لە خوێندنەوەیدا ئارەقەی شەرمم لێدەچۆڕا.. هونەر قاسم

لەخێندنەوەی گوتاری بڵاوکراوەی سەر پێگەی دەنگەکان <ئاخر تۆڵە بە چی دەکەیتەوە؟> وەکو خێنەرێك ئارەقەی شەرمم لێدەتکا کە گوایا چۆن ئەو پێگە پێشکەوتووخوازەی دەنگەکان کە دەیان گوتاری دژی جەنگ و ماڵکاوولکاریی بڵاوکردووەتوە بابەتی ئاوهالە بڵاو دەکاتەوە کە بەهانە بۆ کوشتنی هەزاران منداڵانی بێ گوناهـ دەهێنێتەوە کە هیچ لە سیاسەت و جەنگ نازانن، دەیکاتە بیانویەك بۆ کاولکردنی بیمارستان و مەکتەب و مزگەوت و کڵێسا، هەرچی مرۆڤی بە ویژدان و دەرووندروست هەیە لە جیهاندا سەرکۆنەی دەکات؛ هەر لە یابانەوە تا بەرازیل لە بێدینەوە تا دیندار تەنانەت جووە ناسیاسیەکانیش، ئەم رەوادانە بە کوشتاری سڤیل بە دەیان هەزار مرۆڤ لە گەورەو بچوك و پیرەمێردو ژن و پیاو، زۆر دوورە لە مۆڕاڵی نووسین و قەڵەمەوە، گرنگ نیە شوێنکەوتەی رۆژهەڵات بیت یان رۆژئاوا، سامیری یان دۆلار، رەش یان سپی، ئەوەی دەگوزەرێت تاوانێکی گەورەو قێزەونە لە جینۆسایدی توخمی مرۆڤدا؛ یادی کیمیاباران و مەزڵومیەتی گەلی کوردمان دەخاتەوە، ئەمن نە عارەبی دەزانم نە عەلی قەرەداخی دەناسم بەڵام خۆ ئەگەر کەناڵی جەزیرە و علی قرەداخی لای کاکی پارێزەری دەسەڵاتی ملهوڕ و ئیمپریالیست و کاولکاران هیچ مسداقیەت و ئەرزشیان نەبێت ئەوا لە جیهاندا بە پێچەوانەوەیەو لای ملیۆنەها خەلك جێی متمانەو بیستنی هەواڵە گرنگە جۆراوجۆرەکانن، وەکو میدیا لە گۆشە نیگا پێچەوانەو جیاوازەکانەوە خەلك بە دوای هەواڵی راستدا دەگەڕێ، ئەمریکاو روسیا یان بلۆکی رۆژئاواو رۆژهەڵات پێیان خۆش بێت یان پێیان ناخۆشە بگوترێت دەیانەوێت ئەودیوی رووداوەکان بزانن،کورد بەرژەوەندی لەگەڵ هیچ کەسدا نییە، بەس شاخەکانی هەیە پشتیوانی لێ بکات، پەیمانی لۆزان و بلفۆڕیش هەر لەلایەن ئەو زلهێزانەوە کێشرا کە کوردستانیان بە دەردی فەلەستین برد، دواتر ئەو برادەرە کە ئاوها سوکایەتی بەو زانایە کوردە دەکات دەبوو ئەوە بزانێت لە لایەکی ترەوە بۆ کورد جێی شانازیە کە سەرۆکی زانایانی ئاینی جیهان کورد بێت و لەو پلە بەرزەدا بێت دەبێت ڕێزی لێ بگرین بۆ خاتری کەسایەتی نەتەوەکەمان بۆچی ئێمە بۆیەکتر شکاندن ئەوەندە ئازاین؟ هیوادارین وەکو ئاپۆ سەری ئەویش نەخۆن.
ئەمن وای نابینم کەسی نوسیاری ئەو گوتارە بێلایەن بێت بەڵکو وەك دەمراستی جینۆساید دەردەکەوێ و دەدوێ، بەس ئەوەی لام جێی سەرنجە چۆن بە زمانی شیرینی کوردی رەوایی دەدرێت بە کوشتارو قەتڵوعام؟ ئەوەی زانیومانە سوپاکان بەرامبەر یەکتری شەڕ دەکەن نەك یەخەی خەڵکی بێدەسەڵات بگرن و رقی خۆیانیان پێ بڕێژن و لەناویان ببەن بە بەرچاوی جیهانەوە بێئەوەی ئەو رێكخراوە درۆزنانەی بە ناوی مافی مرۆڤەوە دەدوان هیچ هەڵوێستێکیان هەبێت و خۆیان کڕ کردووە وەکو ئەوەی ئەو هەزاران منداڵە بیتاوانە مرۆڤ نەبن!. کورد گەلەك نەهامەتی و ماڵوێرانی و کوشتاری چەشتووە لەلایەن دەسەڵاتی ئەو وڵاتانەی تێیدا بوونیان هەیە بە چەکی رۆژئاوایی، برسێتی و نەبوونیشی زۆر چەشتوە وەکو گەمارۆی ئابووری ٦ ساڵەی نەوەدەکان بەدەستی مادلین ئۆلبرایت لە باشوری کوردستان کە خانەوادەی وا هەبوون لە رۆژێکدا نانێکیان بە ٥ سەرخێزان هەبو بیخۆن، هەبوو منداڵی خۆی دەفرۆشت. کورد هەمیشە لەگەڵ چەوساوەدایە، ئەوەی لە خاك و ئاوی دەرکراوەو مافی ژیانیشی پێ نادرێت، نەك ئەو دەسەلاتە ئیستیعماریانەی گەمە بە جیهان دەکەن و جارێك کۆرۆنا بڵاودەکەنەوەو جارێك سون و کولـلە و جارێك قەتڵ و عام و گرفتی نێوان دەوڵەتان و دابەشکردنیان و بە شەڕدانیان.
یاساکانی سروشت زۆر وردو رەوان و جوانن، ببینن هەر شتێك لەسەر گەندەڵی و ناحەق بنیات بنرێت لە کۆتایدا هەر دەڕمێت، سەر زەویش هێندە فراوانە جێگای هەموو مرۆڤێکی تێدا دەبێتەوە بە کەرامەت و بڕومەت بژی، ئیتر ئەم شەڕو کوشتارو کاولکاریەتان لە پای چی؟ بۆ واز ناهێنن بە شێوەی ئاشتیانە هەموو نەتەوەو ئایدیاو ئاینەکان پێکەوە بژین؟ سامان و زەوی گەلان تەسلیمی خاوەنەکانیان بکەنەوە نەك بیانکوژن، بۆ لەسەر رەنگ و پەڕۆ یەکتری دەخۆن، خۆ ئەم زەویە تاپۆی کەس نیە درەنگ یان زوو هەموومان هەر بە جێی دەهێڵین، لەوەتەی فاممان کردووەتەوە و باوباپیرانمان دەیڵێن: ئەم دنیایە قەد ئەهریمەنی لێ نابڕێت، ناهێڵن تاوێك بە پشوو چاو لێکنرێت، بەڵام ئایا لە راستیدا ئایا ژیان ئەو مانایەی هەیە؟

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.