Skip to Content

لەساڵڕۆژی مەرگی “خواناس”دا!.. تاهیر عیسا

لەساڵڕۆژی مەرگی “خواناس”دا!.. تاهیر عیسا

Closed
by حوزه‌یران 21, 2024 General, Opinion


ئازیزم خواناس!
واساڵێک بە سەر تکانی خوێنی بە ناڕەوا ڕژاوتدا تێپەڕبوو
جارێکی دیکە ئەوانی داماوو کڵۆڵ لە وەڵام و تۆقیوو پساو لەپرسیارو گومان،
سەلماندیانەوە کە ئەوەی هەتا هەنوکەی هێناون، لۆژیکی شمشێرو قەتل و قیتال بووە نەک لۆژیکی جەدەل و گفت وگۆ
ئازیزم خواناس! هەرچەندە من،
بەسەدان فرسەخ لەگۆڕە ئارامەکەتەوە دوورم!
بەڵام دەمەوێت بڵێم،
بەئەندازەی ئەو دوورییە و بەڵکو بێکۆتاییش و هەتا دڵی دۆست و ئازیزانت و هاوچارەنووسانت، بیخوازن لە ئەڵڵای بکوژەکانت دوورم !
نەک هەر ئەو بکوژانەی وەکو ڤایڕۆس، ڕەشەبای شوومی مێژوو هەتا ئێرەی هێناون!
بەڵکو ئەوانەش کە لەناو فەنتەڵۆسی فاسیدو موفسیدی جووت زۆنیدا
بەرژەوەندییان ئەوە دەخوازێت ئەم جڕوجانەوەرانەش لەچوار دەوریاندا وەک تەونی جاڵجاڵۆکە، کۆمەڵگا بەبیری ژەنگاوییان تان وپۆکەن،
خەڵکی لەنێوان ژیان و مەرگدا دووچاری سەرەگێژەو نائومێدی کەن!
ئازیزم! نەمدەزانی تۆ چۆن خواناسێک و خوانەناسێک بووی!
بەڵام ئەو کۆمەڵگایەو ژیان وژیاریشی، کەتۆ عاشقیان بووبوویت و لەپێناویاندا وەک پەپوولە بۆیان سوتایت و دواجاریش پێگەیەکی ئارام نەبوو بۆ ژیانت، چ ئەوساو چ ئەمڕۆش لەبەرامبەر مەرگی کۆستکەوتوتدا لە گۆڕەکەت ئارامترو بێدەنگترن،
بۆنی ڕەوایەتیدان دێت بەوچیرۆکەی تۆیان، بۆ ئەبەد
پێ لەژیان ئەستاند.
ئازیزم خواناس، ئەوساتانەی تۆیان لەژیان تۆراند، من کەم وزۆر پێت ئاشنا نەبووم
تەنانەت ئاشنای هیچکام لە ڕوانگاو خەون و ئەندێشەکانیشت نەبووم!
بۆ جارێکیش پێم نەکەوتۆتە ئەو پێگەیەی تیایدا چاوت بەژیان هەڵهێناو، چاویشتیان لەژیاندا پێداخستیت،
ئاشنای ژیاندۆستیە هەرەباڵاکەشت نەبووم
ئاشنای هونەرو شیعرو مۆسیقا ناوازەکانیشت نەبووم
بەڵام ئەوەی کت وپڕو بروسکئاسا تۆی بەمن ناساند
ئەوەی ناخی جوانی تۆی ژیاندۆستی بۆمن ئاواڵاکرد و
ئەوەی دەنگ وسەداو ناوەرۆکی جوانی شیعرو سەدای شیعر خوێنینتی بەگوێچکەم گەیاند
ئەوەی ئەدای جوانیی شانۆییتی بەمن پیشاندا
ئازیزم تۆ نەبووی
میدیاو سۆسیال میدیاش نەبوو
ڕادیۆو ڕۆژنامە و تیڤیە دووڕووەکانیش نەبوون!؟
بەڵکو ئەوە، ئەو مەرگە شوومە بوو
چیرۆکە تڕاژیدیاکەتی بە گشت کون وکەلەبەرێکی دنیاداگەیاند!
لەکوێ گوێچکەیەکی زمانحاڵی کوردی لێبووبێت
لەوێدا، ئەگەر پەیامی تاریک پەرستان، بەنج و نابیستەو نادیدەی نەکردبێت
لەوێدا تۆ حیکایەتێکی غەدرلێکراوبوویت
لەوێدا تۆ تۆزو خۆڵەمێشی سوتاوی جەستەی حەلاجی لەدیجلەکراودا بوویت
لەوێدا تۆ هەزاران ئەنفالی نوگرەسەلمانی ئازاردیدەی دەستی حەجاجی شەقوەشێنی دامێن سوڕەتی ئەنفال بوویت!
ئەوەی بروسکئاسا هەواڵی مەرگی ناوەختتی بە گشت کون وکەلەبەرێکی دنیا گەیاند
ئەو زوڵمە بێئەندازە گەورەیە بوو کە بۆ پارێزگاری لە خودای تاریک بینە چەقبەستوەکانی مێژوویەکی زۆر دێرین کرا
ئەوانە بوون، کە دەیانەوێت مێژوو لە ڕابردوویەکی دووری زۆر مەحاڵدا بووەستێنن
دەیانەوێت هەموان لەوچیرۆکە کۆن و پڕ ئەفسانەیەی مێژووی قێزەونی سەرهەڵدانیدا، بتاسێنن
ئەوە ئەو زوڵمە گەورەیە بوو بەرامبەر تۆی «خواناس» ی دەروون جوانی خوانەناس کرا
لەمەرگی تۆدا ئازیزم خواناس!؟
من باشتر خودای ئەوانم ناسیی و لە خوداناسی ئەوانیش باشتر تێگەیشتم
زانیم ئەوەی لەخودای ئەوان بەدووربێت وەک تۆی ئازیز چەندە سالم وسەلیم و شیعردۆست و مۆسیقاپەروەرو چەندە ژیان شەیدایە!
ئەوەی لێشی نزیک بێت وەک فتواچیەکان وبکوژەکانت چەندە دڕ ندەو وەحشیی و وزاڵم وناقۆڵایە!
بەڵام ئەوەندە دەزانم کە خوداناسی ئەم شەمشەمەکوێرانە
چبەڵاو چکارەساتێکی درێژمەودایە
بۆ سەر هەرچی زیندەوەری سەر ئەم دنیایە
ئازیزم خواناس!
کەسێک نییە خوداناس بێت وەختێک “خودا” تەنیا زادەی ترس و نائومێدی مرۆڤی کاڵفامی نەوەی نیاندەرتاڵ و هۆمۆسپیان بێت!
زادەی خەیاڵئاسای مرۆڤی سەردەمی بەردبێت
خوداناسی ئەوان مایەی ئەو ناحەقیە گەورەیەبوو، کەلەتۆیەکی خاوەن ڕوئیاو پرسیارکرا
لەتۆیەکی خاوەن شک وگومانکرا
ئازیزم دەزانم کە پرسیارو گومان بۆ کەسێکی خاوەن هۆش وخاوەن بیر،
چەندە ئاسایین کەلەزاتی هەرمرۆڤێکی ئازای وەک تۆدا چەکەرەدەکەن.
دەزانی، ئەو مامۆستایەی لەویژدانەوە لە پێگەی بەرپرسیارێتی گەیاندنی زانست و زانیاریەکانیدایەو مامۆستایەو لەهەوڵی وەڵامی گشت پرسیارێکی قوتابیەکانیدایە
چەندە داناو زانایە!؟
بەڵام ئەوەی گرفتی لە پرسیارەو ئەوەی ترسی لە گومانە
تەنیا ئەڵلای هەڵبەستراوو داتاشراوی نازانا و نادانایە!
ئازیزم، خواناس، بەقەد جوانیت بە قەد گەنجێتیت
بەقەد کزەی جەرگی ئازیزانت منیش کزەی جەرگم دێت وناڕەحەتم
منیش پەرێشانی خوێنی بەناڕەوا ڕژاوتم
ئەگەرچی تۆ ئێستا بەجەستە
لەناو کۆڕی شیعرو نۆتەی موسیقاو ستەیجی شانۆنامەکانتا واساڵێکە دابڕێندراوی!
ئەگەرچی تۆ ئێستا لەپیاسەی ئێوارانەی سەرشۆستەکانی شارۆچکە وەیشومەکەت تۆرێندراوی!
بەڵام یادەوەریەکانت و چیرۆکە تڕاژیدیاکەت،
وەک چیرۆکی حەلاج و فەرەج فۆدەو عەبدولخالق مەعڕوف و فەرهادفەرەج و شاپورو قابیل و ماریاکان، هەزاران هەزار قوربانی دیکەی دامێن ئەم خوڕافاتیانەی مێژووی دین، نەوە لەدوای نەوەو سەدە لەدوای سەدە ميژوو دەیبات، دەیبات، دەیبات و بەردەوام بۆ نەوەکانی داهاتووی دەگێڕێتەوە
هەتا لە کەناری دنیایەکی ئارام و یەکسان و بێ پوول وپارەو بێزوڵم وزۆرو چەوسانەوەو بێ چینی جۆراو جۆردا
کە ئیتر لەوێ هیچ ئایدیاو دینێک هۆکاری چەواشەو فریودانی فەقیرو نەدار نییە!
لەوکەنارەدا، کەس عەوداڵی بەهەشتێکی خەیاڵی
لەپێناوی ڕوباری شیرو شەڕاب و هەنگوین و سێکسی حەفتا حۆریەو غیلمان نییە،
کەس عەوداڵی پارویەک نان و خۆزگەو ئاواتی سفرەو ژەمێکی ڕازاوەی چێژدار نییە
کەسێک عەوداڵی، کەڵەکەی سەرمایەو قازانجپەرەستی نییە!
لەوێدا سوڵتەو دەسەڵاتە زاڵمە سەروخەڵکیەکان بوونیان نییە
ئەوەی هەیەو دەسەڵاتی ڕەهایە
وشیاری و مرۆڤی کامڵ و باڵاو دانایە
لەوێدا نەبافڵەکان و نەمەسرورەکان و بابۆکان بوونیان ماوە نەباسێک لەبارەیان!
مەگەر تەنیا لە گۆشەیەکی بچوکی عەنتیکەخانەو مەتحەفەکاندا بتوانیت شتێکیان لەبارەیەوە ببیستی و ببینی وبخوێنیتەوە
نەئەردۆغان و نە خامنەیی و
نە بایدن و نە پۆتین و نەشی جین پینگەکان هەن
نەمیدیاو ڕۆژنامەو کەناڵی تیڤی و میدیاکارو ڕۆژنامەوانی چەواشەکارو کاسەلێس و چڵکاو خۆر هەن
نە ئەکادیمیست و خاوەن دکتۆرای ویژدان فرۆشی بێقیمەتی ناخ بەتاڵی چەنەباز هەن!
لەوێدا ئیدی شەڕی زۆنەکانیش نەماوە
هەتا هەڵۆ هەڵەوەڕەکان ولەتیف سەلەفییە داوێن بۆگەنەکان لەدژی ململانێی نێوانیان و موتیع و گوێڕایەڵکردنی حەشاماتی کۆمەڵگاو بەلاڕێدابرانیان و سەرمەستکرانیان بە بەهەشتی مەوعودە،
هەوساریان بەرەڵابکرێت و بەئارەزویان ئەوەی لەکاتی جەنگی بەڕبەڕیانەی پەیامبەرەکەیاندا وەک ڕەوشت ونەریتێکی شەرانگێزی، ڕویداوە، بیئاخننە مێشکی لاوانەوە.
لەوێدا ئیدی، باسێک لەو هەزاران مزگەوت و بڵندگۆو کەناڵ و ڕادیۆو ڕۆژنامەو ملیاران دۆلارە نەماوە، وەک ئەمڕۆ بخرێتە ئیختیاریانەوەو کۆمەڵگا بۆ جەنگ وکوشتاری ڕانەگەێندراو ئامادەکەن،
دین و مەسحەف و توراثەکەی، مەگەر وەک هەر کلتور وکەلەپورێکی دیکەی وەک حێل ومێخەک و خڕخاڵ و چارۆگەو تورەکەو بەڕەو جاجمەو تیرۆک ونانبرێشک کوندەو ستریشک و کەندوو و ستەڕک و کولدین و نیرو ئامورو دەیان وسەدان عەنتیکەی کەلەپوری دیکە لە مەتحەفەکان و عەنتیکە خانەکان، بۆ بەسەر بردنی کاتی بەتاڵی و وەبیرهێناوەی، مێژوی پڕ لە عەجایب وغەرایبی ڕابردوو تەماشا بکرێن!؟

تاهیر عیسا
21/6/2024

mm

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.

Previous
Next
Kurdish
Powered by TranslatePress