Skip to Content

وەرزە سەوزەکانی ئەوین.. وەرزی یەکەم.. شیعری: ستیڤان شەمزینی

وەرزە سەوزەکانی ئەوین.. وەرزی یەکەم.. شیعری: ستیڤان شەمزینی

Closed
by September 7, 2021 General, Poems

ئەزانم رۆژێک لە رۆژان ماڵتان لە ئاسمان
لە کوچەی ئەستێرە و پرشنگ بووە
تۆش دڵنیایت ساڵێک لە ساڵان
تریفەی مانگێک بووم
لە بەردەم دەرگای ماڵتان


چۆن دەزانم تیشکی خۆر ناگات
بە دیدەنی مانگەشەو
منیش بە تۆ ناگەم
هەر لەبەر ئەمە
لە رۆحی زەردهەڵگەڕاوی شیعرەکانمدا
تارای سپی بووکێنیت ئەکەمە سەر


هەرکات چیا توانی
باوەشی گەرمی زەوی جێبێڵێت
منیش لە دڵتدا بار ئەکەم
هەرکات گوڵ دڵی پەپولەی پێ شکا
تۆش بەرد بگرە شووشەی هەستم


ملی رێگەم بەرەو خۆم گرتبوو
کەچی لە رووباری ئەوینتا خۆم دۆزییەوە
ملی رێگەت بەرەو خۆت گرتبوو
لە کۆتاییا گەیشتیتەوە بە کانی فرمێسکم


لەم سەهۆڵستانەی تەنهاییمدا،
چاوەڕوانی تینی ئاگردانی چاوەکانتم
لەم دووکەڵ و غوباری سەرەمەرگەدا،
ئێشکگری نەسیمی بۆنداری ژوانم


لە غەمەکانم پەیکەرێ
بۆ فرمێسک دابتاشە
لەسەر باڵەخانەی سۆزت داینێ
لە هەنسکەکانت تابلۆیەک
بۆ عەشق دەنەخشێنم و
لە دڵما هەڵیدەواسم


لە دارستانی چاوەڕوانیما
تۆ سەوزترین سنەوبەری تامەزرۆ بوویت
لە گەردەلوولی بێ ئۆقرەییما
تۆ ساماڵترین ئاسمانی سەرکێشیم بوویت


پایزێک بووم هیچ گوڵێکم هەڵنەوەراند
جگە لە خونچەی دڵی خۆم
بەهارێک بووم هیچم تێدا نەڕوا
جگە لە گوڵزاری عەشقێکی پڕ غەم


فرمێسکە روونەکانت خەنجەرێکی تیژن
جەرگی شادمانییەکانم ئەبڕن
پێکەنینەکانت چیایەکی باڵا بڵندن
بەر بە رەهێڵەی رۆندکەکانم ئەگرن


ویستم لە رۆژانی هەمیشە بێدەنگیا
نۆتەی عەشق بخەمە گەرووتەوە
ویستم بۆ زیندووبوونەوە
دوو ماچی شیرین بخەیتە کفنەکەمەوە.

شیعری: ستیڤان شەمزینی

Previous
Next