بە مافکردنی بێ ڕێزیی، نیشانەکانی شێرپەنجەی دەسەڵات.. نەوزاد بەندی
لەم ڕۆژانەدا وەزیری پەروەردەی هەرێمی کوردستان،دەڵێت : کەس و کاری هیچ قوتابیەک مافی ئەوەی نیە بێ ڕێزیی بە مامۆستا بکات !!
به ڕاستی ئەم ووتەیە هەژاندمی و ئەم ووشانەی پێ هەڵڕشتم :
کەواتە لای جەنابتان ( بێ ڕێزیی ) مافە !!! ..
با بۆ مەعالیتانی ڕاست بکەمەوە ، ئەگەر کۆمەڵگا بەربەریی نەبێ و یاسا تیایدا سەروەر بێ ، هیچ کەسێک بۆی نییە بێ ڕێزیی بە هیچ کەسێک و ..بە هیچ گیاندار و ڕووەک و بێ گیانێکیش بکات ..
ئەوانەی بێ ڕێزیی لە هەڵس و کەوتیاندا هەیە ، نەخۆش وگەمژە و دڕندە و بێ ڕەوشتن .. بێ ڕێزیی ماف نییە ، دۆخێکی قێزەونی دەروونییە و .. لە پشت ئەستوور بوون بە پارەی دزراو و دەسەڵاتی گەندەڵ و ماوە بەسەرچووەوە سەرچاوە دەگرێت ..واتا بێ ڕێزیی سنوور بەزاندنێکی چەتە و دز و مافیا و ڕێگرەکانە ..نیشانەیەکی دیاری سیخوڕ و پیلانگێڕ و ئەڵقە لەگوێ و جەلادەکانە ..
بێ ڕێزیی مۆرکی کەسانی پەروەردە نەکراوە ، کەسانێک کە بە فلتەری خوێندن و ڕەوشت ومرۆڤایەتی و داب ونەریتی کۆمەڵگادا نەچوون و ..وەک کۆمەڵێ دڕندەی کێویی ، زیانبەخش و زیانەخرۆن ..
ــــبێ ڕێزیی وەک ئاو و کارەبا و گەشت و گوزەرانی باش ، ماف نییە هەتا بیدەن بە خۆتان و لە چین و توێژەکانی تری کۆمەڵگای قەدەغە بکەن ــــ
ئەو دەسەڵاتەی بێ ڕێزیی بە ماف پێناسە ئەکات و ئەیداتە کەسانێک و لە کەسانێکی تری زەوت ئەکات ، ناتوانێ هەنگاوێک بە بێ گەلەگورگی حیمایە و چەکدار ، لە ووڵاتەکەیدا و لە دەرەوەی وڵاتەکەیشیدا ، بنێت .. ناتوانێ شەوێک بە ئاسودەیی و بێ ترس چاو لێک بنێ .. پاروویەکی بە ئارامیی لە قوڕگی ناچێتە خوار ، هەتا لە ناکاو وەک دەسەڵاتە بێ ڕێزە چڵیتەکان ئەبێ بە ژێر پێی جەماوەری ڕێزنەگیرا و بێحورمەتی پێکراوەوە ..چونکە ئەو دەسەڵاتە پێش هەمووان ، باش ئەزانێ کە باجی بێڕێزیکردن زۆر گرانە و ..نووسەرێکی وەک بەختیار عەلی ئەڵێت : هۆکاری زۆربەی شۆڕش و شەڕ و پێکدادانەکان ، بێ ڕێزیکردنە بە کەس و میللەتان ..
