لەگەڵ ئەوەیشا.. شیعری نەوزاد بەندی

هەرچەندە گەڕانەوەکەم ،
بێ مانا بوو ..
لەگەڵ ئەوەیشا دڵخۆشم ..

٭ ٭ ٭

کە خەم لە هەر چوار لاوە بێ ،
ناچارم به پەردەی خەیاڵ
خۆم داپۆشم ..

٭ ٭ ٭

هەموو زیانێ ،
تامێکی تایبەتی هەیە ،
تامی لە دەستدانی
ئەو دەسکەوتانەی
کە توند توند
دەست و قاچیان شەتەک دابووی ..

٭ ٭ ٭

هەموو قازانجێ ،
چاڵێکە ،
قوتت ئەدا ،
تۆ لەو ڕاوە بێ ئاگا بووی

٭ ٭ ٭

مردن ، ئەو گوریسە زبره ئەپچڕێنێ ،
کە بە دنیاوەی بەستووین و ..
فێری کۆیلایەتیی کردووین ..

٭ ٭ ٭

ژیان ، قولاپێکە ،
ئەچەقێ لە گەروومان ،
لێنابێتەوە تا گیاندان ..
کاتێ مردووین ..

٭ ٭ ٭

گەڕامەوە ..
تۆ هێشتا لەوێ وەستا بووی ..
ئەتویست بزانیت دێمەوە ..
کاتێ هاتمەوە ،
تۆ ڕۆیشتیت ..

٭ ٭ ٭

من هاتبووم ،
پارچەکانم کۆکەمەوە ..
بەڵام تۆ لێم تێنەگەیشتیت ..

٭ ٭ ٭

ئێستا نازانم دانیشم
یان بڕۆم بەڕێی خۆمەوە ؟
هەرچەن بەو نیازە هاتم ، دانیشم ..
نەڕۆمەوە ..

٭ ٭ ٭

لەگەڵ ئەوەیشا ، دڵشادم ..
وەک کرێکارێکی ماندوو ،
پێخەفێ ختوکەی بدا ..
خەوێ چاوی گەرم بکا ..
دوور لە چرا و
لە مۆمەوە ..