Skip to Content

كاری رێكلامی هونه‌ری كاریكاتێر.. هه‌ندرێن خۆشناو

كاری رێكلامی هونه‌ری كاریكاتێر.. هه‌ندرێن خۆشناو

Closed
by January 6, 2021 General, Literature

كاریكاتێر له‌ رێكلامدا و به‌تایبه‌تی له‌ رێكلامی بازرگانیدا به‌ شێوه‌یه‌كی فراوان به‌كاردێت، له‌وانه‌یه‌ زۆربه‌ی رێكلامه‌كان له‌ رۆژنامه‌كاندا كاریكاتێریان له‌گه‌ڵدا بێت، كاری رێكلامكردن و ئه‌ركی به‌كاربردن له‌یه‌ك جیاوازن، به‌وه‌ی كه‌ كاریكاتێر به‌ شێوه‌یه‌كی گشتی ئه‌ركێكی به‌كاربردن جێبه‌جێ ده‌كات، به‌ڵام ئه‌و كاریكاتێره‌ی كه‌ كاری رێكلامكردن ده‌كات، كاریكاتێرێكه‌ تایبه‌ت بۆ رێكلامه‌كه‌ دروستكراوه‌، كاریكاتێریش له‌ رێكلامی بازرگانیدا هه‌روه‌ك كاریكاتێری فێركاری وایه‌، ناتوانین به‌ كاریكاتێری دابنێین به‌مانای وشه‌، چونكه‌ بێبه‌شه‌ له‌ زۆرێك له‌ بنه‌ماكانی كاریكاتێره‌وه‌، ناوه‌ڕۆكه‌كه‌شی به‌ شێوه‌یه‌كی سه‌ره‌كی په‌یوه‌سته‌ به‌ ناوی ئه‌و كاڵا بازرگانیه‌ی كه‌ رێكلامه‌كه‌ی بۆ ده‌كرێت.
هۆیه‌كانی به‌كارهێنانی كاریكاتێر له‌ رێكلامدا زۆرن، یه‌كه‌میان ئه‌وه‌یه‌ كه‌ رێكلام هه‌وڵی ناوبانگ ده‌ركردنی ناوی كاڵایه‌ك ده‌دات، بۆیه‌ به‌كارهێنانی گاڵته‌جاڕی و هێنانه‌كایه‌ی كه‌سایه‌تی و چیرۆكه‌‌ گاڵته‌جاڕییه‌كان سه‌باره‌ت به‌ ناوی كاڵایه‌كی بازرگانی، ده‌بنه‌ هۆی پاراستنی ناوی كاڵاكه‌ له‌ یاده‌وه‌ری خوێنه‌راندا، به‌مه‌ش ده‌بێته‌ هۆی ناوبانگ ده‌ركردنی ئه‌و كاڵایه‌، له‌ هۆیه‌كانی تریش سوودی كاریكاتێره‌ له‌ فێركردنی خوێنه‌ر له‌ چۆنیه‌تی مامه‌ڵه‌كردن له‌گه‌ڵ ئه‌و كاڵایه‌، واتا كاریكاتێر له‌ رێكلامی بازرگانیدا هه‌ندێك جار كاری فێركاریش ده‌كات، له‌ هۆیه‌كانی تریش سانایی گه‌یاندنی زانیارییه‌ ده‌رباره‌ی كاڵایه‌ك به‌ به‌كارهێنانی كاریكاتێره‌وه‌، و ئاسانی قبوڵكردنی رێكلام له‌لایه‌ن خوێنه‌رانه‌وه‌ به‌هۆی كاریكاتێره‌وه‌، و چه‌ندین هۆی تریش.
خولی رێكلام له‌ بازاڕدا به‌ سێ قۆناغ دیاریده‌كرێت:
1- قۆناغی فێركردنی جه‌ماوه‌ر
2- قۆناغی كێبڕكێ
3- قۆناغی پاراستنی ناوبانگی، هه‌ر قۆناغێك له‌م قۆناغانه‌ شێوازی تایبه‌تی خۆی هه‌یه‌، ئه‌وه‌ی كه‌ تایبه‌تمه‌ندی ده‌به‌خشێته‌ كاریكاتێر، ئه‌وه‌یه‌ كه‌ بۆ هه‌ر سێ قۆناغ گونجاو و شیاوه‌، ده‌توانرێت به‌ كاریگه‌رییه‌وه‌ له‌ هه‌ر سێ قۆناغه‌كاندا به‌كاربێت، له‌وانه‌یه‌ كاریگه‌ریه‌كه‌شی له‌ قۆناغی فێركردنی جه‌ماوه‌ر به‌رزتربێت، كه‌ باس له‌ دابه‌زینی كاڵایه‌ك ده‌كرێت له‌ بازاڕه‌كاندا، ئاماژه‌ به‌ جیاكاریی و باشیه‌كانی ئه‌و كاڵایه‌ ده‌كرێت، و باس له‌ چۆنیه‌تی به‌كارهێنانیشی ده‌كرێت، له‌وانه‌یه‌ كاریكاتێر لێره‌دا رۆڵێكی دیكه‌ش ب‌گێڕێت، ئه‌ویش راكێشانی سه‌رنجی خوێنه‌رانه‌ بۆ رێكلامه‌كه‌، بێجگه‌ له‌ رێنیشانده‌ری بۆ سیفه‌ته‌كان و رێگاكانی به‌كارهێنانیشی، كاریكاتێر سروشتیانه‌ سه‌رنج بۆ لای خۆی راده‌كێشێت، و ئه‌گه‌ر رێكلام ته‌نیا به‌ ده‌قی نووسراو قایل بێت، له‌وانه‌یه‌ خوێنه‌ر هه‌ر سه‌رنجی نه‌داتێ، به‌ڵام له‌ كاتی بوونی كاریكاتێر، ئه‌وا جیاوازی لاپه‌ڕه‌كه‌ خۆڕه‌سانه‌ سه‌رنجی خوێنه‌ر راده‌كێشێت، و ته‌ماشای رێكلامه‌كه‌ ده‌كات، له‌ قۆناغی كێبڕكێشدا رێكلام پێویستی به‌ چه‌ندین شت ده‌بێت، بێجگه‌ له‌ كاریكاتێر، نه‌خشه‌سازه‌كه‌ ده‌بێت ره‌چاوی چه‌ندین شت بكات، بۆ قایلكردنی خوێنه‌ر به‌ به‌رزی ئه‌و كاڵایه‌ی كه‌ رێكلامی بۆ ده‌كرێت، كاریكاتێر یه‌كێك له‌و ئامرازه‌ سه‌ركه‌وتووانه‌یه‌ له‌م قۆناغه‌دا، به‌ڵام به‌ته‌نیا له‌وانه‌یه‌ ئامانجه‌كه‌ نه‌پێكێت، له‌ قۆناغی پاراستنی ناوبانگیش، پشت به‌ستن به‌ كاریكاتێر و هێنانه‌كایه‌ی كاره‌كته‌ره‌ كاریكاتێرییه‌كان، ئامرازێكی سه‌ركه‌وتووه‌ بۆ گه‌یشتن به‌ ئامانجی ویستراو، له‌وانه‌یه‌ به‌كارهێنانی كاریكاتێر له‌م قۆناغه‌دا، چاكترین شێوازه‌كانی به‌كارهێنانی كاریكاتێر بێت‌ له‌ رێكلامدا، چونكه‌ هێنانه‌كایه‌ی كاره‌كته‌ری كاریكاتێریی كه‌ دووباره‌ دێته‌به‌رچاوی خوێنه‌ر، رۆژبه‌ڕۆژ ناوی كاڵاكه‌ ده‌به‌ستێته‌وه‌ به‌ كاره‌كته‌ره‌ كاریكاتێرییه‌كه‌، زۆرێك له‌ خه‌رجی رێكلامكردن كه‌م ده‌كاته‌وه‌، چاكتریش وایه‌ كه‌ كاره‌كته‌ره‌ كاریكاتێرییه‌كه‌ به‌بێ هیچ ده‌قێكی نووسراو بڵاوبكرێته‌وه‌، یان ده‌قێكی بچوك ته‌نیا كاڵاكه‌ به‌بیر خوێنه‌ر بێنێته‌وه‌، به‌مه‌ش رووبه‌رێكی فراوان ناگرێت له‌ لاپه‌ڕه‌كانی رۆژنامه‌كاندا، ئه‌مه‌ش ده‌بێته‌ هۆی كه‌مكردنه‌وه‌ی خه‌رجی، و هه‌روا بواردان به‌ بڵاوكردنه‌وه‌ی زۆرترین ژماره‌ی رێكلامی‌ هاوشێوه‌ له‌ رۆژنامه‌ جیاوازه‌كانی تریشدا، به‌مه‌ش رێكلامه‌كه‌ ده‌گاته‌ زۆرترین جه‌ماوه‌ر، له‌لایه‌كی تریشه‌وه‌ ئاستی كاریگه‌رییه‌كه‌ی به‌رزتر ده‌بێت.

Previous
Next