Skip to Content

بەردەڵان.. شیعر/ کاوە عوسمان عومەر

بەردەڵان.. شیعر/ کاوە عوسمان عومەر

Closed
by January 5, 2021 General, Poems

وەک پەرداخێ مەی
شەوێ لە نیگایەکیدا ڕژا
هەورێ لە فرمێسکی کات
لە خوێنی کاتژمێری تەنیایی ئەتکا
قاچەکان لە نشێوی بەردا
جێمان
وشەکانیشیان
بە لێوی گیا گۆشتینەکانەوە دوریەوە
جیابونەوەی ساڵە تەرمەکانە
لە چاوەڕوانی سێبەری مرۆڤە دڵ کونەکان
بێئەوەی پێبزانن
ڕەهێڵە لمە وەرزەکان
وەزە لمە ڕەهێڵەکان
پڕبوون لەپروشە بەفری خۆشبەختی مردن
تاشە بەردێ نابینی
بتگەیەنێتە
بەردی حەقیقەت
هیچ تاشە بەردێ نابینی
کۆتامانای شتەکانی
لەسەر هەڵکەنرابێ
مرۆڤە بەردەکان
دیلن لە نێو دڵێ
موتربە بە ڤایرۆسی مەرگ
بەردەڵانی مرۆڤەکان
لە خوڕەی جۆگەلەی مەرگەوە ترازان
ئاشوفتە بون
لە نێوان کەژی وونبوون و
پردی مەرگ و سەما
واهەستی کرد لە ئاوێنەیەکی ترا
لە نوری بەردەم تونێلی خەونێکی ترا
بوەتەوە بە کڵپە ووشە
تا بنوسێ
برینێ لە عیشقی ڕەق
وەک بەرد
بڕیاری دا
فەرامۆشی کا
شیرێ لە چەقینی نێو برینی ڕۆح
لەسەر پەڕەی ڕەشی چارەنوسیش
ڕێبوارێ پرسی
کام توانەوە لە ڕۆژە سەرابیەکان
کام هاتنی پۆلە کۆتری ڕەشی بێهودەیی
کام حەزی مانەوە
لە مێرگی شینی چاوانی ئەو
کام چیرۆکی بریندارێ
خێڵە وونەکانی شەوی شیعر بیانهێنێ
هێڵکاری خەیاڵە
تەماشاکردنی پەیکەری تەمەن
هەر کە گەڕیدەیەک
دوا نامەی لە پشت ئۆقیانوسی وونەوە نوسی
میوەی فیردەوسی ئێستای پێنیە
بەتاڵبونەوەی تەلیسمی دوێنێ
لە تیاڕامانی سەحەرئامێزی ئەو
دەستپێکردنەوە بەگەڕانی
نێو بەردەڵانی بیرەوەریەکان
وەک خەو بوو
ئەفسانەی هاتنیان
وەک تای سەرەمەرگ بوو
ئاشووبی بوونیان
بە نائارەزوو ترازندیانە
ئەشکەنجەی گەڕانی خودی خۆی
بە ئارەزوو
لە ئامێزیان گرت
جەستەی پڕ تەم و خۆڵ و مەرگی یەکتر
بەردەڵانە ژیان
لە سەرەتادا
زەوی هەڵکێشراوی نشێوی بەستەڵەکی نەبوون
ڕۆح لە هەسارەی تەنیایی خۆیدا
مانگ کێڵراوی نیشتیمانی زەڕ خاکی وشە بوو
خوێنیش ڕۆمانی نەنوسراوی ئاوی مانەوە
گەرچی ڕەگی پرسیارێ
لەسەر مێرگی دڵ ڕوا
گەرچی لێوەکانی ئەو کچانەی
لە چاوەڕوانی هەڵۆ ئاڵتونیەکانا
بوونە بەرد
پشکۆی چاوانی
ئەفسانەنوسیش
زۆر دەمێکە کوژانەوە
لە زەمەنی ڕۆژە بەردەڵان
خواوەندی بەرد دروستی کردن
ئەچنەوە ژێر نمە لمی بێهودەیی و گومرایی
لەبەهارێکی بەژموردەدا
ئاسمانیش هیچ دەرگایەکی تری نیە
جگە لە جادوو
هەموان لە دێوەجامەی گەردوونا دیل
زمانیش، لە تەڵەی
بێدەنگی ڕزگاری نابێ
بەردەڵانی وشە ڕۆژەکانە
قفڵ ئەکاتە پێکان
وەک کەلە سەری ساڵەکان
بەردەکان خلۆر ئەبنەوە
هەر وەک دەرزی
تیشکی چاوی ئەستێرەکانیش
بەیداخی ڕەشی شەوەزەنگێ ئەبڕێ
بەڵام ئێوارەیەکی زیوین
چی پێ ماوە
تاوەکودەرگای ئاڵتونینی قەفەزی دڵی تۆ بکاتەوە
دار خەونەکانی ڕابردو
پێش گەیشتنی ئەوان کلۆر بوون
تەم ڕوخسارێ بویت
زەریاپۆشێ بووم
ڕاماین
لە نێو بەردەڵانی ساڵانێ لە تەم
چی سەمەرەیەکە چرکە بوونەکان
چی سەمەرەیە
بوونە چرکەکان
لەشریتی پجڕاوی فلیمێکی پچڕاو
زیاتر هیچیتر نیە
نمایشی ئەوان
بەسەرهاتەکانی نێو گەردوونی بەردەڵان
ڕۆمانی نوسراوی دەستی خۆمانە
بەردەڵانە
حەزەکان
بەردەڵانە
مێژووی پەروانە مرۆڤ باڵسوتاوەکان

……………………………………………………………………………

وێنەکە کارێکی هونەری فۆتۆگرافەری بەریتانی
( Tim Hill)
بە سوپاسەوە لە پەیجی فەرمی خۆی وەرگیراوە

Previous
Next