بایەزید و شتی تریش.. شیعری/ نەوزاد بەندی
من دوور ناڕۆم ..
ئەو پەڕەکەی، بایەزیدت بۆ ئەگەڕێم ..
لەوێ لەناو لافاوی ڕەنگ و
بۆن و تام ،
زەحمەتە بتدۆزمەوە ..
تۆ دوور ئەڕۆی ..
هەر بۆیە کات بە گەڕان بۆ من ، خەرج ناکەی ..
دڵنیایت من لەوێ نیم ..و
لەناو ئەو هەموو درەخت و ئاو و ئۆکسجینەی ئەوێ،
لەوێیش بم نامدۆزیتەوە ..
من هەموو مێشکم لای تۆیە ،
کیبۆردی دڵم ، بە پەنجەی تۆ لێ دەدا ..
یەک خاڵم و کاڵ ئەبمەوە و ئەکوژێمەوە و ..جارێکی تر پەیائەبمەوە ، لە دڵتا ..
ئەتەوێ بێ منیش بژیت ،
بەڵام شیعرێ ڕێت پێنادا ،
ئەتەوێ وەکو حەبیبە ، بچیتە ناو باڵەخانەی ئەدەبیاتەوە ..ئەزانی ، چەند دوور بڕۆی ، هەر دێیتەوە ..
چەندێ خۆت بشاریتەوە ،
هەر لە کۆپلەی نووسراوی ناو باخێکی تەواو هەڵوەریو ،
دیسان پەیدا ئەبیتەوە …
من بایەزید ، بۆت ئەگەڕێم ..
بە عەقڵی خۆم ئەتدۆزمەوە و ..
ئەڕۆین هەتاکو گوڵهانە ..
هەتا ئەوێ ، سەد جار کزەبا ئەمبات و ..
هەزار جار لەناو دڵخۆشیی
ناوەختمدا ئەتوێیتەوە ..
چەند ساویلکەم ! بایەزیدت بۆ ئەگەڕێم ..لەو شەقامە کۆنەی هەزار جار ماکیاجی بۆ کراوە و
کەچی هەر ڕەنگی عوسمانی و
دەنگی شمشێر و فیشەکی هەزاران شەڕ ،
لە هەموو جێگایەکیدا
ئەبیسترێ ..ئەزرنگێتەوە ..
بۆنی بارووتێکی زۆر تیژ ،
ئەڕوا هەتاکو ئەوسەر و ..
لەگەڵ بۆنی مێخەکا ئەگەڕێتەوە .
لەو شەقامە خوێناوی و فرمێسکاوییەی
هەزار ساڵە بێدەنگ ئەگری و نازانم چۆن ژیربێتەوە ..
بازرگانەکان دانێکی زۆریان تێدا هەڵڕشتووە ..
گەشتیاری ئەوسەری دنیا ،
پێیدا ڕەت ئەبن و دڵیان بەبێ هۆ ئەگەشێتەوە ..
من لە خۆشی ڕزگار بوون لە دابەزینی جۆزەی ددان ڕەشی
کارەبای موەلیدە ،
وا باڵ ئەگرم ..
تۆ وا ئەزانی عەشقت بووم ،
بە دەستێ ناهێڵی بفڕم ..
بە باڵێ ئەنیشیتەوە ..
من و تۆ ،،سیر و پیازین و
بەس لە ڕێزمانا پێکەوەین ،
نیوانمان هەمووی دوورییە ..
هیچ کاتێکیش دەست پێ ناکا ئەم چیرۆکە ،
تا عاجز بی و
لە بۆنەیەکی وەک بەفرا ،
ئاشت بیتەوە …
بێزار نابم ، دوکان دوکانی بایەزید ئەگەڕێم و ..
کرمانجییەک پیاڵەیەک چای هەنارم بۆ تێ ئەکات و ..
ئەڵێ بیخۆی ، جارێکی تر
بۆ سەر سەکۆی سەرئێشە ناگەڕێیتەوە ..
ئەڵێم ئەوت نەدیوە بێرەدا بڕوا ؟
هیچ تێ ناگا و .. لەگەڵ چەند کڕیارێکی ڕوس ،
خۆیم لێ ئەشارێتەوە ..
نەزانیی خۆمە ئەزانم ، گیرفانەکانی بایەزید ئەپشکنم …
لەو سەر ، تەواو ماندوو ئەبم ،
سیگارێکی ماڵتیپ ، ئەمەوێ ئاگر بەم ، بەس ناوێرم ..
نەک خوێنم دیسان تولەڕێی نیکۆتین بدۆزێتەوە …
تۆ دوور ئەڕۆی ، ..
شیعر کوا ئەگاتە ئەوێ ؟
ناوێرم بپرسم لەوێ تۆ چی ئەکەی ؟
ناشێ لەوێ منێکی ترت
لە کەنار دەریادا شاردبێتەوە ..؟!
یان ئەوێیشت ، هەر بۆشاییە و .. بۆشایی ؟!
من کە لێرە ، ئاڵودەم بووم بە تەنیایی ..
دوورتریش بڕۆی.. بێزار نیم ..
وونیشم کەی بۆ هەمیشە ،
لێت عاجز نیم ..
ئاساییە .. زۆر ئاسایی ..
ئەتوانم بابەت بگۆڕم ..
ئەڵێم بایەزید ، شیعرێکی خواستووە لێم ..
ئەڵێم گوڵهانە ، کۆنسێرتی گوڵێکی تازەی کردووە ..
بە خۆڕایی …
درۆ زۆرە.. کە لێرە هەموو تەمەنمان ، هەر درۆیە و ..
بە بێ درۆ ، خەڵک و حوکمەتیش ئەڕوخێن ..
سوپا و خێزان و پەرلەمان ،
ئەچنە دۆخی نائاسایی …
خەمت نەبێ ..
بێ من بڕۆ …
تا ئەوپەڕی دڵنیایی ..
