گۆمی دوكەڵ.. شیعری\عەبدولسەلام ئیسماعیل سادق

خەمە ڕوتە داپۆشراوەكانم
ببەم بۆ كام كێوی تەخت
كام دەشتی كێوئاسا
بەر كام شەپۆڵیاندا بدەم
بە كام ئاسماندا بیاننێرم

وشەكانم یەك یەك
بە تەنافی ئاسمانەوە هەڵواسیوە
بەڵكە ببینرێن
و
بخوێنرێنەوە
بەڵام چیدی
ئاسمانیش بەرگەی هەڵگرتنی وشەكانمی نەماوە
لە قورساییی وشەكانم پشتی چەماوەتەوە

هاوینێكی سارد هات
و
وشەكانمی سڕ سڕ كرد
وشك وشك بوون وشەكانم
بەڵام نەمردن

ئاسمان خۆری لە ئامێز گرتووە
بەڵام
من جەستەم ساردە
و
وشەكانم لە ناوەوە ئارەق دەكەن
دوكەڵێكی ڕەش ڕەش
لە ژێر دەرگەی هەر یەك لە وشەكانم دێتە دەرەوە
و
جۆگەڵە دەگرێت
لە ڕێڕەوی ئاسمانەوە
گۆمێكی مەنگ دروست دەبێت
گۆمی دوكەڵ

بۆ دواجار ئاسمانیش گریا
لەگەڵ هەر پێلكێك
تنۆك تنۆك دوكەڵ لە چاوانی دەهاتە خوارەوە
بەڵام بەر زەوی نەدەكەوتن
هەر لە ئاسمان
لە تەنافی وشەكانم
گیر دەبوون

Dengekan

دەنگەکان وەک رۆژنامەیەکی ئەلکترۆنی لەپێناوی فەراهەمکردنی سەکۆیەکی ئازاد بۆ دەنگە جیاوازەکان لە ١ی حوزەیرانی ٢٠٠٢ دەستی بەکارکردن کردووە لە شاری تۆرنتۆ. دەنگەکان بە رۆژنامەی خۆتان بزانن و لەرێی ناردنی بابەتەکانتانەوە بەرەو پێشی بەرن لەپێناوی بنیاتنانی کۆمەڵگەیەکی هۆشیار و ئازاد و یەکساندا.