Skip to Content

تارمایی … ستار ئه‌حمه‌د

تارمایی … ستار ئه‌حمه‌د

Closed
by ئه‌یلول 24, 2020 General, Poems

شه‌و به‌دیار بێداری مه‌رگه‌وه‌ نووچ ئه‌ده‌ی
به‌یانی تابلۆیه‌ك بۆ سبه‌ی ده‌كێشی
من له‌به‌ر ئاوێنه‌ی ته‌ڵخه‌وه‌
ده‌له‌رزم بۆ چاوی داهاتوو
تۆش هه‌نیه‌ی ئه‌ستێره‌ ده‌تاشی و
ده‌بیته‌ شنه‌ی ردێنی داری توو
شه‌قامێك له‌تاریكی
ده‌مپێچێته‌وه‌ به‌ره‌و ئه‌و دیوی گوزارشت
تاوێك له‌وشه‌م ده‌ئاڵێی
نه‌له‌پاڵ مردنا گوزه‌رێ‌ تێمده‌گات
نه‌گه‌رمی هه‌ناسه‌ت
ده‌مخاته‌ سه‌مای حه‌ق
ئه‌زموونی باڵدارانم فێركه‌
ده‌مه‌وێ‌ بفڕم و
له‌لانه‌ی ته‌رزه‌دا
ماڵێكم هه‌بێت بۆ مه‌ودای سره‌وتن
نیگات له‌سروه‌ی شه‌ماڵدا
ده‌روازه‌ی ژیانی بێنه‌وام داده‌خا
دێمه‌وه‌ بۆ كه‌نار ئه‌و رۆحه‌ی
له‌تیشكی تابلۆدا
له‌ره‌نگی تاریكی بێزاره‌و
به‌ده‌نگی شه‌قژنت ئاشنایه‌
سه‌رابی كڕێوه‌ت
ژووره‌كه‌م ده‌كاته‌ ژوانگه‌ی مه‌رگه‌زێ‌
ناوێك نابینم بۆ پێناسه‌ت
رێگایه‌ك نامباته‌ هه‌ودای ره‌هابوون
له‌پاڵ شیعرێكی رزاوا
له‌نێو پاییزه‌ په‌یڤ و
رسته‌ی بێحه‌رفا
سپێده‌یه‌ك نابێته‌ هاوخه‌مم
ئه‌م دێڕی ئه‌لبوومی ئه‌وینه‌
له‌نێو هه‌ژانی یادگارما دیاره‌
زاراوه‌ی ته‌نیایی و
ئه‌دگاری وه‌رین و هه‌ڵبوونه‌
وێنه‌یه‌ك دیوارێ‌ رامووسێ‌
ته‌مومژ چوارچێوه‌ت ره‌نگده‌كا
ده‌بیته‌ تێكه‌ڵه‌ی به‌فرو خوێن
من پێكی ژه‌هری خۆر
به‌رۆحم ده‌پێوم
تۆش ئاڵای تاریكی هه‌ڵده‌گری
نه‌با نه‌خشه‌ی سینه‌ت ده‌سڕێته‌وه‌
نه‌له‌گه‌ڵ هوزانی به‌رداشا
بۆ خه‌می لوتكه‌یه‌ك
له‌كاڵای تارمایی چیایه‌كا ده‌مری..!

ستار ئه‌حمه‌د

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish