Skip to Content

620 Views

چۆن ڕێگه‌ بده‌م برسی بن؟ … عه‌زیز ڕه‌ئووف

چۆن ڕێگه‌ بده‌م برسی بن؟ … عه‌زیز ڕه‌ئووف

Closed
by July 1, 2017 General, Opinion

كچ و كوڕه‌ جوانه‌كه‌م، ئێوه‌ له‌نێو كوله‌مه‌رگی ژیان، ڕاهاتن به‌وه‌ی بابه‌ نیوه‌ موچه‌یه‌كی هه‌یه‌، ڕاهاتن به‌وه‌ی ئاو و كاره‌با نه‌بێت، ڕاهاتن به‌وه‌ی له‌ قوتابخانه‌ی حكومی بخوێنن و مامۆستاكانتان بیریان لای ژیانی سه‌ختیان بێت، له‌به‌رامبه‌ردا ئه‌وان منداڵه‌كانیان له‌ ده‌ره‌وه‌ی وڵاتن و ناسنامه‌ی ئه‌وروپا و ئه‌مریكا له‌ گیرفانی خۆیان و منداڵه‌كانیاندایه‌، له‌ قوتابخانه‌ و زانكۆ به‌ناوبانگه‌كانی ئه‌مریكا ده‌خوێنن و له‌ فه‌یسبوكیشه‌وه‌ وێنه‌ی ده‌رچونیان بڵاو ده‌كه‌نه‌وه‌، ئه‌وان شۆڕشگێڕ و ئێمه‌ خائین.
كچ و كوڕه‌كه‌م، ئێمه‌ به‌رگه‌ی ئه‌م هه‌موو نه‌هامه‌تیه‌ ده‌گرین و چه‌ندین ساڵه‌ شه‌ڕی ئه‌م مافیایانه‌ ده‌كه‌ین كه‌ وڵات وا به‌ڕێوه‌ ناچێت، كه‌چی ئه‌وان ئه‌وسه‌ریان لێگرتوین و له‌نێوان به‌ڵێ و نه‌خێری ڕیفراندۆمدا كه‌ خوا ده‌زانێت چ به‌ڵایه‌كی تر به‌سه‌ر ئه‌م هه‌رێمه‌دا ده‌هێنن، ئه‌وه‌ی وه‌ك خۆیان بیر نه‌كاته‌وه‌ ته‌خوینی ده‌كه‌ن و به‌ مێژوویه‌ك له‌ خیانه‌ت و له‌ به‌تاڵی سیاسیه‌وه‌ بیرمان ده‌به‌نه‌وه‌ ڕاستی لای كاممانه‌.

كچ و كوڕه‌كه‌م، كه‌ له‌ساڵی 1975 ئاشبه‌تاڵیان كرد و ڕایان كرد بۆ ئه‌مریكا و له‌ناو جێگادا باپیرانیان مردن، باپیره‌ی ئێوه‌ “شێخ ڕه‌ئووف” تفه‌نگه‌كه‌ی له‌ ژووری ئاژه‌ڵه‌كان له‌ گونده‌كه‌مان شارده‌وه‌ و وڵاتی جێنه‌هێشت و تا یه‌ك ساڵ دواتر خه‌باتی چه‌كداری ده‌ستی پێكرده‌وه‌، ئینجا تفه‌تگه‌كه‌ی ده‌رهێنایه‌وه‌، ئه‌وان له‌ كه‌ره‌ج و ئه‌مریكا له‌ناو جێگه‌ی نه‌رمدا بوون، ئێستا ئه‌وان شۆڕشگێڕ و ئێمه‌ خائین، ئه‌وان پێشه‌نگی ڕیفراندۆم و ئێمه‌ش خۆفرۆش.
كچ و كوڕه‌ جوانه‌كانم، ئه‌وان ئاشبه‌تاڵێكی تر ده‌كه‌ن و هیچ زه‌ره‌ر ناكه‌ن و له‌ پاره‌یه‌ی ساڵی 1975 زیاتریان پاشه‌كه‌وت كردووه‌ ده‌ڕۆن و من و ئێوه‌ش بۆ كوله‌مه‌رگی وه‌ك ” شێخ ڕه‌ئووف”ی باپیرتان جێده‌هێڵن و كه‌سیان برسی نابن ئێوه‌ نه‌بێت.
هه‌ناسه‌كانم ئه‌وانه‌ی باسی سه‌ربه‌خۆیی و نیشتیمان ده‌كه‌ن، وڵاتیان به‌ سه‌رزه‌وی و ژێرزه‌ویه‌وه‌ تاڵان كردووه‌، ئه‌وانه‌ی باسی ڕیفراندۆم ده‌كه‌ن، هه‌ر ڕۆژه‌ و ده‌ستی بێگانه‌یه‌ك ده‌هێننه‌ ئه‌م وڵاته‌وه‌ و وه‌ك نه‌هه‌نگ بیره‌ نه‌وت لوش ده‌ده‌ن، ئه‌وانه‌ی پێمان ده‌ڵێن سه‌ربه‌خۆیی ڕه‌نگه‌ نه‌هامه‌تی و برسێتیش له‌گه‌ڵ خۆی بێنێت، نه‌ خۆیان و نه‌ منداڵه‌كانیان نه‌ له‌ ڕابردوو نه‌ له‌ ئێستا و نه‌ له‌ داهاتوو نه‌ برسی ده‌بن و نه‌ ماندوو ده‌بن.

ئێمه‌ لێره‌ین گوڵه‌كانم، به‌رده‌وامین، من نازانم كه‌ی ئه‌م فه‌زاحه‌ته‌ كۆتایی دێت، من نازانم كه‌ی ئه‌م سیناریۆ و ئاراسته‌كردنه‌ جێده‌هێڵین، به‌ڵام ئه‌ركی ئێمه‌یه‌ نه‌وه‌ی ئه‌م جۆره‌ سیاسه‌ته‌ نه‌بین و پشت بكه‌ینه‌ ئه‌م جۆره‌ له‌ ژیان كه‌ نه‌ له‌گه‌ڵ خواسته‌كانی ئێمه‌دا دێـته‌وه‌ نه‌ فاكتی تێدایه‌ و نه‌ ویژدان. ئیشی ئێمه‌یه‌ حورمه‌ت بۆ تاكه‌كان بگه‌ڕێنینه‌وه‌، به‌نه‌وه‌ی شكۆشكاو ماڵێكی سه‌ربه‌خۆ دروست ناكرێت، به‌ قاچاخچیه‌كان نیشتیمان سه‌وز ناكرێت، قه‌ت نه‌مدیوه‌ مافیا باس له‌ سیاده‌ و سه‌ربه‌خۆیی وڵات بكات ئه‌مانه‌ی ئێمه‌ نه‌بێت.
هه‌ناسه‌كانم، من هیچم پێ نه‌كرێت ده‌توانم دژ به‌ بڕیارێك بوه‌ستمه‌وه‌ كه‌ ئاغایه‌ك بێ پرسی خه‌ڵك له‌ دیوه‌خانه‌كه‌یه‌وه‌ ده‌ری كردووه‌، هیچم پێ نه‌كرێت به‌ ته‌نهاش بێت ده‌توانم بڵێم من غوڵامی دیوه‌خانه‌كان نیم و دوای مژه‌ی درۆزنانه‌ی ئه‌م ئاغاو كوێخایانه‌ ناكه‌وم. كچ و كوڕه‌كه‌م له‌ ئێستادا هه‌ر ئه‌وه‌نده‌م پێ ده‌كرێت، ده‌ستی ئێوه‌ بگرم و له‌ كوڕی ئاغاكان به‌ گه‌وره‌ترتان بزانم. شكۆ گرنگه‌ هه‌ناسه‌كانم، كه‌ شكۆمان هه‌بوو، نیشتیمان هی ئێمه‌یه‌.

Previous
Next