Skip to Content

لە چ بەروارێکدا ؟.. نەوزاد بەندی

لە چ بەروارێکدا ؟.. نەوزاد بەندی

Closed
by January 9, 2021 General, Poems

درەخت وبەفر
لە کەیەوە لێک تۆراون ؟
شەقامەکان ،
لە کەیەوە بە ڕۆژوون و ..
چاوەڕوانی ڕنووە بەفرێ ..
چەند دڵۆپێ باراناون ؟

ناوەکان هەموویان مردن..
یان کۆچیان کرد
ئەوانەی ماون ڕاناون ..

پیاوەکان زۆربەیان ڕۆیشتن
توانەوە ..
ئەوەی هەیە
توێکڵە پیاون ..

بەفر لە چ وێستگەیەکا
سەر و ڕیشی ڕەشکردەوە ؟
لە چ دەبەیەکا باران
زیندان کرا ..
وەک گاز و نەوت ..
کە بێ تاوان
لە مێژه زیندانکراون ؟

بەفر بارینی لە یاد چوو ..
لە ئاسمان بێتە خوارەوە ،
ڕۆحی ئەچێ ..
باران زراوی ئەتەقێ ..
چاوەڕێی پەڕەشوت ئەکەن ،
هەموو بە سەرە وەستاون ..!

نـــــــــــ . بەندیـــــــــــــــــــــــــــــــــــــــــــــــــــــ

Previous
Next