۆتۆدێ
لەخۆم کەوێ
ئەی پایتەختی دڵی دڵم
ڕەبی قەزات
لەمن کەوێ
بەدەستم بێ
ئەو شەقامەی پێدائەچی
تەواو شوشە ڕێژی بکەم
ئەی لەدڵا شرینەکەم
قەد حەزناکەم لەدەستت دەم
بەدەستم بێ
بەمانشێتێکی زۆرگەورە
وڵات ئەکەم بەناوتەوە
ئەتکەم بەخۆشترین ئاواز
هەموو دەمێ ئەتڵێمەوە
بەدەستم بێ
دەرگای ماڵت کلیل ئەدەم
قەدحەزناکەم تۆ بێیتە دەر
تۆ لەم هەست و نەستە دەگەی
شادەمارم ئەی تاجی سەر
لەدەستم دێ
من تۆبکەم بەو ڕۆمانەی
جیهان بەدوایدا بگەڕێ
بتکەم بەو چیرۆکە جوانەی
تەواوکەری مەم و زین بێ
لەدەستم دی
بۆکوێ ڕۆیشتی
پڕی بکەم لەئارامی
هێزی گیانم
گیانی گیانم
بۆ ئەوەندە خان و مانی
بەدەستم بێ
ناوت ئەنێم
پایتەختی شاجوانی وڵات
لەدڵەوە دووعا ئەکەم
ڕەبی دووربیت لەکارەسات
غیرەئەکەم
لەوجانتایەی لەشانتایە
ئەزانم هۆگرت بووە
ئەوقەڵەمەی لەدەستایە
لەزۆری تر غیرەئەکەم
قەڵەم لێوی نێو تاکەکەت
قاوەی تاڵی فنجانەکەت
ئەو سەرینەی بۆ پشووە
مانگ بەوهەموو نیگایەوە
لەتۆچووە
بەدەستم بێ
ناوت ئەنێم
پایتەختی شاجوانی وڵات
لەدڵەوە دووعا ئەکەم
ڕەبی دووربیت لەکارەسات

جەزا شێخانی.

Previous
Next