Skip to Content

نوشستی میدیای ئەدەبی … رێژوان نووری

نوشستی میدیای ئەدەبی … رێژوان نووری

Closed
by ته‌مموز 29, 2017 General

گومانی تێدا نییە چەند فاکتەرێك هەن، دەبنە هۆی بەرەوپێشچوونی رەوتی ئەدەبیات و هونەر لە هەر کۆمەڵگایەکدا، لەوانە بزاوتی میدیا جۆراوجۆرەکانە، لەنێوان ئەو میدیایانەشدا؛ میدیای ئەدەبی خوێندراوەیە.
لە کوردستانی باشوور لەگەڵ هەڵکردنی قەیرانی ئابووریدا زۆربەی گۆڤارو رۆژنامەو تەنانەت پەڕتوکە چاپکراوە ئەدەبیەکانیش داخران، یان ڕێژەیان زۆر کەم بووەوە، ئەو کەمەش پاداشتی ڕێزلێنانی تواناو بەهرەکانی نووسیاریان نەهێشت و بڕییان، بە بیانووی قەیران؛ هەرچەندە نووسەر هەر ئەو پیشەیە بزانێت و بۆ نموونە دارتاشی و جۆڵایی و ئاسنگەریی نەزانێت، بەڵام بەرهەمەکەی بێ بەهایە لەم ڕووەوە.
ئەمە با لە لایەك بووەستێ، ئەوەی زیاتر جێی خەمگینی و کارەساتە ئەوەیە، ئەو بڵاوکراوانەش کە هەن نەك لە ئاستی پێویستدا نین و تینوویەتی خوێنەرانی ئەدەبی ناشکێنن، بەڵکو کەسانێکی ئاست لاواز بەڕێوەی دەبەن و رەنگە هەر خۆیان بە نووسیار ببینن، یان جۆرێك پەراوێزخستنی میزاجی خوێنەرانی ئەدەبی و هونەری بێت، کە خۆیان لەقەرەی بابەتە گرنگ و هەمەلایەن و ئەکادیمیەکان نادەن، یان تەنیا هەر بۆ خۆیانی دەردەکەن و خۆیان تیایدا دەنووسن، بۆ نموونە وەك لە ژمارە (١٠٠٣) ی دووتوێی پاشکۆی ئەدەب و هونەردا دەبیندرێت لە کۆی چوار بابەت سیانیان هی خۆیانە، کە دووانیان تەرجەمەی فارسییە!
لێرەدا چەند پرسیارێك رووبەروومان دەبێتەوە؛ لەوانە ئایا چیدی نووسەران و هونەرمەندان بایکۆتی ئەو بڵاوکراوانەیان کردووەو هیچیان بۆ نانووسن؟ واتا لە بێ بەرهەمیدا بێت؟ یان تەسکی بازنەی بڵاوکردنەوەی دەرەوەی خۆیان وادەکات کەسانێکی کەم بەشداری تێدا بکەن؟ باوەڕ ناکەم ئەوەی یەکەمیان بێت؛ چونکە جارێکیان زۆر پێم سەیر بوو و تێبینی ئەوەم کرد کە چەند ساڵێك دوای وەفاتی چیرۆکنووس (سەلام مەنمی) کورتە چیرۆکێکی ئەویان بڵاوکردبووەوە، نازانم هی چەند لە پێشتر بووە چیرۆکنووس بۆی ناردوون!

نەبوونی تێگەشتنی مەوسوعی بۆ ئەدەب و هوشیاریی میدیایی و ئەکادیمیبوون لە بیینی بابەتی باش و داهێنەرانەو هەڵسەنگاندندا، وا دەکات ئەو بڵاوکراوانە بمرێنێت و خوێنەرانیان روو لەکەمی بێت، لە لایەکی تریش داخستنی دەرگا دەبێت بە رووی بڵاوکردنەوەی بابەتی جدی و جوڵێنەرداو لە ئاکامیشدا داخستنی دەرچە دەبێت و هێشتنەوە بێت لە ناو بازنەی خولانەوە بە دەوری شتە سادەو دووبارەو سواوەکاندا.
بە دیقەتدان لە بڵاوکراوە پێشکەوتووە جیهانییەکان دەبینین دەستەی نووسەرانی تایبەتمەندیان هەیە بۆ هەر ژانرێك، ئەو پێوەرە ئەکادیمیەیە بڕیاری بڵاوکردنەوەی بابەتەکان دەدات نەك میزاجی تاکەکەسیی.
پەراوێزخستنی بابەتی باش وەك نموونەی ئەو مامۆستایە وایە قوتابییەکی زیرەك ئیکمال بکات و قوتابییەکی تەمەڵیش دەربچێنێت، کە ئەمە زۆر حاڵەتێکی ئاساییە گەر شەفافییەت و فاکتەری ویژدان پێودانگ نەبێت و ئیدی خوێنەر هەست بە بێزاری موتابەعەکرنی ئەو جۆرە بڵاوکراوانە دەکات.

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish